Rä karta de rä Cuerpo Gobernante 2017

Zi kuhu̱ ꞌne zi njuhu̱:

O̱tꞌe ngu 2.600 yä je̱ya, rä profeta Ezequiel bi me̱ꞌtsi nꞌa rä däta visión: näꞌä bi hyandi ha mähetsꞌi nꞌa rä däta tsanza ꞌne go mi yꞌe̱tꞌi näꞌä rä Däta Tsꞌu̱tꞌhui de gatꞌho rä Xiꞌmhai. Näꞌä däta tsanza xa mi tihi ngu nꞌa rä hue̱i, ꞌne asta nuꞌmu̱ mi paati rä ꞌñuu himi tsaya nixi nꞌa tu̱i (Ezeq. 1:4, 9, 12, 14, 16-27).

Näꞌä bi hyandi Ezequiel, bengägihu̱ ge rä organización Jeoba —näꞌä parte bi ja mähetsꞌi ꞌne näꞌä parte ja ha rä Xiꞌmhai— nunka ꞌmai nixi tsaya. Njabu̱ udi näꞌä bi me̱fi rä hnini Jeoba näꞌä je̱ya bi thogi.

Nuua ha Estados Unidos, yä ku de Betel xi xä nja yä ꞌme̱fi ngeꞌä di mponi de Brooklyn pa ha märꞌa yä luga kohi de gekua ꞌne pa ha näꞌä rä rꞌayꞌo sede mundial bi kohi ha Warwick (Nueva York). Po gatꞌho rä Xiꞌmhai, yä ku de ha yä ngu Betel di mpe̱fi ndunthi pa hoki habu̱ xä tsꞌoki o ju̱tsꞌi märꞌa yä ngu de gä ꞌme̱fi. Märꞌaa, xä ꞌme̱hni ha märꞌa yä luga habu̱ bi ja mꞌe̱di rä mfatsꞌi. Mäske ndunthi de geꞌähu̱ hinxä ꞌme̱hnäꞌihu̱ ha märꞌa yä luga, di pädihe ge nuꞌähu̱ ꞌnehe xkä honihu̱ hanja gi pe̱päbihu̱ Äjuä mänꞌa xä ñho.

Rä Cuerpo Gobernante xa di johya ndunthi ꞌne nupäbi rä mfeni ora handi ge po gatꞌho rä Xiꞌmhai, yä ku mänꞌa xa di mpe̱fi ndunthi ja ngu nunka xki nheki ꞌne njabu̱ yꞌo mähye̱gi ko rä hnini Jeoba. Ndunthi yä ku xä ne xä ma habu̱ bi ja mꞌe̱di ndunthi rä mfatsꞌi, märꞌaa di ungä ntꞌo̱de rä Noya Äjuä ha märꞌa yä idioma o xä hyoni hanja dä me̱päbi Äjuä mä ndunthi. Gatꞌho yä ku, asta nuꞌu̱ yä zi däta jäꞌi o nuꞌu̱ di hñeni, sigi yꞌo ha nunä ꞌñuu tsitsꞌi ha rä te. Nuyu̱ yä ku hingi tsaya ꞌne sigi pe̱päbi Äjuä, ¡ꞌne njabu̱ udi ge rä Zithu näꞌä nꞌa rä nda hyate! (1 Cor. 9:24.)

Ogi dudahu̱ ge Jeoba handi gatꞌho nuꞌu̱ yä sacrificio gi o̱tꞌehu̱ (Heb. 6:10). Nuꞌähu̱ gi njahu̱ ngu Abrahán ꞌne Sara. Mäske Abrahán ya mi pe̱ꞌtsi thogi de 70 yä je̱ya, näꞌä bi bo̱ni de Ur —nꞌa rä hnini de Babilonia— ꞌne bi zixä rä familia ha Canaán, nꞌa rä luga mi kohi xi yabu̱. Ja bä ꞌmu̱hniꞌu̱ ha yä ngu de gä dutu po nꞌa nthebe yä je̱ya asta mi du. ¡Hängu yä sacrificio bi yꞌo̱tꞌe tanto Abrahán ꞌne Sara! (Gén. 11:31; Hech. 7:2, 3.)

Xi nuꞌi, ¿gi de̱mbäbi nuꞌu̱ yä hogä ejemplo bi zoogi? Nuꞌähu̱ gi ze̱tihu̱ yä xuñha ha nuya yä gäxä pa ꞌne gi pe̱fihu̱ näꞌä bi mändagihu̱ rä Hesu nuꞌmu̱ bi ꞌñenä: «Gi mahu̱, ꞌne ꞌñutihu̱ yä jäꞌi de gatꞌho yä dähni pa dä zo̱ho̱ dä de̱ngägi, xiꞌtsihu̱ po rä thuhu rä Dada, rä Tꞌu̱, ꞌne rä espiritu santo» (Mat. 28:19).

Nuꞌmu̱ rä Hesu bi ꞌñenä «gi mahu̱», di signifika ge pe̱ꞌtsi te hingä tsayahu̱ ꞌne gä sigi gä jahu̱ nunä ꞌme̱fi. ¡Di rꞌakägihe ndunthi rä johya gä handihe hängu bi mpe̱fi yä de̱ni rä Kristo ha näꞌä rä je̱ya bi thogi! Otho rä duda ge Jeoba di jäpi gatꞌho näꞌä xä tꞌo̱tꞌe pa dä tꞌungä ntꞌo̱de de rä Tsꞌu̱tꞌhui Äjuä po gatꞌho rä Xiꞌmhai (Mar. 13:10).

Xi ndunthi yä jäꞌi nuꞌu̱ thädi xä ñho ora tꞌuti de rä Noya Äjuä. Näꞌä je̱ya bi thogi, bi zo̱te 8.340.847 yä publikador ꞌne bi tꞌuni 10.115.264 yä estudio tatꞌä zänä. ¡Otho rä duda ge hingi tsaya näꞌä rä däta tsanza di yꞌe̱tꞌi rä Zi Dada Jeoba, ꞌne nuꞌähu̱ ꞌnehe, gi udihu̱ ge hingi tsayahu̱! Ya kohi xi tsꞌu̱tho yä pa, hänge änte de dä gotꞌi Jeoba näꞌä rä goxthi tsitsꞌi ha rä te, sigi gi pe̱fihu̱ näꞌä rä hogä ꞌme̱fi gi jahu̱.

Xa rä ntso̱hui nunä testo bi thahni pa nunä rä je̱ya 2017 habu̱ enä: «Pe̱ꞌspäbi rä jamfri Jeoba ꞌne pe̱fi näꞌä xä ñho» (Sal. 37:3). Ora gi jamäsuhu̱ nuya yä noya ꞌne gi o̱tꞌehu̱ näꞌä xä ñho nuꞌmu̱ gi pe̱päbihu̱ Jeoba, gi udihu̱ ge gi pe̱ꞌspäbihu̱ ndunthi rä komfiansa. Po rä mäte ¡ogi mbenihu̱ ge gi ꞌmu̱se̱hu̱! Nzäntho xtä handihu̱ ge mäjuäni näꞌä rä promesa bi ja rä Hesu ora bi ꞌñenä: «¡Hyanthu̱!, di ꞌmu̱i kongeꞌähu̱ gatꞌho yä pa asta xti zo̱ho̱ rä fin de nuꞌu̱ yä tsꞌo tꞌo̱tꞌe ja ha rä xiꞌmhai» (Mat. 28:20).

Ogi dudahu̱ ge Jeoba ma dä sigi dä jäpi näꞌä ri ꞌme̱fi gi jahu̱. Hindi mporta mu̱ gi unihu̱ tsꞌu̱tho o ndunthi, mu̱ gi unihu̱ gatꞌho näꞌä tsu̱ꞌähu̱ ꞌne ko ngatꞌho ri korasohu̱, Jeoba di numäñho ꞌne gi japhu̱ dä johya rä koraso (2 Cor. 9:6, 7). Sigi gi kuatꞌihu̱ kongeꞌä po mäde de gi xatuäbihu̱, gi nxadihu̱ rä Mäkä Tꞌofo, gi ntinihu̱ ha yä mhuntsꞌi ꞌne gi uñhu̱ ntꞌo̱de rä Noya Äjuä.

Rä Zithu «pädi ge tsꞌu̱tho yä pa» kohibi, hänge näꞌä usa gatꞌho näꞌä o ha rä yꞌe̱ pa dä jakägihu̱ gä ꞌuengihu̱ de rä ꞌñuu Jeoba (Rev. 12:12). Pe mu̱ hingä he̱gihu̱ Jeoba, rä Zithu nunka ma dä za dä ꞌuegägihu̱ de geꞌä (Sal. 16:8). Po rä mäte ¡ogi pumfrihu̱ hängu di mäꞌähe! Pädihu̱ ꞌnehe ge xa di jamädiꞌihe po gatꞌho näꞌä gi pe̱fihu̱ po rä Tsꞌu̱tꞌhui Äjuä ha nuya yä gäxä pa.

Ri kuhu̱,

Rä Cuerpo Gobernante de yä Testigo rä Jeoba