RÄ NTHEKE 4
Nꞌa nxutsi bi japi bi johya rä dada ꞌne Jeoba
¿Te mä promesa di ja Jefte?
Mäske rä tꞌixu Jefte ꞌnehe bi durämu̱i, näꞌä bi kumpli näꞌä promesa xki ja rä dada
¿Gi pädi toꞌo nunä zi nxutsi huxkua?...Rä Mäkä Tꞌofo hingi xikägihu̱ te rä thuhu, pe hää xikägihu̱ ge rä dada mi rä thuhu Jefte. ¿Gi pädi por hanja rä Zi Dada Jeoba ꞌne Jefte xa bi johya kongeꞌä? Ma gä pädihu̱ mä nꞌa tu̱i de nunä zi nxutsi ꞌne de Jefte.
Jefte xa mi rä hojäꞌi, ꞌne mi ꞌueke ndunthi de rä tiempo pa mi uti rä tꞌixu de rä Zi Dada Jeoba. Pe Jefte, ꞌnehe mi nꞌa rä ñꞌo̱ho̱ xa mi ja rä tsꞌe̱di ꞌne mi pädi hanja dä gu̱hni rä hnini. Hänge yä israelita bi yꞌapäbi Jefte ge dä gu̱tꞌi rä ꞌñuu pa dä ma dä ntunkui nuꞌu̱ yä nkontra.
Jefte bi xatuäbi Jeoba ꞌne bi prometebi: “Mu̱ nuꞌi gi faxkägi gä tähä nunä tuhni, ma gä rꞌaꞌi näꞌä jäꞌi dä bo̱ni ꞌme̱tꞌo de mä nguu pa dä däkägi nuꞌmu̱ xkä pengi de nunä tuhni”. ¿Te ma xä me̱fi näꞌä jäꞌi? Ma xä ma xpä ꞌmu̱i ꞌne xpä mpe̱fi pa nzäntho ha rä tabernäkulo. Rä tabernäkulo mi nꞌa luga habu̱ mi pa yä jäꞌi pa mi xo̱kämbeni Jeoba. ¿Bi dähä Jefte näꞌä tuhniꞌä? Hää. Pe, ¿gi pädi toꞌo bi bo̱ni mꞌe̱tꞌo pa bi dädi Jefte mi mengi ha rä nguu?...
¡Näꞌä rä tꞌixu! Ho̱nse̱ꞌä rä bätsi mi pe̱ꞌtsi, ꞌne nubye̱ Jefte ma xä me̱hni dä ꞌmu̱i ha rä tabernäkulo Jeoba. ¡Jefte xa bi durämu̱i! Pe beni, geꞌä xki prometebi Jeoba. Hänge näꞌä nxutsi nixi bi duda ꞌne bi ꞌñembäbi: “Dada, pe̱ꞌtsi te gi kumpli näꞌä gä prometebi Jeoba”.
Tatꞌä je̱ya, yä amiga rä tꞌixu Jefte mi pa mi nuu
Ri mu̱di, rä tꞌixu Jefte ꞌnehe xa bi durämu̱i. Mi pädi ge mu̱ xä ma xpä ꞌmu̱i ha rä tabernäkulo, hingä ma xä za xä nthäti nixi xä me̱ꞌtsi yä bätsi. Pe näꞌä nxutsi hää mi ne dä kumpli näꞌä promesa xki ja rä dada, ꞌne mi ne dä japi dä johya rä Zi Dada Jeoba. Geꞌä mänꞌa xa mi ne ke xä nthäti ꞌne xä me̱ꞌtsi yä bätsi. Hänge bi zoogi rä nguu ꞌne bi ma bä ꞌmu̱i pa nzäntho ha rä tabernäkulo.
¿Bi johya Jefte ꞌne rä Zi Dada Jeoba po näꞌä bi me̱fi näꞌä nxutsi?... Hää, ¡nuꞌu̱ xa bi johya ndunthi! Mu̱ nuꞌi gi ne gi japi dä johya ri dada, ri nänä, ꞌne rä Zi Dada Jeoba ja ngu bi ja rä tꞌixu Jefte, mähyoni gi yꞌo̱te ꞌne gi mädi rä Zi Dada Jeoba.