¿Kamfri yä testigo rä Jeoba ge ho̱nse̱ꞌu̱ pe̱ꞌtsi rä relijion näꞌä xa mäjuäni?

Nuꞌu̱ pe̱ꞌtsi nꞌa rä relijion, mähyoni dä gamfri ge Äjuä ꞌne rä Hesu hää di handi xä ñho näꞌä relijion. Mu̱ hinä, ¿por hanja xä huahni näꞌä relijion?

Ñhesukristo hingä mi mbeni ngu nuꞌu̱ mi kamfri ge ja ndunthi yä ꞌñuu o yä relijion nuꞌu̱ dä za dä ñämbäbi yä te yä jäꞌi. Rä Hesu bi ꞌñenä: «Pe xi xä ntsꞌiꞌmi näꞌä rä goxthi habu̱ ku̱tꞌi nuꞌu̱ toꞌo ri ma ha rä te, ꞌne näꞌä rä ꞌñuu de näꞌä rä goxthiꞌä xi rä ntsꞌiꞌmi, ha tsꞌu̱tho nuꞌu̱ toꞌo ku̱tꞌi ha näꞌä rä goxthiꞌä» (Mateo 7:14). Yä testigo rä Jeoba di kamfrihe ge xtä tinihee nunä ꞌñuu. Ngeꞌä mu̱ hingä di njabu̱, zäi ge xtä honihe mä nꞌa rä relijion.