NXA̱DI 29

¿ʼBe̱ʼä di jaʼu̱ xi ndü?

Edición impresa

¿Ha xi dü ʼna ni familia o ʼna ni amigo? Nuʼbu̱ gä thogi ʼna dümu̱i nʼtse̱di, dä za̱tho gi nʼa̱nni “¿ʼBe̱ʼä di jaʼbu̱ bi dü ʼna? ¿Ha dä za̱ gä nu maho̱nʼä nuʼä ma familia o ma amigo ge bi dü?”. Nuna nxa̱di jaua ʼne nuʼä nxa̱di 30 gä pähmu̱ ʼbe̱ʼä mambu̱ ja Biblia nangehya yu̱ nʼta̱nni ʼne ʼbe̱pu̱ hürkä ma mu̱ihu̱ʼä mambu̱.

1. ¿ʼBe̱ʼä di jaʼu̱ xi ndü?

Nuʼä Jesús bi ma ge nuʼbu̱ bi dü ʼna tengüʼbu̱ äʼtho ʼna. ¿Hanja ngübu̱ bi manʼä Jesús? Nuʼbu̱ ʼna jäʼi toʼma ʼtähä, hingi pädi ʼbe̱ʼä thopu̱ ʼbe̱ni o ʼbe̱ʼä thopu̱ thi. Nuʼbu̱ bi dü ʼna jäʼi, ya hindi nʼu̱mbi ʼne te ʼbe̱ʼä sa̱. Nubu̱ Biblia ma: “Nuʼu̱ xi ndü ya njuäntho te pädi” (dä mi nu Eclesiastés 9:5).

2. ¿Hanja hürkä ma mu̱ihu̱ ge di pähmu̱ nuʼä di jaʼu̱ xi ndü?

Xi ngü yu̱ jäʼi sü dä dü, ʼne kextä süʼu̱ xi ndü. Nuʼbu̱ ʼneʼi gi nsü, emme dä hyüʼtä ni mu̱i nuʼä mambu̱ ja Biblia nangeʼä di jaʼu̱ xi ndü. Nuʼä Jesús bi ʼyëna ge nuʼä majuäni geʼä dä ze̱kju̱ʼä ʼne dä hyürkä ma mu̱ihu̱ (Juan 8:32). Xi ngü yu̱ nijä o yu̱ mpe̱ti ma ge nuʼbu̱ bi dü ʼna jäʼi nuʼä na alma thoktho ʼbu̱i, ge ʼbu̱ʼu̱ pabu̱ mahëʼtsi ʼne ʼbu̱ʼu̱ miʼra pabu̱ nidü. Pe̱ nubu̱ ja Biblia hingä ngübu̱ ma; hingi ma ge nuʼä na almaʼu̱ yu̱ jäʼiʼbu̱ bi dü, sa̱ di mʼbu̱i pa nzäntho o di nʼu̱mbi pa nzäntho. Janangeʼä, nuʼu̱ xi ndü hindi nʼu̱mbäʼu̱, geʼtho nuʼu̱ te pädi, te sa̱ ʼne te mbënʼu̱. Nangeʼä, hingi ja gä sühu̱ʼu̱ xi ndü geʼtho te ʼbe̱ʼä sa̱ dä ʼyo̱rkähu̱ʼu̱. Njabu̱, hinmahyoni ge gä a̱pfu̱ʼä Ojä nangeʼu̱ xi ndü. ʼNe hinmahyoni gä so̱kpähu̱ yu̱ yo, o gä po̱spähu̱ nuʼä dä zi, geʼtho nuʼu̱ hingi handi ʼne hingi siʼä pa mʼbo̱spe.

Xi ngüʼu̱ yu̱ jäʼi ëna ge ñahu̱ʼu̱ xi ndü, pe̱ hinmajuäniʼä, geʼtho nuʼü te sa̱ ʼbe̱ʼä dä ʼyo̱ʼtu̱, ya njuäntho te päʼu̱. Nuʼu̱ toʼo ëna ge ñahu̱ʼu̱ xi ndü, hingä geʼu̱ xi ndü ñahu̱ʼu̱, geʼu̱ yu̱ ʼtso ndähi o yu̱ ʼtso anxe̱ ñahu̱ʼu̱. Geʼu̱ ha̱ʼtu̱ yu̱ jäʼi ʼne di japi dä bëni ge geʼu̱ xi ndü ñahu̱ʼu̱. Janangeʼä, nuʼbu̱ di pähmu̱ nuʼä mambu̱ ja Biblia ya hindä hya̱kju̱ʼu̱ yu̱ ʼtso anxe̱. Nuʼä Jeoba hingi ne ge gä nzohmu̱ʼu̱ xi ndü, geʼtho nuʼbu̱ di o̱thu̱ ngübu̱ geʼu̱ yu̱ ʼtso ndähi di ñahu̱ ʼne emme nʼtsütho ge gä o̱thu̱ ngübu̱ (dä mi nu Deuteronomio 18:10-12).

GÄ PÄHMU̱ MANʼNA NANGEHNA

Gä pähmu̱ manʼna ʼbe̱ʼä mambu̱ ja Biblia nangeʼä di jaʼu̱ xi ndü. Kextä gä pähmu̱ ʼbe̱pu̱ manʼna dä za̱ gä ka̱mfënihu̱ ge nuʼä Ojä di huëgähu̱ ʼne ge hindi u̱mbäʼu̱ xi ndü.

ʼNa ra nʼyohu̱ ʼneʼu̱ yu̱ ʼtu̱hni tü yu̱ mu̱i geʼtho bi düʼä na xisu. Nuʼu̱ yu̱ amigo ʼne yu̱ familia di hyu̱ni.

3. Nuʼä di jaʼu̱ xi ndü

Ga̱ʼtho ra noho ra ximha̱i di hye̱stätho ʼbe̱ʼä ëʼkyëiʼu̱ yu̱ jäʼi nangeʼä di jaʼu̱ xi ndü. Pe̱ hingä ga̱ʼthoʼä ëʼkyëiʼu̱ yu̱ jäʼi majuäniʼä.

¿Xibu̱ gi ʼbu̱i ʼbe̱ʼä manʼu̱ yu̱ jäʼi ge di jaʼu̱ xi ndü?

Pa gi pädi nuʼä mambu̱ Biblia, dä mi nuui ä BIDEO.

BIDEO: ¿ʼBe̱ʼä di ja nuʼu̱ xi ndü? (ʼna xe̱kitho) (1:19)

Yu̱ dibujo ge nuʼä ra bideo ¿ʼBe̱ʼä di ja nuʼu̱ xi ndü? (ʼna xe̱kitho)ʼ: 1. ʼNa ra jäʼi ge bi dü, ʼbe̱mbu̱ ja ospital. 2. ʼNa ra nʼyohu̱ äpu̱ ja ʼna tren.

Dä mi nuui Eclesiastés 3:20 ʼne manhmi nangehna:

Nangeʼä mambu̱ ja bersikulo, ¿ʼbe̱ʼä di jaʼu̱ yu̱ jäʼi nuʼbu̱ bi dü?
Nuʼbu̱ bi dü ʼna jäʼi, ¿ha thogi tetho nuʼä na ndähi o nuʼä na alma?

Nuʼä Biblia ma nuʼbu̱ mi düʼä ʼna ra hogä amigoʼä Jesús, nuʼä Lázaro. ¿ʼBe̱ʼä bi manʼä Jesús nuʼbu̱ mi düʼä Lázaro? Dä mi nuui Juan 11:11-14 ʼne manhmi nangehna:

¿ʼBe̱ʼä ma ejemplo bi manʼä Jesús pa dä ʼyüdi ʼbe̱ʼä di jaʼu̱ xi ndü?
¿ʼBe̱ʼä xa̱ngähu̱ nuʼä ejemplo bi manʼä Jesús nangeʼu̱ xi ndü?
¿ʼBe̱ʼä gi mbëni nangeʼä mambu̱ ja Biblia ge di jaʼu̱ xi ndü?

4. Nuʼä Biblia di ze̱kju̱ ge hingä ëʼkyëihu̱ʼu̱ yu̱ fe̱hni

Nuʼbu̱ di pähmu̱ nuʼä majuäni nangeʼu̱ xi ndü, di ze̱kju̱ ge hingä nsühu̱ ʼne hindä tha̱kju̱. Dä mi nuui Eclesiastés 9:10 ʼne manhmi nangehna:

¿Ha sa̱ jaʼä dä ʼyo̱rkähu̱ʼu̱ xi ndü?

Nuya ge di pähmu̱ nuʼä mambu̱ ja Biblia nangeʼä di jaʼu̱ xi ndü, di pähmu̱ ge te ni mba ge dä ʼbo̱späʼä dä ziʼu̱, dä mba ma orabi o dä ʼto̱rpä mixä. Dä mi nuui Isaías 8:19 ʼne Apocalipsis 4:11, ʼne manhmi nangehna:

¿ʼBe̱ʼä gi mbëni ge sa̱ʼä Jeoba nuʼbu̱ handi pa nʼto̱rpe na ngopaʼu̱ xi ndü o pa nʼta̱pi mfa̱ʼtsiʼu̱?

Yu̱ dibujo nangeʼu̱ yu̱ ngopaʼu̱ o̱ʼtyu̱ jäʼi pa dä ʼyëspäʼu̱ xi ndü: 1. ʼNa ra nʼyohu̱ di dändiähmu̱ ʼne di orabiʼä na familia bi dü, nubu̱ ja ʼna jädo ge tixiu̱ ʼbo̱ʼtse. 2. Hñu yu̱ nʼyohu̱ ge neʼi. 3. Xi ngü yu̱ jäʼi di nthëʼtsi ʼne ja yu̱ hmite pa nuʼä na ngopaʼu̱ xi ndü. — Nuʼä mambu̱ ja Biblia nangeʼu̱ xi ndü di ze̱kju̱ hingä o̱thu̱ nuʼä o̱ʼtu̱ yu̱ jäʼi pa nangeʼu̱ xi ndü.

5. Nuʼä ge di pähmu̱ nuʼä di jaʼu̱ xi ndü hürkä ma mu̱ihu̱

Xi ngüʼu̱ yu̱ nijä ʼne yu̱ mpe̱ti ëna ge nuʼbu̱ bi düʼu̱ yu̱ ʼtso jäʼi emme dä nʼu̱mbi nangeʼu̱ yu̱ nʼtso bi ʼyo̱ʼte. Pe̱ hürkä ma mu̱ihu̱ ge di pähmu̱ ge njoʼo di nʼu̱mbi nuʼbu̱ bi dü, xindä geʼu̱ yu̱ jäʼi bi ʼyo̱ʼte nuʼä thogi emme xi nʼtso. Dä mi nuui Romanos 6:7 ʼne manhmi nangehna:

Nuʼä Biblia ëna ge nuʼbu̱ bi dü ʼna jäʼi, gepu̱ jüʼti ga̱ʼthoʼu̱ yu̱ ʼtsoki. Nangehna xtä pähmu̱ya, ¿ha gi ëʼkyëi nuʼä manʼu̱ yu̱ jäʼi ge di nʼu̱mbäʼu̱ xi ndü geʼtho jüʼtu̱ yu̱ ʼtsoki bi ʼyo̱ʼte?

Nuʼbu̱ manʼna di nxa̱hmu̱ʼä Biblia, di pähmu̱ ge nuʼä Jeoba hindi u̱mbäʼu̱ xi ndü. Dä mi nuui Deuteronomio 32:4 ʼne 1 Juan 4:8, ʼne manhmi nangehna:

Tengü manʼu̱ yu̱ bersikulo; xiʼä Ojä, ¿ha di u̱mbäʼu̱ yu̱ jäʼi xi ndü?
¿Ha hüʼtä ni mu̱i nuʼä xkä pädi nangeʼu̱ xi ndü? ¿Hanja?

NUʼÄ ʼBE̱ʼÄ MANʼU̱ ʼRA YU̱ JÄʼI: “Di sü ʼbe̱ʼä gä jaʼbu̱ dä tü”.

¿ʼBe̱ʼä ma texto ge Biblia dä za̱ gi xiʼä ʼna jäʼi ge mbëni ngübu̱?

NUʼÄ MANʼNA JAʼTSE̱DI

Nuʼu̱ xi ndü te ʼbe̱ʼä sa̱ʼu̱, te mbëni ʼne te ʼbe̱ʼä sa̱ dä ʼyo̱ʼtu̱, geʼtho nuʼbu̱ bi dü ʼna ja gepu̱ juapu̱ ga̱ʼtho. Nuʼu̱ xi ndü ya hindi nʼu̱mbi ʼne te ʼbe̱ʼä ma nʼtso dä za̱ dä ʼyo̱rpäʼu̱ yu̱ jäʼi.