NXA̱DI 10
¿Hanja mahyoni gi mbabu̱ yu̱ mpe̱tiʼu̱ yu̱ testigoʼä Jeoba?
¿Ha ʼnandi ʼbu̱ʼä toʼo bi imbitaʼi gi mbabu̱ yu̱ mpe̱tiʼu̱ yu̱ testigoʼä Jeoba? Dä za̱tho gi sü o gi pe̱snisa̱ gi mbabu̱ na mpe̱tiʼu̱ yu̱ testigoʼä Jeoba. Dä za̱tho gi ëna: “¿ʼBe̱ʼä ʼto̱rbu̱ ja na mpe̱tiʼu̱ yu̱ testigo? ¿Hanja emme jaʼtse̱di pa nangeʼu̱ yu̱ testigo ge di mpe̱ti? ¿Ha mahyoni gä mbaga̱bu̱ na mpe̱tiʼu̱?”. Nuua nxa̱di gi pädi ʼbe̱pu̱ dä ze̱ʼi nuʼu̱ yu̱ mpe̱ti ge manʼna gi nsixui Ojä, ʼne gi pädi ʼbe̱pu̱ dä ze̱ʼi nubu̱ ni mʼbu̱i.
1. ¿Hanja di mpe̱ti ʼna?
ʼNa ra me̱fi Ojä bi ʼyorpu̱ ja Biblia hanja emme jaʼtse̱di gä mpe̱tihu̱: “Gä thänneʼä Jeoba nubu̱ ja ra dämünʼtsi” (Salmo 26:12). Yu̱ pa jabu̱ya, nuʼu̱ yu̱ testigoʼä Jeoba emme di ho di mpe̱ti. Ga̱ʼtho yu̱ testigo ge ʼbu̱i ga̱ʼtho na noho ra ximha̱i di mpe̱ti ga̱ʼtho yu̱ semana pa dä thanneʼä Jeoba, tühü ʼne di orabiʼä Ojä. Kextä o̱ʼte yu̱ dämpe̱ti hñundi ʼna je̱ya.
2. ¿ʼBe̱ʼä gi päpu̱ ja yu̱ mpe̱ti?
Nubu̱ ja yu̱ mpe̱ti pa nsa̱ngähu̱ xi nho nuʼä ʼbe̱ʼä ne dä ma nuʼä mambu̱ ja Biblia (dä mi nu Nehemías 8:8). Nuʼbu̱ gi mbabu̱ ja yu̱ mpe̱tiʼu̱ yu̱ testigo, manʼna gi pädi xi nho nangeʼä na hogä nʼto̱ʼte ʼne na hogä njaʼä Jeoba. Nuʼbu̱ gä pädi ge emme di mäʼi o di huëʼkäʼä Ojä, manʼna gi ne gi nsixuiʼä o gi ne gi ʼyotni amigo. Kextä gi pädi ʼbe̱pu̱ dä ze̱ʼä Ojä pa gi mʼbu̱manho ʼne majuäni gi njohya (Isaías 48:17, 18).
3. ¿ʼBe̱pu̱ dä ze̱ʼi nuʼu̱ yu̱ jäʼi gi mpähmu̱bu̱ ja mpe̱ti?
Nuʼä Jeoba xikju̱ bu̱ ja Biblia ge gä “mba̱ha̱ gä nxa̱mbähu̱ gä o̱thu̱ ra nhuëkäte” ʼne njämʼbu gä he̱hmu̱ gä mpe̱tihu̱ (Hebreos 10:24, 25). Nubu̱ ja ma mpe̱tihe gi päpu̱ yu̱ jäʼi ge majuäni di nhuëki ʼna ngü ʼna, ʼne kextä ne dä bädi manʼna nangeʼä Ojä tengüʼi. Nubu̱ ja yu̱ mpe̱ti gi ʼyo̱de yu̱ nhma ge dä hyüʼtä ni mu̱i (dä mi nu Romanos 1:11, 12). ʼNe gi päpu̱ yu̱ jäʼi ge ʼrahmi ʼnanʼyo yu̱ hëi xi thogi, ʼne ʼbe̱pu̱ xi hyürpä na mu̱i na Nhman Ojä. Janangeʼä nuʼä Jeoba ne ge nzäntho gä mba̱ha̱bu̱ ja na mpe̱tiʼu̱ yu̱ testigo pa gä nhyürpähu̱ ma mu̱ihu̱ ʼna ngü ʼnaju̱.
GÄ PÄHMU̱ MANʼNA NANGEHNA
Gä pähmu̱ ʼbe̱pu̱ pa nʼto̱ʼte yu̱ mpe̱tiʼu̱ yu̱ testigo ä Jeoba, ʼne gä pähmu̱ hanja mahyoni o jaʼtse̱di gä mba̱ha̱bu̱ ja yu̱ mpe̱tiʼu̱.
4. Yu̱ mpe̱tiʼu̱ yu̱ testigoʼä Jeoba
Nuʼu̱ yu̱ mu̱di ʼyëʼkyëi mi mpe̱ti pa dä dänneʼä Jeoba (Romanos 16:3-5). Dä mi nuui Colosenses 3:16 ʼne manhmi nangehna:
¿ʼBe̱pu̱ ngübu̱ mi thänne Jeoba nuʼu̱ yu̱ mu̱di ʼyëʼkyëi?
Nuʼu̱ yu̱ pa jabu̱ya nuʼu̱ yu̱ testigo zäntho pabu̱ ja yu̱ ngümpe̱ti pa dä dänneʼä Jeoba. Pa gi pädi ʼbe̱pu̱ njaʼu̱ yu̱ mpe̱tiʼu̱ yu̱ testigo, dä mi nuui ä BIDEO. ʼNe mʼbe̱fa dä mi hyandui nuʼä dibujo nange ʼbe̱pu̱ njaʼu̱ yu̱ mpe̱ti ʼne manhmi nangehna:
¿ʼBe̱pu̱ ni nthe̱ui nuʼä mambu̱ Colosenses 3:16 ko nuʼä ʼto̱rbu̱ ja na ngümpe̱tiʼu̱ yu̱ testigoʼä Jeoba?
Nangeʼä xkä hyandbu̱ bideo o dibujo, ¿ʼbe̱ʼä manʼna gä numanho nangeʼä ʼto̱rbu̱ ja ma mpe̱tihe?
Dä mi nuui 2 Corintios 9:7 ʼne manhmi nangehna:
¿Hanja hingi ʼta̱ʼä mbe̱ti nubu̱ ja yu̱ mpe̱tiʼu̱ yu̱ testigo ä Jeoba?
Ko nuʼä ni xa̱mbäte dä mi nuui nuʼä dä fäpu̱ ja mpe̱ti nuna semana.
¿ʼBe̱ʼä manʼna gi numanho nangeʼä dä fäpu̱ ja mpe̱ti nuna semana?
¿Ha mi päkëna?
Nubu̱ ja internet jw.org dä za̱ gi pädi hapu̱, ʼbe̱ʼä ma pa, ʼne ʼbe̱ʼä ma ora di mpe̱tiʼu̱ yu̱ testigo ä Jeoba ga̱ʼtho ra noho ra nximha̱i.
Nuʼbu̱ ja ma mpe̱tihe pa ma üni yu̱ nxa̱di nangeʼä Biblia ge ʼtëmbi diskurso, pa ma thoki yu̱ bideo, ʼne pa nʼtüdi ʼbe̱pu̱ dä za̱ di predika ʼna. Nuʼbu̱ bi mu̱di ʼne bi guaʼä mpe̱ti di tühühe ʼne pa nʼto̱ʼte ʼna orasion.
Nuʼbu̱ bi ʼto̱ʼte yu̱ nʼta̱nni nubu̱ ja mpe̱ti dä za̱ ʼbu̱ʼä toʼo dä dädi.
Ga̱ʼtho yu̱ jäʼi dä za̱ dä mbabu̱ ja yu̱ mpe̱ti desde yu̱ ʼtu̱hni o yu̱ bätsi asta yu̱ däjäʼi.
Nubu̱ na mpe̱tiʼu̱ yu̱ testigoʼä Jeoba hingi pa nʼta̱ʼä mbe̱ti ʼne te gi jüʼti pa gi ku̱rbu̱.
5. Mahyoni gä mba̱ha̱bu̱ ja yu̱ mpe̱ti
Gä mbënhmu̱ nuʼä mi o̱ʼtä Jesús ʼne na familia. Nuʼu̱ mi ʼbu̱pu̱ ja hnini Nazaret, ʼne ga̱ʼtho yu̱ je̱ya mi pabu̱ templo ge mi jabu̱ Jerusalén. ʼNe mi ja di nʼyo hñupabu̱ ja yu̱ ʼto̱ho̱ pa dä za̱ dä zo̱mbu̱ templo. Dä mi nuui Lucas 2:39-42 ʼne manhmi nangehna:
¿Ha gi mbëni ge xi nhëi nuʼä mi o̱ʼtu̱ Jesús pa dä za̱ dä zo̱mbu̱ Jerusalén?
Xiʼe ¿ʼbe̱ʼä sänmiʼi o di hënʼi pa dä za̱ gi mba yu̱ mpe̱ti?
¿Ha gi mbëni ge jaʼtse̱di ge gi mbabu̱ yu̱ mpe̱ti? ¿ʼBe̱ʼä ma nho gi hyäni nuʼbu̱ gi mbabu̱ yu̱ mpe̱ti? ¿Hanja gi mbëni ngübu̱?
Nuʼä Biblia ürkähu̱ ge emme jaʼtse̱di gä mpe̱tihu̱ pa gä thännehu̱ʼä Jeoba. Dä mi nuui Hebreos 10:24, 25 ʼne manhmi nangehna:
¿Hanja mahyoni ge nzäntho gä mba̱ha̱ yu̱ mpe̱ti?
NUʼÄ ʼBE̱ʼÄ MANʼU̱ ʼRA YU̱ JÄʼI: “Hingä mbo̱ʼä di mpe̱ti ʼna pa di thänne Ojä ʼna”.
¿ʼBe̱ʼä ma texto bä ʼyëpu̱ ja Biblia ürkähu̱ ge Jeoba ne gä mpe̱tihu̱?
NUʼÄ MANʼNA JAʼTSE̱DI
Nuʼbu̱ gi mbabu̱ ja yu̱ mpe̱ti dä ze̱ʼi ge manʼna gi pädi ʼne gi nsixuiʼä Jeoba ʼne gi thänne ko miʼra yu̱ jäʼi.
Nuʼä dä pähmu̱
¿Hanja neʼä Jeoba ge gä mba̱ha̱ yu̱ mpe̱ti?
Nuʼbu̱ gi mbabu̱ yu̱ mpe̱tiʼu̱ yu̱ testigo, ¿ʼbe̱ʼä gi päpu̱?
¿ʼBe̱pu̱ manʼna dä za̱ di ze̱ʼi geʼbu̱ gi mbabu̱ ja yu̱ mpe̱tiʼu̱ yu̱ testigo?
DÄ MI PÄDI MANʼNA
¿Ha gi sü ʼne gi pe̱snisa̱ gi mbabu̱ ja yu̱ mpe̱tiʼu̱ yu̱ testigo? ʼNa nʼyohu̱ mi sü dä mbabu̱ ja yu̱ mpe̱tiʼu̱ yu̱ testigo, pe̱ mʼbe̱fa bi numanhoʼu̱ yu̱ mpe̱ti. Dä mi pädi hanja.
¡Njämʼbu̱ gä pumbënihe ge nuʼu̱ emme bi ze̱nguägähe xi nho! (4:16)
Dä mi pädi nuʼä bi ʼyo̱ʼtä ʼna ʼtsu̱nʼtu̱ pa dä thoki dä mba yu̱ mpe̱ti.
Dä mi pädi nuʼä manʼu̱ miʼra nangeʼu̱ yu̱ mpe̱ti.
“¿Hanja xi nho gä mba̱ha̱bu̱ yu̱ ngü mpe̱tiʼu̱ yu̱ testigo?” (Artikulo ge jw.org)
Dä mi pädi ʼbe̱pu̱ bi pa̱di na nʼto̱ʼte ʼna nʼyohu̱ nuʼbu̱ mi mbabu̱ yu̱ mpe̱tiʼu̱ yu̱ testigo ä Jeoba.
“Nzäntho mi hä ma nzafi nubu̱ mi ʼyo” (La Atalaya, 1 julio ge 2014)