ʼBe̱ʼä dä za̱ gi ʼyo̱ʼte pa di njohya ni familia (xe̱ki 2)

Nuʼu̱ yu̱ ʼtu̱hni o nuʼu̱ yu̱ bätsi ʼna ra regalo ge ni ʼyëʼä Ojä. Nuʼä Jeoba ne ge nuʼu̱ yu̱ ta di jamansü xi nho yu̱ ʼtu̱hni, nangeʼä di ünni yu̱ hogä nʼtsofoʼu̱ yu̱ ta pa di jamansüʼu̱ yu̱ ʼtu̱hni. Pe̱ kextä di ünni yu̱ hogä nʼtsofoʼu̱ yu̱ ʼtu̱hni pa di njamanho ga̱ʼthoʼä ra familia.

1. ¿ʼBe̱ʼä ma nʼtsofo di ünna Jeobaʼu̱ yu̱ ta?

Nuʼä Jeoba ne ge nuʼu̱ yu̱ ta emme dä huëʼku̱ yu̱ ʼtu̱hni ʼne ge dä hyäkna tiempo pa nangeʼu̱ yu̱ ʼtu̱hni. Kextä a̱ʼpu̱ yu̱ ta ge dä jamansüʼu̱ yu̱ ʼtu̱hni nangeʼu̱ yu̱ nʼtso ja ʼne ge dä xa̱mbi na Nhman Ojä (Proverbios 1:8). Nuʼä Jeoba ëmʼpu̱ yu̱ ta nubu̱ ja Biblia: “ʼNe nuʼähu̱ yu̱ tahu̱, nuʼbu̱ gi su̱hni ʼtu̱hnihu̱, neʼbu̱ hingi japfu̱ di nkue̱tho. Pe̱ dä mi temanhohu̱ gepu̱ di ʼyëʼkyëi ra Hmüʼu̱” (dä mi nu Efesios 6:4). Nuʼä Jeoba emme hü na mu̱i nuʼbu̱ nuʼu̱ yu̱ ta ge xa̱mbäse̱he̱ʼu̱ yu̱ ʼtu̱hni na Nhman Ojä ʼne hindi ünnu̱ miʼra nuʼä ra ʼbe̱fi ge di tede o di ünhyu̱ nʼtsofoʼu̱ yu̱ ʼtu̱hni.

2. ¿ʼBe̱ʼä ma nʼstofo di ünna Jeobaʼu̱ yu̱ ʼtu̱hni?

Nuʼä Jeoba ëmʼpu̱ yu̱ ʼtu̱hni “dä mi ʼyo̱thu̱ ʼbe̱ʼä ga̱ʼtho man ni tahu̱ ʼne ni mbehu̱” (dä mi nu Colosenses 3:20). Nuʼbu̱ ʼna ʼtu̱hni ëspäʼu̱ yu̱ ta ʼne o̱ʼtä sifi, o̱ʼte ge emme di njohyaʼu̱ yu̱ ta ʼne nuʼä Jeoba (Proverbios 23:22-25). Tengüʼä Jesús; emme ra ʼyo̱deʼbu̱ mi nʼtu̱hniʼä, madägeʼä ge hinmi ja na ʼtsokiʼä pe̱ bi ʼyëspi ʼne bi ʼyo̱ʼtä mi xiʼu̱ yu̱ ta madägeʼä mi ja yu̱ ʼtsokiʼu̱ (Lucas 2:51, 52).

3. ¿ʼBe̱ʼä sa̱ dä ʼyo̱ʼte ga̱ʼthoʼu̱ ʼbu̱pu̱ ja ʼna familia pa manʼna di nsixmanhouiʼä Jeoba?

Geʼbu̱ ʼbu̱hni ʼtu̱hni dä za̱tho gi ne ge kextä dä dänneʼä Jeoba tengütho gi o̱ʼte. ¿ʼBe̱ʼä za̱ gi ʼyo̱ʼte pa ge kextä nuʼu̱ ni tu̱hni dä dänneʼä Jeoba? Dä za̱ gi ʼte̱nnä nʼtsofo mambu̱ ja Biblia ge ëna: “Ja ge gi xa̱mbäʼu̱ ni ʼtu̱hni [nuʼä na Nhman Ojä], ʼne ja gi xifi nuʼbu̱ gi hüpu̱ ja ni ngü, nuʼbu̱ gi ʼyobu̱ ja yu̱ ʼyü, nuʼbu̱ gä ʼyoi ʼne nuʼbu̱ gä ʼnanʼtsi” (Deuteronomio 6:7). Jaʼbu̱ ʼnandi dä za̱tho nuʼu̱ yu̱ ta ja dä xa̱mbäʼu̱ yu̱ ʼtu̱hni xi ngü yu̱ nidi nuʼä ja dä ʼyo̱ʼte pa ge jaʼä dä bädi. Njarbu̱tho nuʼä na Nhman Ojä, nuʼu̱ yu̱ ta ja dä hyoni ʼna ra ora ge ga̱ʼtho yu̱ pa pa dä xa̱mbäʼu̱ yu̱ ʼtu̱hni nangeʼä Jeoba. Kextä emme po̱manho ge nuʼu̱ yu̱ familia dä hyäkna tiempo ga̱ʼtho yu̱ semana pa ge di nxa̱ʼä Biblia, dä ʼyo̱ʼte nuʼä adoración en familia. ʼNe madägeʼbu̱ njoʼo ni ʼtu̱hni dä za̱ gi nxa̱ʼä Biblia ga̱ʼtho yu̱ semana ʼne kextä dä ze̱ʼäbu̱ ni mʼbu̱i.

GÄ PÄHMU̱ MANʼNA NANGEHNA

4. Gi xa̱mbäʼu̱ ni ʼtu̱hni ko ra nhuëkäte

Xi nhëi ge di xa̱mbä ʼna ʼtu̱hni ʼna. ¿ʼBe̱pu̱ dä za̱ di ze̱ʼä ä Biblia pa gi xa̱mbä ni ʼtu̱hni? Dä mi nuui Santiago 1:19, 20 ʼne manhmi nangehna:

• ¿ʼBe̱ʼä da̱ zä dä ʼyo̱ʼtu̱ yu̱ ta pa ge nuʼbu̱ bi ñahu̱ʼu̱ yu̱ ʼtu̱hni dä zofo ko ra nhuëkäte?

• ¿Hanja ge nuʼbu̱ kue̱ʼu̱ yu̱ ta hingi ja dä ünna nʼtsofo o dä zu̱ʼu̱ yu̱ ʼtu̱hni?a

5. Dä mi jamansüʼu̱ ni ʼtu̱hnihu̱

Emme jaʼtsedi ge nuʼu̱ yu̱ ta dä xa̱mbäʼu̱ yu̱ ʼtu̱hni ge nuʼbu̱ bi nteʼu̱ di mpa̱hyu̱ jäʼi. Pe̱ kextä ja dä xa̱mbi ge ja di njamansü pa njoʼo toʼo dä tha̱rpä yu̱ jäʼi, ge te ʼbe̱ʼä ma nʼtso dä ʼto̱rpe, geʼtho ʼbu̱hyu̱ jäʼi ge di ho dä ʼtsonyu̱ ʼtu̱hni. Pe̱ dä za̱tho xi nhëi ge gä xihmu̱ʼu̱ yu̱ ʼtu̱hni nangehna. Dä mi nuui BIDEO ʼne manhmi nangehna:

BIDEO: Dä mi jamansüʼu̱ ni ʼtu̱hni nangeʼu̱ yu̱ nʼtso jaua nximha̱i (2:58)

• ¿Hanja xi nhëi pa nangeʼu̱ yu̱ ta di ñahu̱ʼu̱ yu̱ ʼtu̱hni ge ho̱nʼtu̱ xi nthäti sa̱ ʼrarbu̱ dä ʼyoi?

• ¿ʼBe̱ʼä xi ze̱ʼu̱ ʼra yu̱ ta pa dä za̱ di ñahu̱ʼu̱ yu̱ ʼtu̱hni nangehna?

Tengüthoʼä mambu̱ ja Biblia, nuʼä na ximha̱iʼä Zithü manʼna thogi xi nʼtsoʼä o̱ʼte. Dä mi nuui 2 Timoteo 3:1, 13 ʼne manhmi nangehna:

• Nuʼu̱ ʼra yu̱ ʼtso jäʼi mambu̱ ja bersikulo 13, ʼbu̱ʼu̱ ge di ʼtsonʼu̱ yu̱ ʼtu̱hni, ʼne geʼä ʼtëmbi abuso de menores. ¿Hanja emme jaʼtse̱di ge nuʼu̱ yu̱ ta dä xa̱mbäʼu̱ yu̱ ʼtu̱hni ge ja di njamansü ge njoʼo dä da̱rpä na jäʼi o ge ʼbu̱ʼä toʼo dä ʼyëna dä ʼyo̱rpä ʼna ra nʼtso? ¿ʼBe̱ʼä sa̱ dä ʼyo̱ʼtu̱ yu̱ ta pa di jamansüʼu̱ yu̱ ʼtu̱hni pa njoʼo toʼo dä ʼtsoni?

¿Ha mi päkena?

Nuʼu̱ yu̱ testigoʼä Jeoba xi ngü yu̱ publikasion o yu̱ su̱kuä xi hoki pa ge nuʼu̱ yu̱ ta dä za̱ di jamansü ʼne dä xa̱mbäʼu̱ yu̱ ʼtu̱hni ge nuʼbu̱ bi nte di mpa̱ʼu̱ yu̱ jäʼi ʼne ʼbe̱pu̱ dä za̱ di njamansü pa ge njoʼo toʼo dä ʼyo̱rpä ʼna ra nʼtso. Gehyu̱ ʼra yu̱ publikasion:

• Gi jamansühu̱ ni ʼtu̱hnihu̱ (bideo)

• Gä pähmu̱ nangeʼä ra Hogä Xa̱mbäte, yu̱ kapitulo 10 ʼne 32

• “ʼBe̱pu̱ dä za̱ gi ñahu̱ʼu̱ ni ʼtu̱hni ge hingi ho ge ʼrarbu̱ dä ʼyoʼu̱ hinxi nthäti” (¡Despertad!, núm. 5 2016)

6. Gi ʼyëspäʼu̱ ni ta

BIDEO: ʼBe̱pu̱ dä za̱ gi ñahu̱ʼu̱ ni ta (2:19)

• ¿Hanja nuʼu̱ yu̱ ʼtsu̱nʼtu̱ ʼne yu̱ hmüte ja dä ʼyüʼä nʼtëspäteʼbu̱ bi zoʼu̱ yu̱ ta?

• ¿ʼBe̱pu̱ nuʼu̱ yu̱ ʼtsu̱nʼtu̱ dä za̱ dä ʼyëspäʼu̱ yu̱ ta?

Dä mi nuui Proverbios 1:8 ʼne manhmi nangehna:

• ¿ʼBe̱pu̱ ja dä däʼä ʼna ʼtsu̱nʼtu̱ o na hmüte nuʼbu̱ nuʼu̱ yu̱ ta jaʼä a̱pi ge dä ʼyo̱ʼte?

7. Dä mi thäneuiʼä Jeoba ko ga̱ʼthoʼä ni familia

Nuʼu̱ yu̱ testigoʼä Jeoba häkna tiempo pa di nxa̱hmi na familia ʼnandi ʼna semana nangeʼä Jeoba. Pe̱ ¿ʼbe̱pu̱ pa nʼto̱ʼte nuʼä adoración en familia? Dä mi nuui ä BIDEO ʼne manhmi nangehna:

BIDEO: Nuʼä adoración en familia: nuʼu̱ yu̱ hëi ʼne yu̱ njäpi (8:04)

• ¿ʼBe̱ʼä dä za̱ di ze̱ʼi ge ga̱ʼtho yu̱ semana gi ʼyo̱ʼtä ni adoración en familia?

• ¿ʼBe̱ʼä sa̱ dä ʼyo̱ʼtu̱ yu̱ ta pa hindi nxo̱mu̱i ʼne di njohya ga̱ʼtho nuʼbu̱ bi ʼyo̱ʼta adoración en familia? (Dä mi hyanʼtä foto jabu̱ ra mu̱di).

• ¿Ha jaʼä hu̱ʼtsiʼi gi ʼyo̱ʼtä ni adoración en familia? ¿ʼBe̱ʼä hu̱ʼtsiʼi?

Nuʼbu̱ mayaʼbu̱tho nuʼä Jeoba mi ne ge nuʼu̱ yu̱ israelita nzäntho dä xa̱mbäʼu̱ yu̱ ʼtu̱hni nuʼu̱ yu̱ nʼtëdiʼä. Dä mi nuui Deuteronomio 6:6, 7 ʼne manhmi nangehna:

• ¿ʼBe̱pu̱ dä za̱ gi te̱nna nʼtsofo?

Nuʼä dä za̱ gi ʼyo̱te pa nuʼä ni adoración en familia:

• Gi nxa̱hmi pa nangeʼu̱ yu̱ mpe̱ti.

• Gi manhmiʼä ni familia nangeʼä bi ʼyo̱ʼtä ʼna ra jäʼi ge bä ʼyëpu̱ ja Biblia.

• Geʼbu̱ ya ʼbu̱hni ʼtu̱ʼtu̱hni dä mi käʼmi ʼne imprime nuʼu̱ ʼra yu̱ ʼbe̱fi pa nuʼu̱ yu̱ ʼtu̱hni ge bä ʼyëpu̱ jw.org.

• Dä mi huanhna ʼna tema pa yu̱ ʼtsu̱nʼtu̱tho ʼne yu̱ hmütetho ge bä ʼyëpu̱ jw.org.

• Dä mi ʼyo̱ʼtä ʼna ra esenifikasion nangeʼä ʼna nʼtüti bä ʼyëpu̱ ja Biblia.

• Dä mi nuui ʼna bideo ge bä ʼyëpu̱ jw.org ʼne manhmi nangeʼä xkä pähmi.

NUʼÄ MANʼNA JAʼTSE̱DI

Nuʼä Jeoba ne ge nuʼu̱ yu̱ ta dä huëʼku̱ yu̱ ʼtu̱hni, dä xa̱mbäʼä xi nho ʼne dä jamansü; ʼne kextä ne ge nuʼu̱ yu̱ ʼtu̱hni dä ʼyëspäʼu̱ yu̱ ta ʼne dä ʼyo̱ʼte nuʼä pa nsifi, ʼne ne ge ga̱ʼtho yu̱ familia dä dänne.

Nuʼä dä pähmu̱

• ¿ʼBe̱ʼä ja dä ʼyo̱ʼtu̱ yu̱ ta pa di jamansü ʼne dä xa̱mbäʼu̱ yu̱ ʼtu̱hni?

• ¿Nuʼu̱ yu̱ ʼtu̱hni ʼbe̱pu̱ dä za̱ dä ʼyüdi ge ëspäʼu̱ yu̱ ta?

• ¿ʼBe̱ʼä ma njäpi dä nuʼu̱ yu̱ familia nuʼbu̱ dä häkna tiempo ga̱ʼtho yu̱ semana pa di nxa̱ʼä na Nhman Ojä?

DÄ MI PÄDI MANʼNA

¿ʼBe̱ʼä ma nʼtsofo dä za̱ dä ze̱ʼu̱ ni ʼtu̱hni pa nuʼbu̱ bi ndäjäʼi?

“6 yu̱ nʼtüti ge emme dä ze̱ʼu̱ ni ʼtu̱hni” (¡Despertad!, núm. 2 2019)

Dä mi nxa̱di nangeʼu̱ ʼra yu̱ nʼtsofo ge dä za̱ dä ze̱ʼu̱ nuʼu̱ toʼo̱ fa̱ʼu̱ zu̱ däʼkyëi.

“¿Xiʼä Ojä ja ʼto̱ʼmi ge gä fa̱hmu̱ʼu̱ ma tahu̱ nuʼbu̱ bi ndäʼkyëi?” (Bä ʼyëpu̱ jw.org)

Dä mi pädi ʼbe̱ʼä bi ze̱ʼä ʼna nʼyohu̱ pa bi tede xi nhoʼu̱ yu̱ ʼtu̱hni.

Jeoba ürkähu̱ ʼbe̱pu̱ gä xa̱mbähu̱ ma ʼtu̱hnihu̱ (5:58)

Dä mi pädi ʼbe̱ʼä dä za̱ dä ʼyo̱ʼtu̱ yu̱ ta pa ge manʼna di nsixmanhouiʼu̱ yu̱ ʼtu̱hni.

“¿ʼBe̱ʼä dä za̱ dä ʼyo̱ʼtä ʼna ra ta pa ge manʼna di nsixmanhouiʼu̱ yu̱ ʼtu̱hni” (La Atalaya, 1 nobiembre ge 2011)