Nuʼä Biblia üdi ge nuʼä na ʼTsu̱ʼtabi Ojä emme jaʼtse̱diʼä. Geʼtho nangeʼä na ʼTsu̱ʼtabi, nuʼä Jeoba dä ʼyo̱ʼte ga̱ʼtho nuʼä mi mbëni dä ʼyo̱ʼte desde na mu̱di. Pe̱, ¿ʼBe̱ʼä ä ra ʼTsu̱ʼtabi Ojä? ¿Hanja di pähmu̱ ge ya di mandaʼä na ʼTsu̱ʼtabi Ojä? ¿ʼBe̱ʼä xi ʼyo̱ʼtä na ʼTsu̱ʼtabi Ojä nuʼu̱ yu̱ pa jabu̱? ¿ʼNe ʼbe̱ʼä dä ʼyo̱ʼte nuʼu̱ yu̱ pa bä ëpu̱? Gä pähmu̱ nangehya yu̱ nʼta̱nni nuna nxa̱di jaua ʼne nuʼu̱ mi yoho yu̱ nxa̱di 32 ʼne 33.

1. ¿ʼBe̱ʼä ä ra ʼTsu̱ʼtabi Ojä, ʼne toʼoʼä di mandabu̱?

Nuʼä ra ʼTsu̱ʼtabi Ojä, ʼna ra ʼtsu̱ʼtabi ge bä sa̱nnä Jeoba. ʼNe nuʼä Jeoba bi ʼyëxä Jesucristo pa geʼä di Nʼtsu̱ʼtabiʼä desde mahëʼtsi (Mateo 4:17; Juan 18:36). Nubu̱ ja Biblia ma ge nuʼä Jesús di nʼtsu̱ʼtabi pa nzäntho (Lucas 1:32, 33). Nuʼä Jesús dä manda ga̱ʼthoʼu̱ yu̱ jäʼi di mʼbu̱kua Ha̱i.

2. ¿Toʼoʼu̱ miʼra di mandahu̱ʼä Jesús nubu̱ mahëʼtsi?

Nuʼä Jesús hindi ʼnase̱ ge di mandaʼä. Di nʼtsu̱ʼtabihu̱ yu̱ jäʼi ge ʼrahmi ʼnanʼyo yu̱ hnini ge bi neʼtsi (Apocalipsis 5:9, 10). ¿Hangüʼu̱ yu̱ jäʼi di nʼtsu̱ʼtabihu̱ʼä Jesús? Desde nuʼbu̱ mi nʼyoua Ha̱iʼä Jesús, yu̱ miyonetho yu̱ jäʼi xi ʼyëʼkyëi nangeʼä ʼne xi de̱nnä. Pe̱ ho̱ntho 144,000 dä mbabu̱ mahëʼtsi ʼne di nʼtsu̱ʼtabihu̱ʼä Jesús (dä mi nu Apocalipsis 14:1-4). Nuʼu̱ hinma huanhni ge dä mbabu̱ mahëʼtsi di mʼbu̱kua Ha̱iʼu̱ (Salmo 37:29).

3. ¿Hanja manʼna po̱manho na ʼTsu̱ʼtabi Ojä ge dä geʼu̱ yu̱ ʼtsu̱ʼtabiʼu̱ yu̱ jäʼi?

ʼBu̱ʼu̱ ʼra yu̱ ʼtsu̱ʼtabi ge ne dä ʼyo̱ʼte xi nhoʼä na ʼbe̱fi geʼtho di huëktätho yu̱ jäʼi, pe̱ hingi sa̱ dä ʼyo̱ʼte ga̱ʼthoʼä mbënʼu̱, geʼtho hingi gü yu̱ je̱ya di mandaʼu̱. ʼNe̱ nuʼu̱ miʼra ge yu̱ mponihu̱ dä za̱tho hingi u̱rpä gue̱nda o hingi tü na mu̱i nangeʼu̱ yu̱ jäʼi. Pe̱ nuʼä Jesús njämʼbu̱ dä mba ma pa̱diʼä, geʼtho geʼä ra ʼTsu̱ʼtabi ge bi ʼyëxä Ojäʼä. Nuʼä ra ʼTsu̱ʼtabi Ojä njämʼbu̱ dä mba ma juadiʼä ʼne njämʼbu̱ dä mba ma ʼueke (Daniel 2:44). Nuʼä Jesús dä manda ga̱ʼtho ra noho ra Ha̱i ʼne hindä huandäʼu̱ yu̱ jäʼi ge dä huëki ʼne dä fa̱ʼtsi. Nuʼä Jesús ʼna ra ʼTsu̱ʼtabi ge emme hokjäʼiʼä ʼne nzäntho o̱ʼte nuʼä po̱manho. ʼNe ngübu̱ dä xa̱mbäʼu̱ yu̱ jäʼi ge dä ʼyo̱ʼte, ge dä huëʼku̱ yu̱ mikjäʼihu̱ ʼne di nʼyo̱rpä ra nho ʼna ngü ʼnaʼu̱ (dä mi nu Isaías 11:9).

4. Nuʼä ra ʼTsu̱ʼtabiʼä Ojä dä manda ga̱ʼtho ra noho ra ximha̱i

Ho̱nʼtä Jesús manʼna ja na mfädi ʼne na ʼtse̱di pa di manda ge dä geʼu̱ yu̱ ʼtsu̱ʼtabi xi mʼbu̱i. Dä mi nuui Mateo 28:18 ʼne manhmi nangehna:

• ¿Hanja nuʼä Jesús sa̱ di mandabu̱ mahëʼtsi ʼnekua Ha̱i?

Nuʼu̱ yu̱ ʼtsu̱ʼtabi ʼbu̱kua Ha̱i ho̱ntho sa̱ dä manda ʼra yu̱ hninitho, pe̱ nuʼbu̱ bi guaʼä tiempo ge bi ʼtsa̱mbäʼu̱, ja gepu̱ juadi nuʼä ra ʼbe̱fi ge o̱ʼtu̱. ¿Pe̱ ha ngübu̱ dä thoʼä na ʼTsu̱ʼtabi Ojä? Dä mi nuui Daniel 7:14 ʼne manhmi nangehna:

• ¿ʼBe̱ʼä ma njäpi gä hänhmu̱ ge njämʼbu̱ dä guaʼä na ʼTsu̱ʼtabi Ojä ?

• ¿ʼBe̱ʼä ma njäpi di nja nuʼbu̱ bi manda ga̱ʼtho ra noho ra Ha̱i nuʼä na ʼTsu̱ʼtabi Ojä?

5. Ja ge dä mba ma pa̱diʼu̱ yu̱ ʼtsu̱ʼtabi̱ yu̱ jäʼi

¿Hanja mahyoni ge nuʼä na ʼTsu̱ʼtabi Ojä dä ʼueʼku̱ yu̱ ʼtsu̱ʼtabiʼu̱ yu̱ jäʼi ʼne geʼä di mandaʼä? Dä mi nuui ä BIDEO ʼne manhmi nangehna:

BIDEO: ¿ʼBe̱ʼä ra ʼTsu̱ʼtabi Ojä? (ʼna xe̱kitho) (1:41)

• ¿ʼBe̱ʼä ma hëi o ʼbe̱ʼä ma nʼu̱mbi xi ʼyo̱rpä yu̱ jäʼiʼu̱ yu̱ ʼtsu̱ʼtabi?

Dä mi nuui Eclesiastés 8:9 ʼne manhmi nangehna:

• ¿Ha gi mbëni ge nuʼä na ʼTsu̱ʼtabi Ojä ja ge dä ʼueʼku̱ yu̱ ʼtsu̱ʼtabiʼu̱ yu̱ jäʼi ʼne gese̱ʼä di manda? ¿Hanja?

6. Nuʼu̱ di mandabu̱ ja na ʼTsu̱ʼtabi Ojä pädi nuʼä di thohmu̱

Nuʼä ma ʼTsu̱ʼtabihu̱ Jesús, bi mʼbu̱kua Ha̱i, nangeʼä pädi nuʼä ga̱ʼtho ʼbe̱ʼä di thohmu̱ (Hebreos 4:15). Nuʼä Jeoba xi huanhni 144,000 yu̱ nʼyohu̱ ʼne yu̱ xisu pa di mandahu̱ʼä Jesús. Nuya yu̱ jäʼi ʼrahmi ʼnanʼyobu̱ yu̱ hnini ge ni neʼtsi (Apocalipsis 5:9).

• ¿Ha hüʼtä ni mu̱i ge nuʼä Jesús ʼne nuʼu̱ di nʼtsu̱ʼtabihu̱ʼä pädi nuʼä ʼbe̱ʼä di thohmu̱? ¿Hanja?

7. Nuʼu̱ yu̱ nʼtëdiʼä ra ʼTsu̱ʼtabi Ojä manʼna po̱manho ge dä geʼu̱ yu̱ nʼtëdiʼu̱ yu̱ jäʼi

Nuʼu̱ yu̱ ʼtsu̱ʼtabi ʼbu̱kua Ha̱i sa̱nyu̱ nʼtëdi pa di jamansüʼu̱ yu̱ jäʼi. Nuʼä ra ʼTsu̱ʼtabi Ojä kextä ja yu̱ nʼtëdi, ʼne nuʼu̱ toʼo fa̱ʼtsi ja ge dä de̱nnu̱ yu̱ nʼtëdi. Dä mi nuui 1 Corintios 6:9-11 ʼne manhmi nangehna:

• ¿ʼBe̱pu̱ gi mbëni ge di nja ra nximha̱i nuʼbu̱ ga̱ʼtho yu̱ jäʼi bi ʼyëspäʼu̱ yu̱ nʼtëdiʼä na ʼTsu̱ʼtabi Ojä?a

• ¿Ha po̱manho ge nuʼä Jeoba a̱ʼpu̱ yu̱ jäʼi ge dä ʼyëspi ʼne dä de̱nnu̱ yu̱ nʼtëdi? ¿Hanja?

• ¿Ha gi mbëni ge nuʼu̱ yu̱ jäʼi ge hingi ëspäʼu̱ yu̱ nʼtëdiʼä Ojä dä za̱ di pa̱ʼu̱ yu̱ nʼto̱ʼte? (Dä mi nuuiʼä bersikulo 11).

NUʼÄ MANʼNA JAʼTSE̱DI

Nuʼä ra ʼTsu̱ʼtabi Ojä majuäni bi jabu̱ mahëʼtsi ʼne di mandaua Ha̱i.

Nuʼä dä pähmu̱

• ¿Toʼoʼu̱ dä mandabu̱ bi ja na ʼTsu̱ʼtabiʼä Ojä?

• ¿Hanja nuʼä ra ʼTsu̱ʼtabiʼä Ojä manʼna di manda xi nhoʼä ge dä geʼu̱ yu̱ ʼtsu̱ʼtabiʼu̱ yu̱ jäʼi?

• ¿ʼBe̱ʼä ne Jeoba ge dä ʼyo̱ʼtu̱ yu̱ jäʼi nuʼbu̱ bi mandaʼä na ʼTsu̱ʼtabi?

DÄ MI PÄDI MANʼNA

Dä mi pädi nuʼä bi manʼä Jesús nange desde hapu̱ dä mandaʼä ra ʼTsu̱ʼtabiʼä Ojä.

“Xiʼä na ʼTsu̱ʼtabiʼä Ojä, ¿ha obu̱ mbo ma mu̱ihu̱?” (Bä ʼyëpu̱ jw.org)

¿Hanja nuʼu̱ yu̱ testigoʼä Jeoba fa̱ʼtsi nuʼä na ʼTsu̱ʼtabiʼä Ojä ge dä geʼu̱ yu̱ ʼtsu̱ʼtabiʼu yu̱ jäʼi?

Ho̱nʼtä na ʼTsu̱ʼtabiʼä Ojä bi fa̱xu̱ (1:44)

Dä mi pädi nuʼä mambu̱ ja Biblia nangeʼu̱ 144,000 yu̱ jäʼi ge bi huanhnä Jeoba pa di nʼtsuʼtabihu̱ʼä Jesús.

“¿Toʼoʼu̱ dä mbabu̱ mahëʼtsi?” (Bä ʼyëpu̱ jw.org)

Dä mi pädi ʼbe̱ʼä bi ze̱ʼä ʼna xisu ge mi ofa̱di dä ga̱mfëni ge nuʼä Ojä dä juadi ga̱ʼthoʼu̱ yu̱ nʼtso ge jaua ja ximha̱i

“Dä pädi ʼbe̱pu̱ dä guadi ga̱ʼthoʼu̱ yu̱ nʼtso ge ja” (¡Despertad!, nobiembre ge 2011)

Nuʼä na ʼTsu̱ʼtabi Ojä bi mu̱di bi mandabu̱ mahëʼtsi nuʼä ra je̱ya 1914. Geʼtä ra je̱yaʼä bi mu̱ʼu̱ yu̱ nze̱gi yu̱ pa ge di mandaʼu̱ yu̱ ʼtsu̱ʼtabi ʼbu̱kua Ha̱i. ¿Hanja di manhmu̱ ngübu̱? Gä nuhu̱ nuʼä mambu̱ ja Biblia ge dä thogi, ʼne nuʼä o̱tyu̱ jäʼi ga̱ʼtho ra noho ra nximha̱i desde nuʼä ra je̱ya 1914.

1. ¿ʼBe̱ʼä xi manʼä Biblia ge dä thogi?

Nuʼä libro bi ʼyoʼtä Daniel mi mambu̱ ge nuʼä ra ʼTsu̱ʼtabiʼä Ojä dä mu̱di di manda nuʼbu̱ bi guaʼu̱ yu̱ pa ge ʼtëmbi “yoto yu̱ tiempo” (Daniel 4:16, 17). Mʼbe̱fa nuʼä Jesús bi ma nangehya yu̱ tiempo nuʼbu̱ mi ʼyënä ge geʼu̱ yu̱ tiempo ge bi ʼtsa̱mbäʼu̱ yu̱ hnini, ʼne bi ma ge tobe hinmi juaʼu̱ yu̱ tiempoʼu̱ (Lucas 21:24). Gä nuhu̱ ge nuʼu̱ yoto yu̱ tiempo bi guadi nuʼä je̱ya 1914.

2. Desde nuʼä je̱ya 1914 ¿ʼbe̱pu̱ xi mpa̱di nuna ra nximha̱i ʼne nuʼu̱ yu̱ nʼto̱ʼteʼu̱ yu̱ jäʼi?

Nuʼu̱ yu̱ disipulo bi ʼya̱nnä Jesús: “ʼBe̱ʼä ni hmepia [o ma nʼtüti] di njaʼbu̱ gua pengi maho̱nʼä ʼne ʼbu̱ ra nze̱gi ra pa” (Mateo 24:3). Nuʼä Jesús bi ma ge nuʼbu̱ bi mu̱di bi mandaʼä ra ʼTsu̱ʼtabi Ojä xi ngü ʼbe̱ʼä dä thogi. Tengü ge emme di nja yu̱ däsu̱i, ra thühü ʼne yu̱ nhuänha̱i (dä mi nu Mateo 24:7). Nuʼä Biblia kextä bi ma ʼbe̱pu̱ di ngü ra nʼto̱ʼteʼu̱ yu̱ jäʼi nuʼbu̱ na nze̱gi yu̱ pa ʼne nuʼä na nʼto̱ʼteʼu̱ geʼä dä ʼyo̱ʼte ge emme xtä nhëi yu̱ pa (2 Timoteo 3:1-5). Desde nuʼä ra je̱ya 1914, manʼna emme xi nʼtso na ʼto̱ʼteʼu̱ yu̱ jäʼi ʼne manʼna emme xi nhëi yu̱ pa di ʼbu̱hmu̱.

3. ¿Hanja manʼna xi nʼtsoua ra ximha̱i desde nuʼbu̱ mi mu̱di bi mandaʼä na ʼTsu̱ʼtabi Ojä?

Nuʼbu̱ hinnä yaʼä bi mu̱di bi mandaʼä Jesús nubu̱ mahëʼtsi bi nja ʼna ra däsu̱ibu̱, nuʼä Jesús bi nsu̱hmu̱ʼä Zithü ʼne nuʼu̱ yu̱ ʼtso anxe̱. Nuʼä Zithü bi ʼbe̱ʼä ra nsu̱i, ʼne nuʼä Biblia ma ge bä ʼte̱ngua Ha̱i ko nuʼu̱ yu̱ ʼtso anxe̱ (Apocalipsis 12:9, 10, 12). Nuʼä Zithü emme kue̱ geʼtho pädi ge ya hinmi gü yu̱ pa di mʼbu̱i. Janangeʼä, emme o̱tyu̱ nʼtso ʼne emme di u̱mbä yu̱ jäʼi. ¡Njabu̱ emme xi yükua yu̱ nʼtso ʼne yu̱ nʼu̱mbi ua ximha̱i! Pe̱ nuʼä na ʼTsu̱ʼtabi Ojä ya mi ʼtsu̱tho dä juadi ga̱ʼthoʼu̱ yu̱ nʼtso.

GÄ PÄHMU̱ MANʼNA NANGEHNA

4. Nuʼu̱ yu̱ profesia bä ʼyëpu̱ ja Biblia bi nja nuʼä ra je̱ya 1914

BIDEO: Nuʼä ra ʼTsu̱ʼtabi Ojä bi mu̱di bi manda nuʼä ra je̱ya 1914 (5:02)

Nuʼbu̱ mayaʼbu̱ nuʼä Ojä bi japi dä ʼuï ʼna ra ʼti nuʼä Nabucodonosor, nuʼä ʼtsu̱ʼtabi ge mi mandabu̱ ja dähnini Babilonia. Nuʼä bi ʼuïʼä Nabucodonosor ʼne nuʼä bi manʼä Daniel geʼä bi njabu̱ na ʼtsu̱ʼtabiʼä Nabucodonosor ʼne nuʼä bi nja nubu̱ na ʼTsu̱ʼtabiʼä Ojä (dä mi nuui Daniel 4:17).a

Dä mi nuui Daniel 4:20-26. Mʼbe̱fa dä mi hyandui yu̱ dibujo pa gi thähmiʼu̱ yu̱ nʼta̱nni:

• (A) ¿ʼBe̱ʼä bi ʼuïʼä Nabucodonosor? (Dä mi nuui yu̱ bersikulo 20 ʼne 21).

• (B) ¿ʼBe̱ʼä bi ʼto̱rpäʼä ra za? (Dä mi nuui ä bersikulo 23).

• (C) ¿ʼBe̱ʼä mi ja dä thogi nuʼbu̱ mi guaʼu̱ “yoto yu̱ tiempo”? (Dä mi nuui ä bersikulo 26).

Nuʼä ra za bi ʼuïʼä Nabucodonosor ʼne nuʼä na ʼTsu̱ʼtabi Ojä

NUʼÄ RA PROFESIA (Daniel 4:20-36)

Nuʼbu̱ mi ʼtsu̱ʼtabi

• (A) ʼNa ra za emme xi nhëʼtsi

Bi ʼtse̱rpäʼä ra ʼtsu̱ʼtabi

• (B) “Dä mi ʼye̱xuiʼä ra za” ʼne gi hye̱hmi dä “thogi yoto yu̱ tiempo”

Bi nʼtsu̱ʼtabi maho̱nʼä

• (C) “Gi nʼtsu̱ʼtabi maho̱nʼä”

Na mu̱di ge bi njaʼä profesia:

• (D) ¿Toʼoʼä ra za mambu̱ ja profesia? (Dä mi nuui ä bersikulo 22).

• (E) ¿Hanja himbi thoki bi nʼtsu̱ʼtabiʼä Nabucodonosor? (Dä mi nuui Daniel 4:29-33).

• (F) ¿ʼBe̱ʼä bi jaʼä Nabucodonosor nuʼbu̱ mi thoʼu̱ “yoto yu̱ tiempo”? (Dä mi nuui Daniel 4:34-36).

NA MU̱DI GE BI NJAʼÄ PROFESIA

Nuʼbu̱ mi ʼtsu̱ʼtabi

• (D) Nuʼä Nabucodonosor ʼtsu̱ʼtabibu̱ Babilonia

Bi ʼtse̱rpäʼä ra ʼtsu̱ʼtabi

• (E) Nuʼä Nabucodonosor bi mpumbëni nuʼä ra je̱ya 606 a.e.c. ʼne himbi za̱ bi nʼtsu̱ʼtabi yoto nje̱ya

Bi nʼtsu̱ʼtabi maho̱nʼä

• (F) Nuʼä Nabucodonosor bi dämbëni ʼne maho̱nʼä bi nʼtsu̱ʼtabi

Na yondi ge bi njaʼä profesia:

• (G) ¿Toʼoʼu̱ nja tengüʼä ra za? (Dä mi nuui 1 Crónicas 29:23).

• (H) ¿Hanja himbi thoki bi nʼtsu̱ʼtabiʼu̱? ¿Hanja di pähmu̱ ge nuʼu̱, ya hinmi ʼtsu̱ʼtabiʼu̱ nuʼbu̱ mi mʼbu̱kua Ha̱iʼä Jesús? (Dä mi nuui Lucas 21:24).

• (I)  ¿Njämʼbu̱ bi manda maho̱nʼä nuna ra ʼtsu̱ʼtabi ʼne hapu̱?

NA YONDI GE BI NJAʼÄ PROFESIA

Nuʼbu̱ mi ʼtsu̱ʼtabi

• (G) Nuʼä Ojä bi huanhni yu̱ israelita pa di mandabu̱ na ʼTsu̱ʼtabi

Bi ʼtse̱rpäʼä ra ʼtsu̱ʼtabi

• (H) Nuʼä ra hnini Jerusalén bi mba ma juadi nuʼä ra je̱ya 607 a.e.c.; nuʼu̱ yu̱ ʼtsu̱ʼtabi israelita himbi manda 2,520 nje̱ya

Bi nʼtsu̱ʼtabi maho̱nʼä

• (I) Nuʼä ra je̱ya 1914 nuʼä Jesús bi mu̱di bi mandabu̱ na ʼTsu̱ʼtabiʼä Ojä

5. Bi mpa̱ʼä nximha̱i nuʼä ra je̱ya 1914

Dä mi nuui ä BIDEO.

BIDEO: Bi mpa̱ʼä nximha̱i nuʼä ra je̱ya 1914 (1:10)

Nuʼä Jesús bi ma ʼbe̱ʼä di njaua ra nximha̱i nuʼbu̱ bi mu̱di bi mandaʼä. Dä mi nuui Lucas 21:9-11 ʼne manhmi nangehna:

• Nangeʼä mambu̱ ja Biblia ʼbe̱ʼä xkä nu o ʼbe̱ʼä xkä ʼyo̱de ge thogi nuʼu̱ yu̱ pa jabu̱ya?

Nuʼä apostol Pablo bi ma ʼbe̱pu̱ di nja yu̱ nʼto̱ʼteʼu̱ yu̱ jäʼi nuʼbu̱ na nze̱gi yu̱ pa ge di mandase̱ʼu̱ yu̱ jäʼi. Dä mi nuui 2 Timoteo 3:1-5 ʼne manhmi nangehna:

• ¿Ha ngübu̱ gi nu ge o̱tyu̱ jäʼi tengü mambu̱ ja Biblia?

6. Dä mi ʼyüdi ge gi ëʼkyëi ge ya di mandaʼä na ʼTsu̱ʼtabi Ojä

Dä mi nuui Mateo 24:3, 14 ʼne manhmi nangehna:

• ¿ʼBe̱ʼä ma ʼbe̱fi pa nʼto̱ʼte ge üdi ge ya di manda ra ʼTsu̱ʼtabi Ojä?

• ¿ʼBe̱ʼä dä za̱ gi ʼyo̱ʼte pa gi fa̱ʼtsi nuna ra ʼbe̱fi?

Ya di manda na ʼTsu̱ʼtabi Ojä bu̱ mahëʼtsi, ʼne ya mi ʼtsu̱tho dä manda ga̱ʼtho ra noho ra nximha̱i. Dä mi nuui Hebreos 10:24, 25 ʼne manhmi nangehna:

• ¿ʼBe̱ʼä ja gä o̱thu̱ya ge di pähmu̱ ge di ʼbu̱hmu̱ na nze̱gi yu̱ pa?

NUʼÄ MANʼNA JAʼTSE̱DI

Nuʼä mambu̱ ja Biblia ʼne nuʼä di nuhu̱ua ja nximha̱i ürkähu̱ ge ya di manda na ʼTsu̱ʼtabi Ojä. Nuʼbu̱ di predikahu̱ nangeʼä na ʼTsu̱ʼtabi Ojä ʼne di pa̱ha̱bu̱ ja yu̱ mpe̱ti di ühmu̱ ge di ëʼkyëihu̱ ge ya di mandaʼä na ʼTsu̱ʼtabi Ojä.

Nuʼä dä pähmu̱

• ¿ʼBe̱ʼä bi nja nuʼbu̱ mi guaʼu̱ yoto yu̱ tiempo ge mambu̱ na libroʼä Daniel?

• ¿Hanja gi ëʼkyëi ge nuʼä na ʼTsu̱ʼtabiʼä Ojä bi mu̱di bi manda nuʼä ra je̱ya 1914?

• ¿ʼBe̱pu̱ dä za̱ gi ʼyüdi ge gi fa̱xä na ʼTsu̱ʼtabi Ojä?

DÄ MI PÄDI MANʼNA

Dä mi pädi nuʼä manʼu̱ yu̱ bäsu̱kuä, ge ʼtëmbi historiador, ʼne nuʼä manʼu̱ miʼra yu̱ jäʼi nange ʼbe̱pu̱ xi mpa̱di nuna ra nximha̱i desde nuʼä ra je̱ya 1914.

“Nuʼu̱ yu̱ je̱ya ge manʼna xi nʼtso yu̱ nʼto̱ʼteʼu̱ yu̱ jäʼi” (¡Despertad!, abril ge 2007)

Dä mi pädi ʼbe̱pu̱ bi pa̱rpä ra mʼbu̱i ʼna nʼyohu̱ nuʼä mambu̱ Mateo 24:14.

“Emme mi ho gä nʼyënʼä beisbol” (La Atalaya, núm. 3 2017)

¿Hanja di pähmu̱ ge nuʼä mambu̱ kapitulo 4 ge Daniel ma nangeʼä na ʼTsu̱ʼtabi Ojä?

“¿Njämʼbu̱ bi mu̱di bi mandaʼä ra ʼTsu̱ʼtabi Ojä? (Ra mu̱di xe̱ki)” (La Atalaya, 1 oktubre ge 2014)

¿Hanja di ënhmu̱ ge nubu̱ libro Daniel kapitulo 4 ma ge nuʼu̱ “yoto yu̱ tiempo” bi guadi nuʼä ra je̱ya 1914?

“¿Njämʼbu̱ bi mu̱di bi mandaʼä ra ʼTsu̱ʼtabi Ojä? (Ra yoho xe̱ki)” (La Atalaya, 1 nobiembre ge 2014)

Ya di mpe̱ʼä na ʼTsu̱ʼtabi Ojä. Ya mi ʼtsu̱tho nuʼä na ʼTsu̱ʼtabi Ojä dä ʼueke ga̱ʼtho nuʼä ʼbe̱ʼä xi nʼtso jaua Ha̱i. Mba gä nuhu̱ ʼra yu̱ njäpi bä häʼä na ʼTsu̱ʼtabi Ojä ʼne gi nu ge nuʼä dä ʼyo̱ʼtä na ʼTsu̱ʼtabi Ojä emme dä hyüʼtä ni mu̱i.

1. ¿ʼBe̱ʼä dä ʼyo̱ʼtä na ʼTsu̱ʼtabi Ojä pa di mʼbu̱manho maho̱nʼäʼu̱ yu̱ jäʼi?

Nuʼbu̱ bi njaʼä na Däsu̱iʼä Ojä, nuʼä ʼtëmbi Armagedón, nuʼä ʼTsu̱ʼtabi Jesús dä juaʼu̱ yu̱ ʼtso jäʼi ʼne nuʼu̱ yu̱ ʼtsu̱ʼtabi ʼbu̱kua Ha̱i (Apocalipsis 16:14, 16). ʼNe gepu̱ di njaʼä mambu̱ ja Biblia ge ya hindi mʼbu̱ʼu̱ yu̱ ʼtso jäʼi (Salmo 37:10). Nuʼä na ʼTsu̱ʼtabiʼä Ojä dä ʼyo̱ʼte ge ga̱ʼthoʼu̱ yu̱ jäʼi ge di mʼbu̱kua Ha̱i di mʼbu̱manho, ʼne njoʼo toʼo dä ʼyo̱ʼte ra nʼtso o nuʼä hinnä nthe̱ui (dä mi nu Isaías 11:4).

2. ¿ʼBe̱pu̱ di njaʼä ra mʼbu̱i nuʼbu̱ bi ʼto̱ʼtua na pa̱ha̱ Ojä nuua Ha̱i?

Nuʼbu̱ bi mandaua na ʼTsu̱ʼtabi Ojä di njaʼä mambu̱ ja Biblia ge ëna ge “nuʼu̱ yu̱ jäʼi ge o̱ʼte nuʼä xi nho, di mʼbu̱kua ha̱i pa mazäi” (Salmo 37:29). Dä mi bëni ʼbe̱pu̱ di njaʼä ra mʼbu̱i nuʼbu̱ bi zo̱nʼä ra pa ge ga̱ʼtho yu̱ jäʼi di nhuëki ʼna ngü ʼna, di nhokjäʼi, ʼne dä mädi o dä neʼä Jeoba. Njoʼo toʼo di nza̱manʼu̱ ʼne ga̱ʼtho yu̱ jäʼi di mʼbu̱i pa nzäntho. ¡Genhmä emme mahotho nuʼbu̱ bi njabu̱!

3. ¿ʼBe̱ʼä dä ʼyo̱ʼtä na ʼTsu̱ʼtabi Ojä nuʼbu̱ bi juaʼu̱ yu̱ ʼtso jäʼi?

Nuʼbu̱ nuʼä Jesús bi juadi ga̱ʼthoʼu̱ yu̱ ʼtso jäʼi dä manda 1,000 nje̱ya. Nuʼu̱ yu̱ paʼu̱, nuʼä Jesús ʼne nuʼu̱ 144,000 yu̱ jäʼi ge di nʼtsu̱ʼtabihu̱ʼä, dä ze̱ʼu̱ yu̱ jäʼi ge ʼrahmiʼtsu̱ dä bo yu̱ ʼtsoki, asta geʼbu̱ te ma ʼtsoki di njaʼu̱. Nuʼbu̱ bi guaʼä 1,000 nje̱ya ge di nʼtsu̱ʼtabiʼä, ga̱ʼtho ra Ha̱i dä gohi ge di nhuädo̱ni, ʼne ga̱ʼtho yu̱ jäʼi emme di njohya geʼtho dä de̱nni nuʼu̱ yu̱ nʼtëdiʼä Jeoba. ʼNe nubu̱ya nuʼä Jesús dä kospä ra ʼTsu̱ʼtabiʼä na Ta Jeoba. ʼNe nuʼä Ojä Jeoba, emme dä mba ma ʼtëspi, njoʼo toʼo dä ʼkämanʼu̱ o dä manyu̱ fe̱hni nangeʼä (Mateo 6:9, 10). ʼNe kextä dä fädi ge nuʼä Jeoba ʼna ra hogä ʼTsu̱ʼtabiʼä ʼne ge nzäntho honi nuʼä ra nho pa nangeʼä na hnini ʼne di jamansü. ʼNe mʼbe̱fa nuʼä Jeoba dä juaʼä Zithü ʼne nuʼu̱ yu̱ ʼtso anxe̱, ʼne kextä dä juaʼu̱ nuʼu̱ hindä ne dä ʼyëspä na ʼTsu̱ʼtabi (Apocalipsis 20:7-10). Nuʼu̱ yu̱ njäpi bä hä na ʼTsu̱ʼtabi Ojä di nja pa nzäntho.

GÄ PÄHMU̱ MANʼNA NANGEHNA

4. Nuʼä ra ʼTsu̱ʼtabi Ojä dä juaʼu̱ yu̱ ʼtsu̱ʼtabi ʼbu̱kua Ha̱i

“Nuʼu̱ yu̱ nʼyohu̱ di mandase̱ʼu̱ yu̱ minʼyohu̱ui pa di nʼu̱mbäse̱ʼu̱” (Eclesiastés 8:9). Nuʼä Jeoba dä ʼyo̱ʼte ge nuʼä na ʼTsu̱ʼtabi dä hoki ga̱ʼtho ʼbe̱ʼä ma nʼtso xi ʼyo̱ʼtu̱ yu̱ jäʼi.

Dä mi nuui Daniel 2:44 ʼne 2 Tesalonicenses 1:6-8, ʼne manhmi nangehna:

• ¿ʼBe̱ʼä dä ʼyo̱rpä Jeoba ʼne Jesús nuʼu̱ yu̱ ʼtsu̱ʼtabi ʼbu̱kua Ha̱i ʼne nuʼu̱ yu̱ mfa̱ʼtsihu̱?

• ¿Ko nangeʼä ge xkä pähya nangeʼä Jeoba ʼne Jesús, ¿ha gi ëʼkyëi ge xi nhobu̱ ni hyäxä gue̱ndaʼu̱?

5. Ho̱nʼtä Jesús sa̱ di Nʼtsu̱ʼtabi

Nuʼbu̱ bi nʼtsu̱ʼtabiua Ha̱iʼä Jesús emme xi ngü yu̱ njäpi bä hä. Dä mi nuui ä BIDEO pa gi pähmu̱ ʼbe̱pu̱ bi ʼyüʼä Jesús ge majuäni ne di ze̱ʼu̱ yu̱ jäʼi, ʼne ʼbe̱pu̱ dä hyonʼä na ʼtse̱di bi ünnä Ojä pa bä hä yu̱ njäpiua Ha̱i.

BIDEO: Nuʼä Jesús bi ʼyüdi nuʼä dä ʼyo̱ʼtä na ʼTsu̱ʼtabi Ojä (1:13)

Nuʼä bi ʼyo̱ʼtä Jesús nuʼbu̱ mi nʼyoua Ha̱i bi ʼyürkähu̱ nuʼä dä ʼyo̱ʼte nuʼbu̱ bi nʼtsu̱ʼtabiua. Nangeʼu̱ gaʼtho yu̱ njäpi bä hä na ʼTsu̱ʼtabi Ojä, ¿ndaʼu̱ manʼna gi ne gi nu? Dä mi nuui ga̱ʼtho yu̱ texto nubu̱ ma nuʼä dä ʼyo̱ʼtä Jesús.

6. Emme mahotho ʼbe̱pu̱ gä mʼbu̱hmu̱ nuʼbu̱ bi manda na ʼTsu̱ʼtabi Ojä

BIDEO: ʼNa ra mʼbu̱i mahotho bä ëpu̱ (4:38)

Dä mi nuui Salmo 145:16 ʼne manhmi nangehna:

• ¿ʼBe̱ʼä gi mbëni ge nuʼä Jeoba di ünni ga̱ʼthoʼä honʼu̱ yu̱ jäʼi?

NUʼÄ MANʼNA JAʼTSE̱DI

Nuʼä na ʼTsu̱ʼtabi Ojä di hokna ha̱i di ʼbu̱hmu̱, dä gohi ge ʼna nhuädo̱ni ʼne di mʼbu̱kua yu̱ jäʼi ge dä thänneʼä Jeoba ʼne dä ʼyo̱ʼte na pa̱ha̱.

Nuʼä dä pähmu̱

• ¿ʼBe̱ʼä dä ʼyo̱ʼtä na ʼTsu̱ʼtabiʼä Ojä pa dä ʼtëspäʼä Jeoba?

• ¿Hanja dä za̱ gä ka̱mfënihu̱ ge nuʼä na ʼTsu̱ʼtabi Ojä dä ʼyo̱ʼte ga̱ʼtho nuʼä mambu̱ ja Biblia?

• Nangeʼä ga̱ʼtho nuʼä ma dä ʼyo̱ʼte na ʼTsu̱ʼtabi Ojä, ¿ndaʼä manʼna gi numanho?

DÄ MI PÄDI MANʼNA

Dä mi pädi ʼbe̱ʼä ä ra Däsu̱iʼä Ojä ge ʼtëmbi Armagedón.

“¿ʼBe̱ʼä ä ra Däsu̱iʼä Ojä, nuʼä ʼtëmbi Armagedón?” (Bä ʼyëpu̱ jw.org)

Dä mi pädi nuʼä dä thogi nuʼu̱ 1,000 nje̱ya ge di Nʼtsu̱ʼtabiʼä Jesús ʼne nuʼä dä thogi nuʼbu̱ bi guadi ge di nʼtsu̱ʼtabi.

“¿ʼBe̱ʼä dä thogi nuʼbu̱ bi thäspä gue̱ndaʼu̱ yu̱ jäʼi nuʼbu̱ bi njaʼä ʼtëmbi ra Juisioʼä Ojä?” (La Atalaya, 1 septiembre ge 2012)

Dä mi bëni ge nuʼi ʼne ni familia ya gi ʼbu̱hmibu̱ ja nhuädo̱ni.

Dä mi bëni ge ya gi ʼbu̱pu̱ ja nhuädo̱ni (1:50)

Dä mi pädi nangeʼä ʼna ra nʼyohu̱ ge mi ne dä hokyu̱ hëi ʼne yu̱ dü mu̱i jaua nximha̱i. ʼNe nuʼä ʼbe̱ʼä bi ze̱di dä pa̱hna nʼyomfëni.

“Nuʼä Biblia bi ze̱ʼu̱ ge bi pa̱hyu̱ mʼbu̱i” (La Atalaya, 1 enero ge 2012)