RÄ LECCIÓN 28
Balora näꞌä bi me̱fi Jeoba ꞌne rä Hesu po geꞌi
¿Gi beni te gä senti ora nꞌa ri amigo bi rꞌaꞌi nꞌa rä regalo näꞌä xa gä ho? Zäi ge xa gä johya ꞌne gä umbäbi njamädi näꞌä ri amigo. Njabu̱ ꞌnehe, rä Zi Dada Jeoba ꞌne rä Hesu, xä rꞌakägihu̱ nꞌa rä däta regalo näꞌä nunka toꞌo ma dä za dä rꞌakägihu̱. ¿Gi pädi te mä regaloꞌä? ¿Hanja dä za gä udihu̱ ge xa di jamädihu̱ po näꞌä regalo?
1. ¿Hanja debe gä udihu̱ ge di balorahu̱ näꞌä xä me̱fi rä Zi Dada Jeoba ꞌne rä Hesu po gekhu̱?
Rä Biblia di promete ge «toꞌo dä me̱ꞌspäbi rä jamfri» rä Hesu, ma dä me̱ꞌtsä rä te pa nzäntho (Juan 3:16, TNM). ¿Te di signifika gä kamfrihu̱ rä Hesu? Hingä ho̱nse̱ di debe gä pädihu̱ toꞌoꞌä o gä kamfrihu̱ ge ꞌmu̱i. ꞌNehe pe̱ꞌtsi te gä udihu̱ ge di pe̱ꞌspäbihu̱ rä komfiansa ko näꞌä di pe̱fihu̱ (Santiago 2:17, TNM). Mu̱ ko näꞌä di mäñhu̱ ꞌne ko näꞌä di pe̱fihu̱ di udihu̱ ge xa mäjuäni di pe̱ꞌspäbihu̱ rä komfiansa rä Hesu, geꞌä ma dä maxkägihu̱ dä ze̱di mä ntsitsꞌihu̱ kongeꞌä ꞌne ko rä Zi Dada Jeoba (hñeti Juan 14:21).
2. ¿Te mä nꞌa dä hogi gä pe̱fihu̱ pa gä udihu̱ ge di jamädibihu̱ rä Zi Dada Jeoba ꞌne rä Hesu po näꞌä bi me̱fi po gekhu̱?
Näꞌä xui änte de xä du rä Hesu, bi ꞌñuti nuꞌu̱ yä apostol mä nꞌa rä forma de hanja mi debe dä ꞌñudi rä jamädi. Rä Biblia enä ge rä Hesu bi muntsꞌi nuꞌu̱ yä apostol ꞌne bi ja näꞌä rä fenäte tꞌembäbi «rä Mäkä Ntꞌoxi», ꞌnehe fädi ngu rä Fenäte de rä du rä Kristo (1 Corintios 11:20, TNM). Dende näꞌä je̱yaꞌä pa ndelante, gatꞌho nuꞌu̱ xa mäjuäni yä kristianu nubye̱ pe̱ꞌtsi te ma xä beni ge rä Hesu bi uni rä te po gatꞌho yä jäꞌi. Mi ja nunä Fenäte, rä Hesu bi ꞌñenä: «Sigi gi yꞌo̱thu̱ njaua ngu nꞌa rä fenäte de gekägi» (Lucas 22:19, TNM). Ora gi ntini ha nunä Fenäte, gi udi hängu gi jamädibi rä Zi Dada Jeoba ꞌne rä Hesu po näꞌä rä mhäte xä ꞌñudi po gekhu̱.
HANJA DÄ ZA DÄ MAXꞌÄꞌI RÄ NOYA ÄJUÄ
Ma gä handihu̱ hanja dä za gä udihu̱ ge di balorahu̱ näꞌä rä mhäte xä ꞌñudi rä Zi Dada Jeoba ꞌne rä Hesu po gekhu̱. ꞌNehe, ma gä handihu̱ por hanja xa mähyoni gä ntinihu̱ ha näꞌä rä Fenäte de rä du rä Kristo.
3. Udi ge gi jamädi ko näꞌä gi pe̱fi
Imäjinä ge gä tagi ha nꞌa rä däta mothe. Pe nꞌa rä jäꞌi, nguntꞌä bi gu̱kꞌäꞌi pa hingä jätꞌi. ¿Ma gi pumfri näꞌä bi me̱fi näꞌä jäꞌi po geꞌi?, o ¿ma gi hyoni hanja gi umbäbi njamädi ngeꞌä bi salba ri bida?
Kada nꞌa de gekhu̱, di tupäbihu̱ mä tehu̱ rä Zi Dada Jeoba. Hñetihu̱ 1 Juan 4:8-10, TNM, ꞌnepu̱ thädihu̱ nuya yä ntꞌani:
¿Por hanja näꞌä rä te bi uni rä Hesu xi nꞌa rä däta regalo pa kada nꞌa de gekhu̱?
¿Te gi senti nubye̱ gi pädi näꞌä bi me̱fi rä Zi Dada Jeoba ꞌne rä Hesu po geꞌi?
¿Hanja dä za gä udihu̱ ge di balorahu̱ näꞌä xä me̱fi rä Zi Dada Jeoba ꞌne rä Hesu po gekhu̱? Hñetihu̱ 2 Corintios 5:15, TNM, 1 Juan 4:11, TNM ꞌne 5:3, TNM. Mꞌe̱fa de gi hñetihu̱ kada nꞌa de nuya yä testo, thädihu̱ nunä rä ntꞌani:
Ja ngu dä handihu̱ ha nuya yä testo, ¿te dä za gä pe̱fihu̱ pa gä udihu̱ ge di jamädihu̱?
4. De̱mbäbi rä mꞌu̱i rä Hesu
Gä de̱mbäbihu̱ rä mꞌu̱i rä Hesu, geꞌä mä nꞌa rä forma de hanja gä udihu̱ ge di jamädihu̱. Hñetihu̱ 1 Pedro 2:21, TNM, ꞌnepu̱ thädihu̱ nunä rä ntꞌani:
¿Hanja dä za gi de̱mbäbi yä paso rä Hesu?
Rä Hesu bi ꞌñudi ge xa mi mädi rä Noya Äjuä, ge xa mi ho dä predika ꞌne dä matsꞌi yä jäꞌi.
5. Ntini ha näꞌä rä Fenäte de rä du rä Kristo
Pa gi pädihu̱ te bi thogi durante näꞌä rä mu̱di Mäkä Ntꞌoxi bi ja rä Hesu, hñetihu̱ Lucas 22:14, 19, 20, TNM. ꞌNepu̱ thädihu̱ nuya yä ntꞌani:
¿Te bi thogi ha näꞌä rä Mäkä Ntꞌoxi bi ja rä Hesu?
¿Te ri bo̱ni rä thuhme ꞌne rä binu? (Hyandihu̱ mänꞌaki yä versículo 19 ꞌne 20).
¿Te signifika nuꞌmu̱ rä Hesu bi ꞌñenä «sigi gi yꞌo̱thu̱ njaua ngu nꞌa rä fenäte de gekägi»? Signifika ge rä Hesu mi ne ge nunä Fenäte, dä tꞌo̱tꞌe tatꞌä je̱ya ora tagi näꞌä rä fecha. Po rängeꞌä, yä testigo rä Jeoba o̱tꞌe nunä Fenäte tatꞌä je̱ya, ꞌne di ja ngu bi ꞌñudi rä Hesu. Pa gi pädi hanja di tꞌo̱tꞌe yꞌe̱ntsꞌihu̱ rä BIDEO. ꞌNepu̱ thädihu̱ nunä rä ntꞌani:
¿Hanja di tꞌo̱tꞌe näꞌä rä Fenäte de rä du rä Kristo?
Rä thuhme signifika näꞌä rä ndoyꞌo nsi rä pekado bi uni Ñhesukristo po gekhu̱. Rä binu signifika näꞌä rä ji bi fani po gekhu̱.
RꞌA YÄ JÄꞌI ENÄ: «Ko ho̱nse̱ gi kamfri rä Hesu ꞌne kongeꞌä gi salba».
¿Hanja dä za gi usa Juan 3:16 ꞌne Santiago 2:17 pa gi ꞌñuti näꞌä jäꞌi ge hingä kombasta gä mäñhu̱ ge di kamfrihu̱ rä Hesu?
NÄꞌÄ DÄ PÄDIHU̱
Pa gä udihu̱ ge di balorahu̱ näꞌä bi me̱fi rä Hesu po gekhu̱, mähyoni gä udihu̱ ko näꞌä di pe̱fihu̱ ge xa mäjuäni di pe̱ꞌspäbihu̱ rä komfiansa, ꞌne gä ntinihu̱ ha näꞌä rä Fenäte de rä du di tꞌo̱tꞌe tatꞌä je̱ya.
Pa gä benihu̱
¿Hanja ma dä ꞌñudi nꞌa rä jäꞌi ge xa mäjuäni kamfri rä Hesu?
¿Hanja gi hohmä gi jamädibi rä Zi Dada Jeoba ꞌne rä Hesu po näꞌä bi me̱fi po geꞌi?
¿Por hanja xa mähyoni gä ntinihu̱ ha näꞌä rä Fenäte de rä du rä Kristo?
HABU̱ DÄ ZA GI PÄDI MÄ NꞌA TU̱I
Ora di pädihu̱ ge rä Kristo bi uni rä te po gekhu̱, ¿te di animägihu̱ gä pe̱fihu̱?
Näꞌä bi me̱fi rä Hesu ko rä te ꞌne rä ndoyꞌo, bi ꞌñeꞌspäbi rä nsu rä Zi Dada Jeoba (9:28)
Pädi mä nꞌa tu̱i te di signifika gä pe̱ꞌspäbihu̱ rä jamfri Äjuä.
«¿Te ri bo̱ni gä pe̱ꞌspäbihu̱ rä jamfri rä Zi Dada Jeoba?» (La Atalaya, octubre de 2016)
Ha rä esperiensia «Nubye̱ hää di senti ge di te ꞌne xä ntꞌaxigi», hyandi hanja nꞌa rä zi ꞌme̱hñä bi paati rä mꞌu̱i, nuꞌmu̱ bi bädi hanja Ñhesukristo bi uni rä te po kada nꞌa de gekhu̱.
«Rä Mäkä Tꞌofo bi patuäbi yä mꞌu̱i» (La Atalaya, 1 de agosto de 2011)
Pädi por hanja hingä gatꞌho yä jäꞌi tsi rä thuhme ꞌne rä binu ora di tꞌo̱tꞌe näꞌä rä Fenäte de rä du rä Hesu.