Rä ntheke 10
Yä tꞌo̱tꞌe nuꞌu̱ di u̱tsa Äjuä
¿Hanja gä handihu̱ nuꞌu̱ yä tꞌo̱tꞌe mängä Äjuä ge xä ntsꞌo? (1)
¿Te mä tsꞌo tꞌo̱tꞌe hinxä ñho gä pe̱hu̱ ko mä ndoyꞌohu̱? (2) ¿Hanja handi yä gamfri nuꞌu̱ yä nhemhñä o yä nkꞌuamba? (3) ¿Yä ntꞌengä bojä? (3) ¿Yä mfe? (3) ¿Yä tuhni? (4) ¿Yä ntꞌete? (5) ¿Yä nti? (6)
¿Hanja dä za gä ꞌuegehu̱ de nuꞌu̱ yä tsꞌo tꞌo̱tꞌe? (7)
1. Nuꞌu̱ yä jäꞌi pe̱päbi Äjuä mädi näꞌä xä ñho. Pe ꞌnehe mähyoni dä bädi dä u̱tsa näꞌä xä ntsꞌo (Salmo 97:10). Hänge pe̱ꞌtsi te gä ꞌuegehu̱ de nuꞌu̱ yä tꞌo̱tꞌe di u̱tsa Äjuä. ¿Ngu te mä tsꞌo tꞌo̱tꞌe?
2. Yä tsꞌo tꞌo̱tꞌe: Yä ꞌñädinthäti, yä zingä medinthäti, nuꞌu̱ ähui rä mi ñꞌo̱ho̱ui o nuꞌu̱ ähui rä mi ꞌme̱hñäui, nuꞌu̱ ꞌme̱nguise̱ nuꞌu̱ te yä njaui ꞌne nuꞌu̱ di nkui ko yä zuꞌue, gehyu̱ yä dängä tsꞌoki kontra Äjuä (Levítico 18:6; Romanos 1:26, 27; 1 Corintios 6:9, 10, RN). Mu̱ nꞌa rä ꞌme̱hñä ꞌne nꞌa rä ñꞌo̱ho̱ ꞌmu̱i mähye̱gi ha hinxä nthäti, mähyoni dä ñhe̱gi, ha nuꞌmu̱ hinä, pe̱ꞌtsi dä nthäti ha yä mbo̱ho̱ (Hebreos 13:4).
3. Yä nhemhñä o yä nkꞌuamba, yä ntꞌengä bojä ꞌne yä mfe: Rä Zi Dada Jeoba nzäntho mängä näꞌä mäjuäni (Tito 1:2). Hänge nuꞌu̱ yä jäꞌi ne dä me̱ꞌtsi nꞌa rä hogä ntsitsꞌi ko Äjuä, mähyoni ꞌnehe dä mängä näꞌä mäjuäni (Proverbios 6:16-19; Colosenses 3:9, 10). Gatꞌho yä ntꞌengä bojä japi yä jäꞌi dä me̱ꞌtsi rä nkꞌatꞌä bojä. Hänge yä gamfri hingi ñꞌengä baraha nixi tai yä boleto pa dä dähä yä bojä (Efesios 5:3-5). Hingi mpe, hingi tai nuꞌu̱ yä tꞌo̱tꞌe pädi ge xä fe ꞌne hinte hätsꞌi mu̱ hinxä tꞌumbä nse̱ki (Éxodo 20:15; Efesios 4:28).
4. Yä mbo̱ka ꞌne yä tuhni: Habu̱ ja yä mbo̱ka ꞌnehe ja yä tuhni (Génesis 4:5-8). Nꞌa rä bo̱ka jäꞌi hindä za dä ntsixhui Äjuä (Salmo 11:5; Proverbios 22:24, 25). Hingä o̱ꞌtuähu̱ rä ntsꞌomꞌu̱i nuꞌu̱ toꞌo o̱tkähu̱ rä ntsꞌomꞌu̱i (Proverbios 24:29; Romanos 12:17-21).
5. Yä ntꞌete: Ndunthi yä jäꞌi zofo yä tsꞌo ndähi pa dä matsꞌi dä yꞌo̱the yä ñheni. Märꞌaa di japäbi yä ntꞌete nuꞌu̱ yä nkontra pa dä ñheni o pa dä hyo. Gatꞌho nuya yä ꞌme̱fi bi ehe de rä Zithu. Nuꞌu̱ pe̱päbi Äjuä mähyoni dä ꞌuege de gatꞌho nuya yä tꞌo̱tꞌe (Deuteronomio 18:9-13). Mu̱ gä kuatꞌihu̱ rä Zi Dada Jeoba, näꞌä ma dä sugägihu̱ de nuꞌu̱ yä ntꞌete (Proverbios 18:10).
6. Yä nti: Xä ñho dä tsꞌi nꞌatu̱i rä binu, rä serbesa o mänꞌa rä ithe (Salmo 104:15; 1 Timoteo 5:23). Pe Äjuä hindi ho toꞌo dä zi ndunthi o dä nti (1 Corintios 5:11-13; 1 Timoteo 3:8). Toꞌo tsi ndunthi yä ithe, di tsꞌoni rä ndoyꞌo ꞌne rä mꞌu̱i. ꞌNehe dä za dä japi dä me̱fi märꞌa yä tsꞌoki (Proverbios 23:20, 21, 29-35).
7. Nuꞌu̱ yä jäꞌi pe̱fi nuꞌu̱ yä tꞌo̱tꞌe mängä Äjuä ge xä ntsꞌo «hindä ma dä yu̱tꞌä ha rä tsꞌu̱tꞌhui Äjuä» (Gálatas 5:19-21, RN). Mu̱ nuꞌi xa mäjuäni gi mädi Äjuä ꞌne gi ne gi johyabi rä mfeni, nuꞌmu̱ ma dä za gi ꞌuege de nuꞌu̱ yä tsꞌo ꞌme̱fi (1 Juan 5:3). U̱tsa nuꞌu̱ yä tꞌo̱tꞌe di u̱tsa Äjuä (Romanos 12:9). Ntsixhui nuꞌu̱ yä jäꞌi yꞌo ha rä ꞌñuu Äjuä (Proverbios 13:20). Yä ansiano de ha rä mhuntsꞌi dä za dä maxkägihu̱ ndunthi (Santiago 5:14). ꞌNehe gi pe̱ꞌtsi mänꞌa rä mfatsꞌi xi rä dängi: mu̱ gi xatuäbi Äjuä näꞌä ma dä maxꞌäꞌi (Filipenses 4:6, 7, 13; NM).
[Yä kꞌoi ha rä nxii 20 ꞌne 21]
Äjuä di u̱tsa yä nti, yä mfe, yä ntꞌengä bojä ꞌne yä tuhni