RÄ LECCIÓN 18

Fatsꞌi dä ntiende rä imformasion

1 Cor. 9:19-23, TNM

NÄꞌÄ MÄHYONI GI PE̱FI: Japäbi dä ntso̱ꞌmi nuꞌu̱ toꞌo o̱xꞌäꞌi ꞌne dä senti ge näꞌä bi bädi ma dä benefisiabiꞌu̱.

Yꞌo̱tꞌe ngue̱nda näꞌä ya pädi nuꞌu̱ toꞌo o̱xꞌäꞌi. En lugar de ho̱nse̱ gi repeti näꞌä rä imformasion ya pädiꞌu̱, nubye̱ esplikabi de mä nꞌa rä forma.

Ogi dedika ndunthi rä tiempo pa gi esplika näꞌä rä imformasion ya pädi nuꞌu̱ toꞌo o̱xꞌäꞌi. Mänꞌa dä hogi gi usa rä tiempo pa gi esplika nuꞌu̱ yä tꞌo̱tꞌe hingi pädiꞌu̱.
ꞌUeke rä tiempo pa gi imbestiga ꞌne gi ntso̱ꞌmi. Pa gi esplika nꞌa rä punto näꞌä xa mähyoni, dä za gi no̱ni yä rꞌayꞌo detalle o nꞌa rä notisia näꞌä ja getya bi thogi. Mbeni xä ñho hanja ma gi esplika näꞌä rä punto gi ne gi trata ꞌne hanja di nthe̱ ko nuꞌu̱ yä detalle ma gi uni.

Ora gi ñhoki ko rä imformasion, ñꞌanise̱: «¿Por hanja?, ¿hämꞌu̱?, ¿habu̱?, ¿hanja?, ꞌne ¿toꞌo?». Mu̱ ya gä ñhoki njabu̱, nubye̱ xki uni ri discurso dä za gi yꞌo̱tꞌe rꞌa de nuya yä ntꞌani ꞌne gi umbäbi yä mpengi.
ꞌÑudi hanja dä aplika rä imformasion. Esplikabi nuꞌu̱ toꞌo o̱xꞌäꞌi hanja ma dä benefisiabi nuꞌu̱ yä tsꞌofo hutsꞌi ha rä Mäkä Tꞌofo mu̱ dä aplika ha yä mꞌu̱i. Hñuxä rꞌa yä ejemplo de hämꞌu̱, habu̱ o hanja dä za dä aplika nuꞌu̱ yä tsꞌofo.