Rä ntheke 7

Hanja ri ꞌñehe gä xatuäbihu̱ Äjuä

¿Por hanja mähyoni gä xatuäbihu̱ nzäntho Äjuä? (1)

¿Toꞌo gä xatuäbihu̱, ꞌne hanja gä jahu̱? (2, 3)

¿Te gä adihu̱ nuꞌmu̱ di xatuäbihu̱ Äjuä? (4)

¿Hämꞌu̱ mähyoni gi xatuäbi Äjuä? (5, 6)

¿O̱de Äjuä gatꞌho yä sadi? (7)

1. Rä sadi geꞌä nuꞌmu̱ di ñäꞌmehu̱ Äjuä ko rä tꞌekꞌei. Mähyoni gä xatuäbihu̱ nzäntho Äjuä. Mu̱ gä jahu̱ njabu̱, ma gä handihu̱ Äjuä ngu nꞌa mä hogä ntsitsꞌihu̱ näꞌä xa di mädihu̱. Mäske rä Zi Dada Jeoba rä dängi ꞌne ja ndunthi rä tsꞌe̱di, näꞌä o̱de mä sadihu̱. ¿Gi xatuäbi nzäntho Äjuä? (Salmo 65:2; 1 Tesalonicenses 5:17.)

2. Pa gä xo̱kämbenihu̱ Äjuä ngu ri ꞌñehe, ꞌnehe mähyoni gä xatuäbihu̱. Hänge ri ꞌñepi se̱he̱ rä Zi Dada Jeoba gä xatuäbihu̱. Mi mꞌu̱ rä Hesu nuua ha rä Xiꞌmhai, nzäntho bi xatuäbi se̱he̱ rä Dada, hinto mänꞌaa. Nuju̱ ꞌnehe mähyoni geꞌä gä pe̱fihu̱ (Mateo 4:10; 6:9). Nuꞌmu̱ di xatuäbihu̱ Äjuä, mähyoni gä jahu̱ ko rä thuhu rä Hesu. Njabu̱ di udihu̱ ge di pe̱ꞌtsuäbihu̱ rä tꞌekꞌei näꞌä rä nsu pe̱ꞌtsi rä Hesu ꞌne di kamfrihu̱ näꞌä rä te bi uni (Juan 14:6; 1 Juan 2:1, 2).

3. Mähyoni gä xatuäbihu̱ Äjuä ko ngatꞌho mä korasohu̱. Hingä mäñhu̱ nuꞌu̱ yä sadi xtä mepye̱hu̱ ha nixi nuꞌu̱ hutsꞌi ha yä he̱ꞌmi de gä sadi (Mateo 6:7, 8). Dä za gä hudihu̱, gä ꞌmaihu̱ o gä ndandiñähmuhu̱ pa gä xatuäbihu̱ Äjuä, pe nzäntho ko rä tꞌekꞌei, näꞌä rä ora ꞌne habu̱ go gi ne. Äjuä o̱de asta nuꞌu̱ yä sadi di jahu̱ ha mä mfenihu̱ (1 Samuel 1:12, 13). Rꞌabu̱ ꞌnehe xä ñho nꞌambu̱se̱ gä xatuäbihu̱ Äjuä habu̱ otho yä njohni (Marcos 1:35).

4. ¿Te dä za gi yꞌadi ha ri sadi? Dä za gä apäbihu̱ Äjuä gatꞌho näꞌä ma dä maxkägihu̱ pa gä pe̱ꞌtsihu̱ nꞌa rä hogä ntsitsꞌi kongeꞌä (Filipenses 4:6, 7). Nꞌa rä pa, rä Hesu bi ja nꞌa rä sadi habu̱ bi ꞌñutkägihu̱ ge mähyoni gä adihu̱ ge drä nsundabi rä thuhu Jeoba ꞌne dä ja rä bolunta ha rä Xiꞌmhai. ꞌNehe dä za gä apäbihu̱ ge hinte dä ꞌme̱tkägihu̱, dä punꞌgägihu̱ mä tsꞌokihu̱ ꞌne dä maxkägihu̱ pa gä ze̱tihu̱ yä tentasio (Mateo 6:9-13). Hinxä ñho gä adihu̱ yä tꞌo̱tꞌe xä ntsꞌo ha nixi gä adihu̱ nzäntho pa mä ñhose̱hu̱. Mähyoni gä adihu̱ se̱he̱ nuꞌu̱ yä tꞌo̱tꞌe di ho rä Zi Dada Jeoba (1 Juan 5:14).

5. Nzäntho dä za gi xatuäbi Äjuä pa gi umbäbi rä jamädi ꞌne pa gi nsundabi rä thuhu (1 Crónicas 29:10-13). Ogi pumfri gi xatuäbi Äjuä nuꞌmu̱ gi pe̱ꞌtsi yä xuñha (Salmo 55:22; 120:1). ꞌNehe xä ñho gä xatuäbihu̱ Äjuä änte ma gä ñunihu̱ (Mateo 14:19). Rä Zi Dada Jeoba di mbitagihu̱ ge gä xatuäbihu̱ «nzäntho» (Efesios 6:18).

6. Mu̱ gä o̱tꞌehu̱ nꞌa rä dängä tsꞌoki, mähyoni gä dämä xatuäbihu̱ Jeoba ꞌne gä bäntebihu̱ dä huegägihu̱ ꞌne dä punꞌgägihu̱. Äjuä ꞌmu̱i pa dä «ungä rä pumbäte» pe nuꞌmu̱ gä xipäbihu̱ näꞌä rä tsꞌoki xtä o̱tꞌehu̱ ꞌne gä o̱thu̱ ntsꞌe̱di pa hingä yo pe̱fihu̱ mänꞌaki (Salmo 86:5; Proverbios 28:13).

7. Rä Zi Dada Jeoba o̱de yä sadi se̱he̱ de nuꞌu̱ yä hojäꞌi. Pa dä yꞌo̱de Äjuä ri sadi, mähyoni ge nuꞌäge, gi yꞌo̱tꞌe ntsꞌe̱di pa gi pe̱fi ꞌne gi ꞌmu̱i ja ngu mängä ha Yä mhända (Proverbios 15:29; 28:9). Ogi ñꞌetsꞌi nuꞌmu̱ gi xatuäbi Äjuä (Lucas 18:9-14). Pe̱ꞌtsi gi pe̱fi ja ngu näꞌä gi adi ha ri sadi. Njabu̱ ma gi ꞌñudi ge gi kamfri o gi ñꞌeme Äjuä ꞌne ge gi xatuäbi ko ngatꞌho ri koraso. Se̱he̱ njabu̱, Äjuä ma dä dädi nuꞌu̱ ri sadi (Hebreos 11:6).