Rä ntheke 13
Hanja dä za gi pädi ndañꞌä näꞌä rä jamfri xa mäjuäni
¿Di ho Äjuä gatꞌho yä jamfri o yä ntꞌeme o se̱he̱ nꞌatho? (1)
¿Por hanja ja ndunthi yä jamfri nuꞌu̱ mää ge di de̱ni rä Hesu? (2)
¿Hanja dä za gi pädi toꞌo nuꞌu̱ xa mäjuäni yä de̱ni rä Hesu? (3-7)
1. Rä Hesu bi zogi se̱he̱ nꞌatho rä jamfri o ntꞌeme näꞌä xa mäjuäni. Hänge mäpaya pe̱ꞌtsi di ja se̱he̱ nꞌatho rä jamfri näꞌä xa mäjuäni di xo̱kämbeni Jeoba (Juan 4:23, 24; Efesios 4:4, 5, NM). Rä Mäkä Tꞌofo udi ge tsꞌu̱tho nuꞌu̱ yä jäꞌi yꞌo ha näꞌä rä ntsꞌintꞌñu tsitsꞌi ha rä te (Mateo 7:13, 14, NM).
2. Ja ngu xki mängä rä Mäkä Tꞌofo, mꞌe̱fa de bi du yä apostol, rꞌamätsꞌu̱ bi yu̱tꞌi yä ntꞌudi ꞌne yä nzäi nuꞌu̱ hingä mäjuäni ha näꞌä rä mhuntsꞌi bi zogi rä Hesu. Rꞌa yä ñꞌo̱ho̱ bi ꞌueke nuꞌu̱ yä gamfri pa njabu̱ himbi sigi bi de̱ni rä Kristo (Mateo 7:15, 21-23, RN; Hechos 20:29, 30). Hänge mäpaya di handihu̱ ge ja ndunthi yä jamfri nuꞌu̱ mää ge di de̱ni rä Kristo. ¿Hanja dä za gi pädi toꞌo nuꞌu̱ xa mäjuäni yä de̱ni rä Hesu?
3. Näꞌä rä mhäte pe̱ꞌtsi nꞌa ngu mänꞌaa geꞌä nꞌa rä señä udi toꞌo xa mäjuäni yä de̱ni rä Hesu (Juan 13:34, 35). Hinxä tꞌuti dä u̱tsa yä jäꞌi de märꞌa yä hnini ha nixi dä u̱tsa nuꞌu̱ yä zi ꞌmo jäꞌi o yä tꞌaxä jäꞌi. Xä tꞌuti dä mädi yä jäꞌi de gatꞌho yä hnini (Hechos 10:34, 35). Hänge porängeꞌä hingi ku̱tꞌi ha yä tuhni. Nuꞌu̱ mäjuäni yä de̱ni rä Hesu ꞌñenä go di nku (1 Juan 4:20, 21).
4. Nuꞌu̱ yä jäꞌi de näꞌä rä jamfri xa mäjuäni, ꞌnehe pe̱ꞌtsuäbi ndunthi rä tꞌekꞌei rä Mäkä Tꞌofo ngeꞌä kamfri ge näꞌä hutsꞌi geꞌä rä Noya Äjuä (Juan 17:17; 2 Timoteo 3:16, 17). Pa geꞌu̱ mänꞌa xä ñho dä yꞌo̱te rä Noya Äjuä ke nuꞌu̱ yä ntꞌudi ꞌne yä nzäi bi ehe de yä jäꞌi (Mateo 15:1-3, 7-9). O̱tꞌe ntsꞌe̱di pa dä me̱fi nzäntho ha yä mꞌu̱i nuꞌu̱ yä tsꞌofo hutsꞌi ha rä Mäkä Tꞌofo. Pe̱fi näꞌä uti märꞌa yä jäꞌi (Tito 1:15, 16).
5. Nuꞌu̱ yä jäꞌi de näꞌä rä jamfri xa mäjuäni di nsundabi rä thuhu Äjuä (Mateo 6:9). Rä Hesu bi ꞌñuti yä jäꞌi ge Jeoba, geꞌä rä thuhu Äjuä. Hänge nuꞌu̱ xa mäjuäni yä de̱ni rä Hesu geꞌä udi ꞌnehe (Juan 17:6, 26, NM; Romanos 10:13, 14, NM). ¿Xi ha gi ꞌmu̱i toꞌo nuꞌu̱ udi ndañꞌä rä thuhu Äjuä?
6. Nuꞌu̱ xa mäjuäni yä de̱ni rä Hesu pe̱ꞌtsi dä ungä ntꞌo̱de de rä Tsꞌu̱tꞌhui Äjuä ngu bi ja rä Hesu. Nzäntho bi mänduäbi rä Tsꞌu̱tꞌhui Äjuä (Lucas 8:1, RN). Bi mändabi nuꞌu̱ yä de̱ni ge ꞌnehe dä ungä ntꞌo̱de näꞌä rä noya ha gatꞌho rä Xiꞌmhai (Mateo 24:14; 28:19, 20, NM). Nuꞌu̱ xa mäjuäni yä de̱ni rä Hesu pädi ge se̱he̱ rä Tsꞌu̱tꞌhui Äjuä ma dä hä nꞌa rä hogä mꞌu̱i habu̱ di otho yä mbidi (Salmo 146:3-5).
7. Nuꞌu̱ xa mäjuäni yä de̱ni rä Hesu hingi pe̱fi nuꞌu̱ yä tsꞌo tꞌo̱tꞌe de nunä rä xiꞌmhai (Juan 17:16). Hingi ku̱tꞌi ha nuꞌu̱ yä tuhni di ja yä jäꞌi kontra yä tsꞌu̱tꞌhui. Hingi pe̱fi yä tsꞌo tꞌo̱tꞌe ha nixi pe̱ꞌtsi nuꞌu̱ yä tsꞌo mfeni di neki nuua ha rä xiꞌmhai (Santiago 1:27; 4:4). ¿ꞌMu̱i getbu̱ de ha ri ngu nꞌa rä jamfri näꞌä di ja gatꞌho näꞌä ri ꞌñepi dä me̱fi nuꞌu̱ xa mäjuäni yä de̱ni rä Hesu?
[Yä kꞌoi ha rä nxii 26 ꞌne 27]
Nuꞌu̱ xa mäjuäni yä de̱ni rä Hesu di mädi nꞌa ngu mänꞌaa, pe̱ꞌtsuäbi rä tꞌekꞌei rä Mäkä Tꞌofo ꞌne di ungä ntꞌo̱de de rä Tsꞌu̱tꞌhui Äjuä