Rä ntheke 9

Nuꞌu̱ yä jäꞌi pe̱päbi Äjuä pe̱ꞌtsi dä mꞌu̱i xä ntꞌaxi

¿Por hanja mähyoni di tꞌaxi gatꞌho näꞌä di pe̱fihu̱? (1)

¿Te ri bo̱ni nꞌa rä ntꞌeme o nꞌa rä jamfri näꞌä xä ntꞌaxi? (2)

¿Por hanja mähyoni di tꞌaxi gatꞌho mä mꞌu̱ihu̱? (3) ¿mä mfenihu̱? (4)

¿mä ndoyꞌohu̱, mä dutuhu̱ ꞌne mä nguhu̱? (5)

¿Te mä noya hinxä ñho gä mäñhu̱? (6)

1. Rä Zi Dada Jeoba näꞌä xä mäkä ntꞌaxi. Hänge näꞌä to̱ꞌmi ge gä xo̱kämbenihu̱ ja ngu mängä ha rä Mäkä Tꞌofo. Gä pe̱ꞌtsihu̱ xä ntꞌaxi gatꞌho mä mꞌu̱ihu̱, mä mfenihu̱, mä ndoyꞌohu̱, mä dutuhu̱ ꞌne mä nguhu̱ (1 Pedro 1:16). Pe̱ꞌtsi gä o̱thu̱ ntsꞌe̱di pa gä mꞌu̱ihu̱ xä ntꞌaxi ja ngu di ho Äjuä. Di ꞌmu̱ihu̱ ha nꞌa rä xiꞌmhai xi xä ntsꞌo. Ha nuju̱ di pe̱ꞌtsihu̱ rä tsꞌoki hänge xä ñhei gä pe̱fihu̱ näꞌä xä ñho. Pe mähyoni gä sigihu̱ gä o̱thu̱ ntsꞌe̱di.

2. Nꞌa rä ntꞌeme o nꞌa rä jamfri xä ntꞌaxi: Mu̱ di ne gä pe̱päbihu̱ rä Zi Dada Jeoba hinxä ñho gä mädihu̱ nuꞌu̱ yä ntꞌudi ꞌne yä nzäi de nuꞌu̱ yä jamfri hingä mäjuäni. ꞌNehe mähyoni gä po̱nihu̱ de nuꞌu̱ yä jamfri hingä mäjuäni ꞌne hinte mä mfatsꞌi gä umbäbihu̱ (2 Corintios 6:14-18; Apocalipsis 18:4). Mu̱ ya dä pädihu̱ näꞌä mäjuäni de rä Zi Dada Jeoba, pe̱ꞌtsi gä nsuhu̱ pa hindä kakhu̱ nuꞌu̱ toꞌo udi näꞌä hingä mäjuäni (2 Juan 10, 11).

3. Nꞌa rä ntꞌaxi ha gatꞌho mä mꞌu̱ihu̱: Jeoba to̱ꞌmi ge nuꞌu̱ mäjuäni yä gamfri dä ꞌñudi nzäntho nꞌa rä hogä mꞌu̱i (1 Pedro 2:12). Näꞌä handi gatꞌho näꞌä di pe̱fihu̱, asta näꞌä di pe̱fihu̱ nuꞌmu̱ hinto hanꞌgägihu̱ (Hebreos 4:13). Yä gamfri hingi pe̱fi nuꞌu̱ yä tsꞌo tꞌo̱tꞌe de nunä rä xiꞌmhai, hingi yꞌo de gä ꞌñätsa ko yä jäꞌi ha nixi ähui nꞌa rä jäꞌi mu̱ hinxä nthätui (1 Corintios 6:9-11, Ár ꞌRaꞌyo Nkohi Jö [RN]).

4. Nꞌa rä mfeni xä ntꞌaxi: Mu̱ di pe̱ꞌtsihu̱ yä mfeni xä ntꞌaxi, nuꞌmu̱ ma gä pe̱fihu̱ näꞌä xä ntꞌaxi (Filipenses 4:8). Pe mu̱ nzäntho di benihu̱ nuꞌu̱ yä tsꞌo tꞌo̱tꞌe, nuꞌmu̱ ma dä jakägihu̱ gä pe̱fihu̱ näꞌä xä ntsꞌo (Mateo 15:18-20). Mähyoni hingä o̱dehu̱ ha nixi gä handihu̱ nuꞌu̱ yä tꞌo̱tꞌe di tsꞌoni mä mfenihu̱. Mu̱ gä nxadihu̱ rä Noya Äjuä, nuꞌmu̱ ma gä pe̱ꞌtsihu̱ yä mfeni xä ntꞌaxi.

5. Rä ntꞌaxi ha mä ndoyꞌohu̱: Nuju̱ di mänduäbihu̱ rä thuhu Äjuä mähyoni gä pe̱ꞌtsihu̱ xä ntꞌaxi mä ndoyꞌohu̱ ꞌne mä dutuhu̱. Gä xu̱kä mä yꞌe̱hu̱ mꞌe̱fa de gä maha rä ꞌmitꞌi, ꞌne änte gä ñunihu̱ o gä hokhu̱ te gä tsihu̱. Mu̱ habu̱ gi ꞌmu̱i otho rä bañu o rä drenäje, nuꞌmu̱ yꞌagi ri ꞌmitꞌi (Deuteronomio 23:12, 13). Mu̱ gä pe̱ꞌtsihu̱ gatꞌho xä ntꞌaxi, ma dä maxkägihu̱ pa hingä ñhenihu̱. Yä gamfri pe̱ꞌtsi yä ngu xä ntꞌaxi, mboo ꞌne thi pa njabu̱ dä ꞌñudi nꞌa rä hogä kꞌoi habu̱ ꞌmu̱i.

6. Yä noya xä ntꞌaxi: Nuꞌu̱ yä jäꞌi pe̱päbi Äjuä mähyoni dä mängä nzäntho näꞌä mäjuäni. Nuꞌu̱ toꞌo mängä yä nhemhñä o yä nkꞌuamba, hingä ma dä mꞌu̱i ha rä Tsꞌu̱tꞌhui Äjuä (Efesios 4:25; Apocalipsis 21:8). Nuꞌu̱ yä de̱ni rä Hesu hingi mängä yä tsꞌo noya. Hingi o̱de ꞌne hingi mängä yä ñhädondo. Fädi ha yä ꞌme̱fi, ha yä ngunsadi ꞌne habu̱ ꞌmu̱i ge hingi mängä yä tsꞌo noya (Efesios 4:29, 31; 5:3).

[Yä kꞌoi ha rä nxii 18 ꞌne 19]

Nuꞌu̱ yä jäꞌi pe̱pi Äjuä mähyoni di tꞌaxi gatꞌho näꞌä pe̱fi