NXA̱DI 28
Dä mi ʼyüdi ge gi ünna jamädiʼä Jeoba ʼne Jesús nangeʼä xi ʼyo̱ʼte pa nangeʼi
¿ʼBe̱ʼä gi mbëni nuʼbu̱ ʼna ni amigo di ʼrai ʼna regalo emme mahotho? Dä za̱tho emme gi johya ʼne gi ünna jamädiʼä ni amigo nangeʼä ra regalo bi ʼrai. Nuʼä Jeoba ʼne Jesús bi ʼrakju̱ ʼna regalo ge thogi emme mahotho. ¿ʼBe̱ʼä ma regalo bi ʼrakju̱ʼu̱? Ge nuʼä Jesús bi ünʼä na te pa dä ñanju̱. Nuya gä pähmu̱ ʼbe̱pu̱ dä za̱ gä ünhnu̱ jamadiʼä Jeoba ʼneʼä Jesús.
1. ¿ʼBe̱pu̱ dä za̱ gä ünhnu̱ jamädiʼä Ojä ʼne Cristo nangeʼä xi ʼyo̱ʼte pa nangekju̱?
Nuʼä Biblia ëna ge nuʼä toʼo dä ʼyüdi ge ëʼkyëiʼä Jesús dä za̱ di mʼbu̱i pa nzäntho (Juan 3:16). ¿ʼBe̱pu̱ dä za̱ dä ʼyüʼä ʼna ge ëʼkyëiʼä Jesús? Hingä ho̱nʼtho gä manhmu̱ ge di ëʼkyëihu̱ʼä Jesús, kextä di ühmu̱ ge di ëʼkyëihu̱ʼä nuʼbu̱ di u̱rpähu̱ gue̱ndaʼu̱ yu̱ nʼtsofo nuʼbu̱ jaʼä di o̱thu̱ (Santiago 2:17). Nuʼbu̱ di te̱nhnu̱ o di o̱thu̱ nuʼu̱ yu̱ nʼtëdiʼä Jesús ʼne di te̱nhnu̱ ga̱ʼthoʼu̱ yu̱ nʼtsofo, geʼä o̱ʼte ge manʼna gä sixmanhohu̱ʼä ʼne nuʼä Ojä Jeoba (dä mi nu Juan 14:21).
2. ¿Njämʼbu̱ dä za̱ gä ünhnu̱ jamädiʼä Jeoba ʼne Jesús nangeʼä xi ʼyo̱ʼte pa nangekju̱?
Nuʼä ra xüi ante dä düʼä Jesús bi xiʼu̱ yu̱ disipulo ʼbe̱pu̱ mi sa̱ dä ünʼä jamädiʼu̱ nangeʼä ra te dä üni. Nuʼä ra xüiʼä nuʼä Jesús bi ʼyo̱ʼte nuʼä ra Nzibdeʼä Cristo o kextä ʼtëmbi Conmemoración o Gä mbënhmu̱ nuʼbu̱ mi düʼä Cristo (1 Corintios 11:20). Nuʼä Jesús bi mandabiʼu̱ yu̱ apostol ge dä bëni nuʼä ra pa ge dä ünʼä na te, ʼne kextä geʼä di manda ge dä ʼyo̱ʼte ngübu̱ nuʼu̱ yu̱ ʼyëʼkyëi majuäni. Nuʼä Jesús bi manda: “ʼNe ʼnandi ngü ʼnandi ʼbu̱ gi sihu̱, gi mbënju̱” (Lucas 22:19). Nuʼbu̱ gi pabu̱ ja Conmemoración gi üdi ge emme gi ünna jamädiʼä Jeoba ʼne Jesús ge emme di huëgähu̱.
GÄ PÄHMU̱ MANʼNA NANGEHNA
Gä pähmu̱ ʼbe̱ʼä manʼna dä za̱ gä o̱thu̱ pa gä ünhnu̱ jamädiʼä Jeoba ʼne Jesús nange emme di huëgähu̱. ʼNe gä pähmu̱ hanja emme jaʼtse̱di ge gä mbënhmu̱ nuʼbu̱ mi düʼä Cristo.
3. Gä ühmu̱ ge majuäni di ünhnu̱ jamädiʼä Jeoba ʼne Jesús
Dä mi bëni ge gä sobu̱ ja ʼna däthe pe̱ hingi pädi gi nxanthe, pe̱ ʼna ra jäʼi di ze̱ʼi ʼne dä gu̱xiʼi. ¿Ha gi pumbëniʼä ra mäte bi ʼyo̱ʼtäʼä ra jäʼi? ¿Ha gi hyoni ʼbe̱pu̱ gi kospäʼä ra mäte bi ʼyo̱ʼtäʼä ra jäʼi?
Ga̱ʼthogähu̱ di tüpfu̱ nuʼä ma tehu̱ʼä Jeoba. Dä mi nuui 1 Juan 4:8-10 ʼne manhmi nangehna:
¿Hanja ʼna ra regalo ge nuʼä Jesús bi üni nuʼä ra te pa dä ñanju̱?
¿ʼBe̱ʼä gi mbëni nangeʼä bi ʼyo̱ʼtä Jeoba ʼne Jesús pa nangeʼi?
¿ʼBe̱pu̱ dä za̱ gä ünhnu̱ jamädiʼä Jeoba ʼne Jesús nangeʼä bi ʼyo̱ʼtu̱ pa nangekju̱? Dä mi nuui 2 Corintios 5:15 ʼne kextä 1 Juan 4:11 ʼne 5:3. Nuʼbu̱ gä manhmu̱ ʼna ngü ʼna yu̱ bersikulo, manhmi nangehya:
¿ʼBe̱pu̱ dä za̱ gä ünhnu̱ jamädiʼä Jesús?
4. Di häkpähu̱ na ejemploʼä Jesús
Nuʼbu̱ di häkpähu̱ na ejemploʼä Jesús kextä ngübu̱ di ünhnu̱ jamädi nangeʼä bi ʼyo̱ʼte pa nangekju̱. Dä mi nuui 1 Pedro 2:21 ʼne manhmi nangehna:
¿ʼBe̱ʼä dä za̱ gi ʼyo̱ʼte pa gi te̱nna ra ejemploʼä Jesús?
Nuʼä Jesús emme mi ho di nxa̱ʼä na Nhman Ojä ʼne mi xiʼu̱ miʼra nuʼä mi päpu̱ ʼne kextä mi ho dä ze̱ʼu̱ yu̱ jäʼi.
5. Gä mpe̱tihu̱ pa gä mbënhmu̱ nuʼbu̱ mi düʼä Cristo
Pa dä za̱ gä pähmu̱ nuʼä bi thogi nuʼbu̱ mu̱ditho mi ʼto̱ʼte nubu̱ ra Zibdeʼä Cristo, dä mi nuui Lucas 22:14, 19, 20. ʼNe mʼbe̱fa manhmi nangehna:
¿ʼBe̱ʼä bi ʼto̱rbu̱ ja ra Nzibdeʼä Cristo?
¿ʼBe̱ʼä ne dä manʼä ra thühme ʼne ra bino ge pa mahyonibu̱ ra Zibdeʼä Cristo? (Dä mi nuui yu̱ 19 ʼne 20).
Nuʼä Jesús mi ne ge ʼnandi ʼna je̱ya nuʼu̱ yu̱ disipulo dä bëni nuʼä ra Zibde bi ʼyo̱ʼtä pa dä fëni nuʼbu̱ mi dü. Janangeʼä nuʼu̱ yu̱ testigo ä Jeoba di mpe̱tihe ga̱ʼtho yu̱ je̱ya ʼne di o̱the tengütho mambu̱ ja Biblia pa gä mbënhme nuʼbu̱ mi düʼä Jesús. Pa gi pädi ʼbe̱pu̱ di o̱the nuna ra mpe̱ti, dä mi nuui ä BIDEO. ʼNe mʼbe̱fa manhmi nangehna:
¿ʼBe̱ʼä ʼto̱rbu̱ ja Conmemoración?
Nuʼä ra thühme ʼne nuʼä ra bino ʼna ra nʼtüti nangeʼä Jesús. Nuʼä ra thühme ʼne dä ma ge tengüʼä ra ngo̱ʼkyëi o ra doʼyoʼä Jesús ge te ma ʼtsoki mi ja ge bi üni pa ga̱ʼthogähu̱. ʼNe nuʼä ra bino ne dä ma ge tengüʼä na ji bi ma̱ni.
NUʼÄ ʼBE̱ʼÄ MANʼU̱ ʼRA YU̱ JÄʼI: “Ho̱ntho gi ʼyëʼkyëiʼä Cristo dä za̱ gi ñanhni te”.
¿ʼBe̱pu̱ dä za̱ gi hyonʼä mambu̱ Juan 3:16 ʼne Santiago 2:17 pa gi xiʼu̱ miʼra yu̱ jäʼi ge hingä ho̱ntho ja dä ʼyëʼkyëiʼä ʼna Cristo pa ge dä ñanhna te ʼna?
NUʼÄ MANʼNA JAʼTSE̱DI
Nuʼbu̱ di pa̱ha̱bu̱ ja Conmemoración di ünhnu̱ jamädiʼä Jesús nangeʼä bi ünhna te pa nangekju̱.
Nuʼä dä pähmu̱
¿ʼBe̱pu̱ dä za̱ gi ʼyüdi ge majuäni gi ëʼkyëiʼä Jesús?
¿Ha gi ne gi ünna jamädiʼä Jeoba ʼne Jesús nangeʼä xi ʼyo̱ʼte pa nangeʼi? ¿ʼBe̱ʼä dä za̱ gi ʼyo̱ʼte pa gi ünna jamädiʼä Jeoba ʼne Jesús?
¿Hanja emme jaʼtse̱di ge gä mpe̱tihu̱ pa gä mbënhmu̱ nuʼbu̱ mi düʼä Cristo?
DÄ MI PÄDI MANʼNA
Dä mi päpu̱ ja bideo nuʼä mahyoni gä o̱thu̱ nangeʼä ge bi düʼä Cristo.
Dä mi pädi manʼna nangeʼä ra nʼtëʼkyëi majuäni ʼne ʼbe̱pu̱ dä za̱ gi ʼyüdi ge majuäni ja ni nʼtëʼkyëi.
“Gä ëʼkyëʼihu̱ ge majuäni di nja nuʼä xi manʼä Jeoba ge dä ʼyo̱ʼte” (La Atalaya, oktubre ge 2016)
Dä mi pädi ʼbe̱pu̱ ʼna xisu bi pa̱di na mʼbu̱i nuʼbu̱ mi bädi ge bi ünhna teʼä Jesús. “Nuya di johya ʼne di ʼbu̱manho geʼtho te ʼbe̱ʼä xi nʼtso di o̱ʼte”.
“Nuʼä Biblia bi ze̱ʼu̱ ge bi pa̱hyu̱ mʼbu̱i” (La Atalaya, 1 agosto ge 2011)
Dä mi pädi hanja hingi güʼu̱ siʼä thühme ʼne ra bino nuʼbu̱ bi njaʼä Conmemoración.