Ñhesukristo, näꞌä Mesia xki mhää ge ma xä zo̱ho̱

PA XÄ fädi toꞌo rä Mesia näꞌä rä Ñänte nuꞌmu̱ xä zo̱ho̱, rä Zi Dada Jeoba bi xipäbi nuꞌu̱ yä profeta xä yꞌofo ndunthi yä profesia de hanja ma xä mꞌu̱i Ñhesukristo, hanja ma xä me̱päbi Äjuä ꞌne hanja ma xä tho. Gatꞌho nuya yä profesia hutsꞌi ha rä Mäkä Tꞌofo, bi kumpli rä Hesu mi mꞌu̱i nuua ha rä Xiꞌmhai. Bi thogi ja ngu xki tꞌofo ꞌne hinte bi mꞌe̱di. Ma gä handihu̱ hanja bi kumpli rꞌa de gehya nuꞌmu̱ bi mꞌu̱i ꞌne bi mbätsi rä Hesu.

Rä profeta Isaías bi mää ge rä Mesia ma xä ꞌñehe de rä familia rä rey Dabid (Isaías 9:7). ꞌNe geꞌä bi thogi: rä Hesu bä ehe de rä familia nunä rey (Mateo 1:1, 6-17).

Miqueas, mä nꞌa rä profeta Jeoba, bi yꞌofo nꞌa rä profesia habu̱ bi mää ge rä Mesia ma xä mꞌu̱i ha «Belen Efrata» ꞌne ge näꞌä ma xä zo̱ho̱ xä ndä (Miqueas 5:2). Mi zo̱ho̱ rä Hesu ha rä Xiꞌmhai, ha Israel mi ja yoho yä luga mi yä thuhu Belen. Nꞌaa, mi kohi ha rä norte de Israel getbu̱ de Näsaret. Ha näꞌä mä nꞌaa, mi kohi ha Juda getbu̱ de Jerusalen. Näꞌä Belen mi kohi getbu̱ de Jerusalen mi fädi ngu Efrata. Ja gehni bi mꞌu̱i rä Hesu ꞌne njabu̱ bi kumpli näꞌä profesia xki mää rä profeta Miqueas (Mateo 2:1).

Mä nꞌa rä profesia hutsꞌi ha rä Mäkä Tꞌofo xki mää ge Äjuä ma xä nzofo rä Tꞌu̱ pa xä bo̱ni «de Ejipto». Nuꞌmu̱ mrä zi ꞌue̱ne rä Hesu, bi tsꞌitsꞌi pa Ejipto. Pe mꞌe̱fa de bi du rä rey Erodes, rä Hesu bi tsꞌitsꞌi mänꞌaki pa ha rä hnini Belen, ꞌne njabu̱ bi kumpli näꞌä profesiaꞌä (Oseas 11:1; Mateo 2:15).

Ha näꞌä tabla de rä nxii 231, hyandi habu̱ enä: «Habu̱ hutsꞌi», ja gehni ma gi tini rꞌa yä testo de rä Mäkä Tꞌofo habu̱ hutsꞌi nuꞌu̱ yä profesia de rä Mesia. Di mbitaꞌihe gi hyandi ꞌnehe habu̱ enä: «Hanja bi kumpli» pa gi hyandi nuꞌu̱ yä testo habu̱ udi hanja bi kumpli nuꞌu̱ yä profesiaꞌu̱. Njabu̱, ma gi hyandi xä ñho ge rä Noya Äjuä hingi hate.

Xki hyandi nuya yä testo, beni ge nuya yä profesia bi tꞌofo rꞌa yä siglo änte de xä mꞌu̱i rä Hesu. Rä Hesu bi ꞌñense̱: «Mi mähyoni dä njabu̱ gatꞌho näꞌä xä ntꞌofo ha rä Ley rä Moises ꞌne näꞌä bi mängä märꞌa yä mꞌe̱hni Äjuä ꞌne näꞌä mängä ha yä Salmo» (Lucas 24:44). Ja ngu gä hyandäse̱, gatꞌho nuꞌu̱ yä profesia hutsꞌi ha rä Mäkä Tꞌofo bi kumpli ꞌne hinte bi mꞌe̱di.