Rä ntheke 8

Nꞌa rä mꞌu̱i näꞌä di ho Äjuä

¿Te mä luga pe̱ꞌtsi nꞌa rä däme ha rä nguu? (1)

¿Hanja ri ꞌñepi rä däme dä su rä ꞌme̱hñä? (2)

¿Te ri ꞌñepi dä me̱fi nꞌa rä dada? (3)

¿Te ri ꞌñepi dä me̱fi nꞌa rä ꞌme̱hñä ha rä nguu? (4)

¿Te adi Äjuä de yä dada ꞌne de yä bätsi? (5)

¿Te mängä rä Mäkä Tꞌofo de nuꞌu̱ yä medinthäti di ñhe̱gi ꞌne de nuꞌu̱ di diborsia? (6, 7)

1. Rä Mäkä Tꞌofo mää ge rä däme geꞌä rä ñäxu de ha rä nguu (1 Corintios 11:3). Rä ñꞌo̱ho̱ nꞌatho rä ꞌme̱hñä dä me̱ꞌtsi, ha mähyoni dä nthäti ha yä mbo̱ho̱ (1 Timoteo 3:2; Tito 3:1).

2. Rä däme pe̱ꞌtsi dä mädi rä ꞌme̱hñä ja ngu di mädise̱. Mähyoni dä mädi rä ꞌme̱hñä ja ngu rä Hesu di mädi yä de̱ni (Efesios 5:25, 28, 29). Rä däme nunka ma dä me̱tꞌi ha nixi dä zani rä ꞌme̱hñä. Mähyoni dä numänsu ꞌne dä me̱ꞌtsuäbi rä tꞌekꞌei (Colosenses 3:19; 1 Pedro 3:7).

3. Rä dada pe̱ꞌtsi dä mpe̱fi pa dä umbäbi te dä zi, dä hyee ꞌne habu̱ dä mꞌu̱i rä ꞌme̱hñä ꞌne yä bätsi. ꞌNehe dä matsꞌi pa dä hñäni nꞌa rä mfädi de rä Zi Dada ꞌne de näꞌä ma dä me̱fi. Rä dada pe̱ꞌtsi go dä gu̱tꞌä rä ꞌñuu pa dä matsꞌi rä ꞌme̱hñä ꞌne yä bätsi dä me̱päbi Äjuä (1 Timoteo 5:8; Deuteronomio 6:4-9; Efesios 6:4).

4. Rä ꞌme̱hñä pe̱ꞌtsi dä maxä rä däme (Génesis 2:18). Pe̱ꞌtsi dä maxä rä däme pa dä ꞌñutä yä bätsi hanja dä mꞌu̱i (Proverbios 1:8). Rä Zi Dada apäbi rä ꞌme̱hñä dä su ko rä mhäte rä däme ꞌne yä bätsi (Proverbios 31:10, 15, 26, 27; Tito 2:4, 5). Rä ꞌme̱hñä pe̱ꞌtsi dä me̱ꞌtsuäbi ndunthi rä tꞌekꞌei rä däme (Efesios 5:22, 23, 33).

5. Äjuä di mändabi yä bätsi dä yꞌo̱tä yä dada ꞌne yä nänä (Efesios 6:1-3). ꞌNehe apäbi yä dada ge dä ꞌñutä yä bätsi ꞌne dä zu̱i habu̱ hingä geꞌä pe̱fi. Yä dada pe̱ꞌtsi dä ꞌueke rä luga pa yä bätsi ꞌne dä nxadi rä Mäkä Tꞌofo kongeꞌu̱ pa njabu̱ dä bädi Äjuä. ꞌNehe mähyoni yä dada dä umbä rä mhäte, dä jamäsu ꞌne dä bädi te mä dumu̱i thogi (Deuteronomio 11:18, 19; Proverbios 22:6, 15). Nunka ma dä me̱tꞌi ha nixi dä zu̱i ntsꞌe̱di yä bätsi (Colosenses 3:21).

6. Mu̱ yä medinthäti hindi ntsitsꞌi xä ñho, pe̱ꞌtsi dä hyoni nuꞌu̱ yä tsꞌofo ungä rä Mäkä Tꞌofo. Rä Mäkä Tꞌofo di mändagihu̱ gä unihu̱ rä mhäte ꞌne rä pumbäte (Colosenses 3:12-14). Rä Mäkä Tꞌofo hingi mää ge yä medinthäti dä ñhe̱gi nuꞌmu̱ pe̱ꞌtsi yä tꞌu̱kä xuñha. Pe rꞌabu̱ rä ꞌme̱hñä dä za dä ꞌuege de rä däme mu̱ 1) xa hingi ne dä mpe̱fi pa dä umbi te dä zi, te dä hyee ꞌne habu̱ dä mꞌu̱i rä ꞌme̱hñä, 2) näꞌä rä däme fe̱tꞌi rä ꞌme̱hñä ꞌne ꞌmu̱i dä hyo o 3) mu̱ xa rä tsꞌomꞌu̱i ꞌne häkuäbi dä me̱päbi rä Zi Dada Jeoba (1 Corintios 7:12, 13).

7. Yä medinthäti hindä me̱ꞌtsi märꞌa yä mengu. Toꞌo xä nthäti ꞌne ähui märꞌa yä jäꞌi, pe̱fi nꞌa rä dängä tsꞌoki xi xä ntsꞌo kontra Äjuä ꞌne kontra näꞌä toꞌo xä nthätui (Hebreos 13:4). Mu̱ nꞌa rä medinthäti bi ñꞌähui mänꞌa rä jäꞌi, rä Mäkä Tꞌofo mää ge se̱he̱ geꞌmu̱, näꞌä rä däme o näꞌä rä ꞌme̱hñä hinte mä tsꞌoki bi du, dä za dä diborsia ꞌne mꞌe̱fa mu̱ ne dä za dä nthäti mänꞌaki (Mateo 19:6-9; Romanos 7:2, 3). Jeoba di u̱tsa ndunthi dä hyandi ge rꞌabu̱ otho nꞌa rä dängä tsꞌoki, ha yä medinthäti he̱pu̱ yä däme o yä ꞌme̱hñä pa dä me̱ui o dä nthätui mänꞌa rä jäꞌi (Malaquías 2:14-16).

[Yä kꞌoi ha rä nxii 16 ꞌne 17]

Äjuä to̱ꞌmi ge yä dada dä ꞌñutä yä bätsi ꞌne dä zu̱i habu̱ hingä geꞌä pe̱fi

[Nꞌa kꞌoi ha rä nxii 17]

Nꞌa rä hogä däme umbi te dä zi, te dä hyee ꞌne fatsꞌi rä ꞌme̱hñä ꞌne yä bätsi dä nxadi rä Mäkä Tꞌofo