MÄ MꞌU̱IHU̱ NGU YÄ KRISTIANU

Tini rä johya de gi ungä ntꞌo̱de rä Noya Äjuä

¿Di jaꞌi xä ñhei gi po̱ni gi ungä ntꞌo̱de rä Noya Äjuä? Mu̱ hää, hingä ho̱nse̱ꞌi. Ndunthi de gekhu̱ di jakägihu̱ xä ñhei, ngeꞌä di tsuhu̱ o di ntsahu̱ gä ñähu̱ ko yä jäꞌi, o ngeꞌä yä jäꞌi hingi ne dä yꞌo̱de ꞌne di nkue̱tho, ꞌne rꞌabu̱ geꞌä hägähu̱ rä johya. Pe nuju̱ di pe̱phu̱ nꞌa rä Zi Dada de gä johya, ꞌne näꞌä ne ge gä pe̱päbihu̱ ko rä johya (Sl 100:2; 1Ti 1:11). ¿Te mä raso di pe̱ꞌtsihu̱ pa gä uñhu̱ ntꞌo̱de ko rä johya?

Nꞌaa, mähyoni gä beñhu̱ ge nuju̱ di uñhu̱ ntꞌo̱de yä hogä noya de gä humu̱i. Mäpaya, yä jäꞌi hinte mä humu̱i pe̱ꞌtsi, pe nuju̱ dä za gä ñuꞌspäbihu̱ yä koraso de gä johya ko nuꞌu̱ «yä rꞌayꞌo hogä noya de nꞌa rä tꞌo̱tꞌe xa mähotho» (Isa 52:7). Nuꞌu̱ yä hogä noya de rä Tsꞌu̱tꞌhui Äjuä, ꞌnehe dä za dä hänkägihu̱ ndunthi rä johya. Hänge änte de gä po̱ñhu̱ gä uñhu̱ ntꞌo̱de, mähyoni gä beñhu̱ nuꞌu̱ yä jäpi ma dä hä rä Tsꞌu̱tꞌhui Äjuä.

Yoho, nuꞌu̱ yä hogä noya di uñhu̱ ntꞌo̱de, fatsꞌi yä jäꞌi pa dä me̱ꞌtsi nꞌa rä hogä ntsitsꞌi ko Äjuä. Ndunthi de geꞌu̱ xä paati yä mꞌu̱i, xä hye̱pu̱ yä bisio ꞌne nubye̱ pe̱ꞌtsi rä humu̱i de dä mꞌu̱i pa nzäntho (Isa 48:17, 18; Ro 1:16). Imäjinä ge xä nja nꞌa rä mbiꞌmhai o mä nꞌa rä däta tsꞌo thogi ꞌne xä thuxꞌäꞌi pa gi ju̱ki nuꞌu̱ yä jäꞌi xä ntsꞌe̱ꞌmi. Pe xiꞌmu̱ rꞌa yä jäꞌi hingi ne toꞌo dä matsꞌi, ¿ho̱nse̱ po geꞌä ma gi hye̱gi de gi hyoni nuꞌu̱ yä jäꞌi hää honi rä mfatsꞌi? (Mt 10:11-14.)

Hñuu, gehnä mänꞌa rä däta raso: ora di uñhu̱ ntꞌo̱de nuꞌu̱ yä hogä noya, di eꞌspäbihu̱ rä nsu Jeoba, ꞌne näꞌä xa di numäñho ora di jahu̱ nunä ꞌme̱fi (Isa 43:10; Heb 6:10). Jeoba ꞌnehe di rꞌakhu̱ rä espiritu santo pa gä kumplihu̱ ko nunä ꞌme̱fi, ꞌne pa gä tinihu̱ rä johya ora di uñhu̱ ntꞌo̱de (Gál 5:22). Ko rä mfatsꞌi Jeoba, ¡hinte ma dä hyu̱gägihu̱ de gä uñhu̱ ntꞌo̱de ko ndunthi rä balo! (Hch 4:31.) Hänge hindi mporta hanja dä dädi yä jäꞌi, ¡nuju̱ ma gä uñhu̱ ntꞌo̱de ko ndunthi rä johya! (Eze 3:3.)

Yoho yä hmi ha rä tꞌungä ntꞌo̱de—nꞌa de gä johya ꞌne näꞌä mänꞌaa hingä de gä johya — ¿Konte mä mfeni gi hohmä gi po̱ni gi ungä ntꞌo̱de? ¿Hanja dä za gi ꞌñudi ge gi pe̱ꞌtsi rä johya ora gi po̱ni gi ungä ntꞌo̱de?

HYANDIHU̱ RÄ BIDEO ¿TE BI MAXKÄGI PA DÄ TINI MÄNꞌAKI RÄ JOHYA DE GÄ PE̱PÄBI JEOBA? MꞌE̱FA THÄDIHU̱ NUYA YÄ NTꞌANI:

Mäske di uñhu̱ ntꞌo̱de ndunthi yä ora tatꞌä zänä, ¿por hanja xa mähyoni gä nxadihu̱ rä Noya Äjuä ꞌne gä ntso̱ꞌmihu̱ näꞌä di hetihu̱?
¿Hanja dä za gä de̱mbäbihu̱ rä ejemplo María?
¿Te gi pe̱fi pa gi ju̱ki rä tiempo pa gi ntso̱ꞌmi näꞌä gi heti de rä Mäkä Tꞌofo?
¿Ndaꞌä mänꞌa gi ho ora gi ungä ntꞌo̱de rä Noya Äjuä?