Rä ntheke 12
Ma gä handihu̱ ko rä tꞌekꞌei rä te ꞌne rä ji
¿Hanja ri ꞌñehe gä handihu̱ rä te? (1)
¿Hanja handi Äjuä nuꞌu̱ toꞌo ho̱mi yä bätsi? (1)
¿Hanja udi yä gamfri ge tuyämu̱i po dä su yä te? (2)
¿Xä ñho gä hohu̱ yä zuꞌue? (3)
¿Te mä tꞌo̱tꞌe di ꞌme̱ꞌtuäbi rä tꞌekꞌei rä te? (4)
¿Hanja handi Äjuä rä ji ꞌne te mä mhända xä uni? (5)
¿Xä ñho gä xitꞌä rä ji ha mä ndoyꞌohu̱? (6)
1. Jeoba Geꞌä uni rä te. Gatꞌho näꞌä ꞌmu̱i ha rä xiꞌmhai tupäbi rä te Äjuä (Salmo 36:9). Äjuä handi xä nsunda rä te. Pa Jeoba ja ndunthi rä muui, asta rä te nꞌa rä zi bätsi näꞌä odä ha rä mu̱i rä nänä. Hänge rä Zi Dada hingi handi xä ñho nuꞌu̱ toꞌo ho̱mi yä bätsi (Éxodo 21:22, 23; Salmo 127:3).
2. Nuꞌu̱ xa mäjuäni yä de̱ni rä Hesu, tuyämu̱i po dä su yä te. Hänge di su yä bo̱jä ꞌne yä nguu pa hindä nja yä nthogi (Deuteronomio 22:8). Nuꞌu̱ pe̱päbi Äjuä, di su yä te ꞌne yä nzaki. Hänge hingi ku̱tꞌi ha yä ntꞌeni de gä tuhni pa hinte dä ja ha nixi te dä yꞌo̱ꞌtuäbi märꞌaa. Hingi handi ha nixi ñꞌeni habu̱ di neki yä tuhni (Salmo 11:5; Juan 13:35).
3. Äjuä ꞌnehe handi xä nsunda yä te yä zuꞌue. Yä jäꞌi hää dä za dä hyo nuꞌu̱ yä zuꞌue di ñꞌoui yä ñheni o nuꞌu̱ tsate. ꞌNehe dä za dä hyo yä zuꞌue pa dä zipä yä ngo̱ o pa dä hyoki yä hee (Génesis 3:21; 9:3; Éxodo 21:28). Pe hinxä ñho to dä mu̱ni o dä hyo yä zuꞌue ho̱nse̱ pa dä ñꞌeni o de gä nduxte (Proverbios 12:10).
4. Nuꞌu̱ xa mäjuäni yä de̱ni rä Hesu hingi tsi yä yꞌu̱i ha nixi yä droga. Nuya yä tꞌo̱tꞌe hinxä ñho ngeꞌä 1) japi yä jäꞌi dä gu̱ rä bisio, 2) tsꞌonduäbi yä ndoyꞌo yä jäꞌi ꞌne 3) pa Äjuä hingi tꞌaxi nuya yä tꞌo̱tꞌe (Romanos 6:19; 12:1; 2 Corintios 7:1). Nuꞌu̱ to pe̱ꞌtsi nuya yä bisio, rꞌabu̱ xä ñhei dä zopu̱, pe mu̱ di ne gä johyabihu̱ rä mfeni Jeoba, pe̱ꞌtsi te gä ꞌuegehu̱ de geꞌu̱.
5. Äjuä ꞌnehe handi xä nsunda rä ji. Näꞌä mää ge ha rä ji, ja bi eheni rä te. Hänge hinxä ñho dä tsꞌi yä ji. Hinxä ñho dä tsꞌipäbi rä ngo̱ nꞌa rä zuꞌue mu̱ hinxä po̱mbäbi xä ñho rä ji, mu̱ xä du ha nꞌa rä trampa o mu̱ toꞌo bi miꞌtuäbi rä yꞌu̱ga pa bi hyo. Pe mu̱ bi tho ko nꞌa rä nsu̱ni o bri kꞌahni ko nꞌa rä nzafi, mähyoni gä dämä po̱mbäbihu̱ rä ji pa njabu̱ dä za dä tsꞌi näꞌä rä ngo̱ (Génesis 9:3, 4; Levítico 17:13, 14; Hechos 15:28, 29).
6. ¿Xä ñho gä xitꞌä yä ji ha mä ndoyꞌohu̱? Beni ge Jeoba di mändagihu̱ gä pe̱ꞌtsuäbihu̱ rä tꞌekꞌei rä ji. Nunä ꞌnehe ri bo̱ni ge hingi ho gä xitꞌä ha mä ndoyꞌohu̱ rä ji de mänꞌa rä jäꞌi, ha nixi xä ñho dä thäbgä mä jihu̱ pa dä yo sitkähu̱ (Hechos 21:25). Hänge nuꞌu̱ mäjuäni yä de̱ni rä Hesu, hingi ne dä siꞌtuäbi yä ji ha yä ndoyꞌo. Pe häni märꞌa yä ꞌñethi nuꞌu̱ hingi ñꞌoui rä ji. Di mädi yä nzaki ha honi dä mꞌu̱i, pe ꞌnehe di mädi Äjuä hänge o̱tuäbi yä mhända (Mateo 16:25).
[Yä kꞌoi ha rä nxii 25]
Pa gä johyabihu̱ rä mfeni Äjuä, mähyoni hingä xitꞌä yä ji ha mä ndoyꞌohu̱, gä ꞌuegehu̱ de yä bisio ꞌne gä su mä tehu̱