RÄ NTꞌANI 3
¿Hanja dä za gä ntsitsꞌi xä ñho ko mä dada ꞌne mä nänä?
MU̱ GO DI GEꞌI, ¿TE MA GI PE̱FI?
Imäjinä: Ya mierkole ꞌne ya bi nxui. Geoffrey pe̱ꞌtsi 17 nje̱ya, ya bi huati yä mändado ꞌne nubye̱ ma dä ntsaya nꞌa tu̱i, bi tso̱ge rä telebision ꞌne bi hñudi pa dä hyandi.
Oraꞌä bi zo̱ho̱ rä dada, pe di nheki ge xä nkue̱.
«¡Geoffrey! ¿Por hanja gi ꞌme̱tä ri tiempo ko rä telebision? ¿Hage hingi beni ge pe̱ꞌtsi te gi fatsꞌi ri ku dä hyoki rä tarea? ¡Nunka gi pe̱fi näꞌä di mändaꞌihe!»
Geoffrey bi ꞌñense̱ zi njante: «¡Ya ma gi fu̱di mänꞌaki!».
Pe rä dada hää bi yꞌo̱de ꞌne bi ꞌñembäbi: «¿Hanja gä ꞌñenä?».
Geoffrey bi dädi de gä kue̱ ꞌne bi ꞌñembi: «Hinte dä mää».
Rä dada xa bi bo̱ rä kue̱ ꞌne bi ꞌñembäbi: «¡Ogi matkägi!».
Mu̱ go di geꞌi Geoffrey, ¿te xkä pe̱fi?
HÑUDI ꞌNE NTSO̱ꞌMI
Ma gä huxä nꞌa rä kꞌoi. Nuꞌi gi zi nꞌa rä karro, pe nse̱kitho gi da ngue̱nda ge näꞌä ꞌñuu habu̱ gi yꞌo xä njotꞌi. ¿Te ma gi yꞌo̱tꞌe? Zäi ge ma gi hyoni mä nꞌa rä ꞌñuu, ¿hänge hää? Njabu̱ ꞌnehe, ora gi ñäui ri dada o ri nänä dä hogi gi hyoni hanja gi nzofo.
POR EJEMPLO:
Nꞌa rä nxutsi rä thuhu Leah enä: «Di jakägi xä ñhei gä ñäꞌmee mä dada. Rꞌabu̱ di nzofo, pe näꞌä enä: “Punꞌgägi, ¿gi nzokägi?”».
LEAH PE̱ꞌTSI HÑUU YÄ OPCIÓN
Dä nzofo rä dada de gä kue̱.
Leah embäbi rä dada: «¡Yꞌo̱de näꞌä di ne gä xiꞌi!».
Ya hinte dä xipi.
Leah ya hingi ne dä xipäbi rä dada te mä xuñha pe̱ꞌtsi.
Dä ñäui rä dada mä nꞌa rä ora o mä nꞌa rä pa.
Leah beni dä ñäui rä dada mꞌe̱fa o dä yꞌopäbi nꞌa rä karta pa dä xipi te mä xuñha pe̱ꞌtsi.
Xi nuꞌi, ¿ndañꞌä de nuꞌu̱ hñuu yä opción gi xipäbi dä me̱fi Leah?
PE BENI MꞌE̱TꞌO: Rä dada Leah odä ha rä mfeni märꞌa yä tꞌo̱tꞌe, hänge hindi da ngue̱nda te tupäbi rä mu̱i rä tꞌixu. Mu̱ Leah dä huahni rä opción A, rä dada hingä ma dä bädi por hanja xa di nkue̱ rä tꞌixu. Pe hingä ho̱nse̱ꞌä, Leah ꞌnehe ma dä ꞌme̱tuäbi rä tꞌekꞌei rä dada ꞌne zäi ge näꞌä nixi ma dä ne dä yꞌo̱de näꞌä ne dä xipäbi (Efesios 6:2). Ngu gi da ngue̱nda, nunä opción hingä ma dä matsꞌi nixi Leah nixi rä dada.
¿Hänge mu̱ di jotꞌi nꞌa rä ꞌñuu, ma gi hyoni mä nꞌaa pa dä za gi po̱ni? Njabu̱ ꞌnehe, hyoni hanja dä za gi ñäui ri dada ꞌne ri nänä.
Rä opción B mänꞌa hinxä ñhei, pe nunä ꞌnehe hingi faxte ndunthi. ¿Por hanja? Ngetꞌho mu̱ Leah ne dä ñhandui nuꞌu̱ yä xuñha, pe̱ꞌtsi te dä xipäbi rä dada te tupäbi rä mu̱i ꞌne njabu̱ rä dada dä hyoni hanja dä matsꞌi. Pe mu̱ ya hindä ne dä xipäbi te tupäbi rä mu̱i, hinte ma dä dähä.
Rä opción C mänꞌa xä ñho ngetꞌho Leah hingi hopi ge märꞌa yä tꞌo̱tꞌe dä hñäkuäbi dä ñäui rä dada. Leah dä za dä huahni mä nꞌa rä ora o mä nꞌa rä pa, pa dä ñäui rä dada. O mu̱ dä yꞌopäbi nꞌa rä karta, zäi ge Leah mänꞌa ma dä senti xä ñho.
Mu̱ Leah dä yꞌofo nꞌa rä karta ma dä za dä hñutsꞌi gatꞌho näꞌä di senti, ꞌne xti hñeti rä dada näꞌä kartaꞌä ma dä za dä ntiende xä ñho te mä xuñha thogi Leah. Rä opción C ma dä matsꞌi tanto Leah ꞌne rä dada, ꞌne geꞌä udi rä Mäkä Tꞌofo gä pe̱fihu̱ «pa gä ꞌmu̱hu̱ nꞌa rä hogä ꞌmu̱i nꞌa ngu mänꞌaa» (Romanos 14:19).
¿Te mä nꞌa dä za dä me̱fi Leah?
Mbeni mä nꞌa rä opción näꞌä dä za dä me̱fi Leah ꞌne te dä thogi mu̱ dä me̱fi njabu̱.
MBENI XÄ ÑHO TE MA GI MÄÄ
Beni: rꞌabu̱ näꞌä gi mää hingä geꞌä di ntiende ri dada o ri nänä.
POR EJEMPLO:
Ri dada o ri nänä añꞌäꞌi por hanja gi nkue̱, pe nuꞌi gi thädi: «Nuga hindi ne gä ñä de geꞌä».
Pe nuꞌu̱ ri dada bi ntiende ge gä ꞌñembäbi njaua: «Nuga ngu hindi pe̱tsꞌähu̱ rä komfiansa pa gä xiꞌähu̱ te di thogi, go ma gä petuäbi nuꞌu̱ mä amigo».
Imäjinä ge nuꞌi gi thogi nꞌa rä däta xuñha, ꞌne ri dada o ri nänä ne dä maxꞌäꞌi pe nuꞌi gi embi: «Ogi turimu̱i, nuga dä za gä ñhantꞌmese̱ nuꞌu̱ mä xuñha».
¿Te gi kamfri ge dä za dä ntiende ri dada o ri nänä?
¿Hanja gi kamfri ge mänꞌa dä hogi gi thädi?