NXA̱DI 30
¡Dä za̱ di mʼbu̱i maho̱nʼäʼu̱ ni familia ʼne ni amigo ge xi ndü!
Nuʼbu̱ bi dü ʼna ma familiahu̱ o ʼna ma amigohu̱ emme xi nʼu̱ di mbënhmu̱ ʼne emme tü ma mu̱ihu̱. Nangeʼä, nuʼä Biblia ma ge nuʼä ra ndäte tengütho ma nsu̱ihu̱ʼä (1 Corintios 15:26). Nubu̱ nxa̱di 27, gä päpu̱ ge nuʼä Jeoba dä juadi ʼne di ʼuekä ra ndäte. ¿Pe̱ ʼbe̱ʼä dä jaʼu̱ yu̱ jäʼi ge ya bi dü? Nuua nxa̱di gä pähmu̱ nuʼä manʼä Jeoba ge dä ʼyo̱ʼte: ge dä xoʼtsi miyonetho yu̱ jäʼi pa di mʼbu̱i maho̱nʼä ʼne hinma ʼnandi dä dü. ¡Emme mahotho ge di mʼbu̱i maho̱nʼäthoʼu̱ xi ndü! ¿Ha majuäni dä za̱ di njana? Xiʼu̱ yu̱ jäʼi ge di mʼbu̱i maho̱nʼä, ¿ha dä mba mahëʼtsiʼu̱ ua di mʼbu̱kua ha̱i?
1. ¿ʼBe̱ʼä dä ʼyo̱ʼtä Jeoba pa nangeʼu̱ ma familiahu̱ ʼne nuʼu̱ ma amigohu̱ ge bi dü?
Nuʼä Jeoba emme ne di ünni maho̱nʼä ra teʼu̱ yu̱ jäʼi ge bi dü. Nuʼä Biblia ma nangeʼä ʼna ra nʼyohu̱ ge na thü Job, nuʼä emme mi ja ra nʼtëʼkyëi, mi ka̱mfëni ge nuʼbu̱ dä dü nuʼä Jeoba dä xoʼtsi maho̱nʼä. Nuʼä Job bi ʼyëna: “Nuʼi gi nzoki ʼne nuga̱ gä thädi” (dä mi nu Job 14:13-15).
2. ¿Hanja di pähmu̱ ge nuʼu̱ yu̱ jäʼi bi dü dä za̱ di mʼbu̱i maho̱nʼä?
Nuʼbu̱ mi nʼyoua ha̱iʼä Jesucristo, nuʼä Jeoba bi ünna ʼtse̱di pa dä za̱ dä xoxu̱ yu̱ jäʼi xi ndü. Janangeʼä, nuʼä Jesús bi za̱ bi xoxä ʼna zu̱ ʼtu̱hmute ge mi pe̱ʼtsä 12 nje̱ya ʼne na ʼtsu̱nʼtu̱ ʼna zu̱ ʼranxü (Marcos 5:41, 42; Lucas 7:12-15). ʼNe mʼbe̱fa, nuʼä Jesús bi xoxä na amigo Lázaro, madägeʼä ya xi thogi goho yu̱ pa ge xi ʼta̱gi pe̱ nuʼä Jesús bi xoʼtsi. Mu̱ditho, bi zoʼä Ojä pa dä ʼya̱pä mfa̱ʼtsi, ʼne bi ʼyëmbi: “¡Lázaro, bä po̱ni!”. “ʼNe nuʼä xi dü bä po̱mbu̱ ja ra nʼya̱gi”, ¡ʼne bi mʼbu̱i maho̱nʼä! (Juan 11:43, 44). Genhma emme bi njohyaʼu̱ yu̱ familia ʼneʼu̱ yu̱ amigoʼä Lázaro nuʼbu̱ mi hyandi ge bi nuhu̱.
3. ¿Ha dä za̱ di mʼbu̱i maho̱nʼä nuʼu̱ ni familia ʼneʼu̱ ni amigo ge bi dü?
Nuʼä Biblia ma ge di mʼbu̱i maho̱nʼäʼu̱ xi ndü (Hechos 24:15). Nuʼu̱ yu̱ jäʼi ge bi xoxä Jesús himbi mbabu̱ mahëʼtsi (Juan 3:13). Nuʼu̱ yu̱ jäʼi ge bi xoxä Jesús emme bi njohya ge bi mʼbu̱i maho̱nʼäua Ha̱i. Tengü bi ʼyo̱ʼtä Jesús mayaʼbu̱, ya mi ʼtsu̱tho dä xoʼtsi yu̱ miyonetho yu̱ jäʼi ge xi ndü. Nuʼu̱, di mʼbu̱i pa nzänthoua Ha̱i, ge xti gohi ʼna nhuädo̱ni. Nuʼä Jesús bi ʼyëna ge ga̱ʼthoʼu̱ xi ndü ge obu̱ na nʼyomfëniʼä Ojä di mʼbu̱i maho̱nʼä, ʼne asta di nuʼu̱ yu̱ jäʼi ge njämʼbu̱ dä pähmu̱ (Juan 5:28, 29, nota).
GÄ PÄHMU̱ MANʼNA NANGEHNA
Gä pähmu̱ hanja dä za̱ gä ka̱mfënihu̱ nuʼä mambu̱ ja Biblia ge nuʼä Ojä dä xoxu̱ xi ndü. ʼNe gä nuhu̱ hanja hürkä ma mu̱ihu̱ nuʼä dä ʼyo̱ʼtä Ojä.
4. Nuʼä Jesús bi ʼyüdi ge sa̱ dä xoxu̱ xi ndü
Dä mi pädi manʼna nangeʼä bi ʼyo̱ʼtä Jesús nuʼbu̱ mi xoxä Lázaro. Dä mi nuui Juan 11:14 ʼne 38-44, ʼne manhmi nangehna:
¿Hanja di pähmu̱ ge majuäni xi düʼä Lázaro? (Dä mi nuui ä 39).
Geʼbu̱ xti mba mahëʼtsiʼä Lázaro nubu̱ bi ʼbu̱ Ojä, ¿ha gi mbëni ge xi nhoʼä bi ʼyo̱ʼtä Jesús ge bä si maho̱nʼäua ja Ha̱iʼä Lázaro?
5. ¡Xi ngüʼu̱ di mʼbu̱i maho̱nʼä!
Dä mi nuui Salmo 37:29 ʼne manhmi nangehna:
¿Hapu̱ di mʼbu̱ʼu̱ yu̱ miyonetho yu̱ jäʼi ge di mʼbu̱i maho̱nʼä?
Nuʼä Jesús hingä ho̱ntho dä xoxu̱ yu̱ jäʼi ge bi dänneʼä Jeoba, kextä dä xoʼtsi miʼra yu̱ jäʼi. Dä mi nuui Hechos 24:15 ʼne manhmi nangehna:
Nuʼbu̱ bi nanʼtsi nuʼu̱ xi ndü, ¿toʼoʼä gi ne gi nu maho̱nʼä?
Tengütho ʼna ra ta ge hingi hëi dä ʼya̱ʼä na ʼtsu̱nʼtu̱ ge ähä, njarbu̱thoʼä Jesús, pa nangeʼä hingi hëi dä xoxu̱ xi ndü.
6. Dä hyüʼtä ni mu̱i ge di mʼbu̱i maho̱nʼäʼu̱ xi ndü
Nuʼä mambu̱ ja Biblia nangeʼä ge bi jaʼä na ʼtixüʼä Jairo, emme xi hyürpä na mu̱iʼu̱ yu̱ jäʼi ge xi dü ʼna ra familia. Dä mi pädi nangehna bi thogi nubu̱ Lucas 8:40-42 ʼne 49-56.
Ante ge dä xoxä Jesús nuʼä na ʼtixüʼä Jairo, nuʼä Jesús bi ʼyëmbi: “O gi nsü, pe̱ dä mi ʼyëʼkyëi ʼne di nuʼä ni ʼtixü” (dä mi nuui ä bersikulo 50). ¿Hanja dä za̱ dä hyüʼtä ni mu̱i ge di mʼbu̱i maho̱nʼäʼu̱ xi ndü...
... nuʼbu̱ bi dü ʼna ni familia o ni amigo?
... nuʼbu̱ gi sa̱ ra ndäte o ne dä thoʼi?
Dä mi nuui ä BIDEO ʼne manhmi nangehna:
¿ʼBe̱pu̱ xi hyürpä na mu̱iʼu̱ yu̱ taʼä Phelicity ge di mʼbu̱i maho̱nʼäʼu̱ xi ndü?
NUʼÄ ʼBE̱ʼÄ MANʼU̱ ʼRA YU̱ JÄʼI: “Hingi sa̱ gä ëʼkyëi ge di mʼbu̱i maho̱nʼä xi ndü”.
¿ʼBe̱ʼä gi mbënge?
¿Ndaʼu̱ yu̱ texto dä za̱ gi ʼyütä ʼna jäʼi ge üdi ge majuäni di mʼbu̱i maho̱nʼäʼu̱ xi ndü?
NUʼÄ MANʼNA JAʼTSE̱DI
Nuʼä Biblia ma ge miyonetho yu̱ jäʼi ge xi ndü di mʼbu̱i maho̱nʼä. Nuʼä Jeoba nepe ge di mʼbu̱i maho̱nʼäʼu̱ xi ndü ʼne xi ʼyünnä ʼtse̱diʼä Jesús pa dä xoxu̱ xi ndü.
Nuʼä dä pähmu̱
¿Hanja dä za̱ gä ka̱mfënihu̱ ge nuʼä Jeoba ʼne Jesús ne dä xoxu̱ xi ndü?
¿Hapu̱ di mʼbu̱ʼu̱ yu̱ jäʼi ge di mʼbu̱i maho̱nʼä, ha gepu̱ mahëʼtsi o nuua Ha̱i? ¿Hanja gi mbëni ngübu̱?
¿Hanja gi ëʼkyëi ge di mʼbu̱i maho̱nʼäʼu̱ ni familia ʼne ni amigo ge bi dü?
DÄ MI PÄDI MANʼNA
Dä mi nu ʼra yu̱ nʼtsofo ge dä ze̱ʼi hindä thogi dä dü ni mu̱i.
“ʼRa yu̱ nʼtsofo ge dä ze̱ʼu̱ bi dü ʼna ra familia o na amigo” (¡Despertad!, núm. 3 2018)
¿Xiʼä Biblia ha dä za̱ dä hyürpä na mu̱i ʼna ra jäʼi ge bi dü na familia o na amigo?
Dä mi pädi ʼbe̱pu̱ dä za̱ gi ze̱ʼä ʼna tu̱hni o bätsi ge bi dü ʼna ra familia o na amigo.
¿Ha ʼbu̱ʼu̱ di nuhü pa dä mba mahëʼtsi? ¿Ha ʼbu̱ʼu̱ njämʼbu̱ di nuhü?
“¿ʼBe̱ʼä ne dä manʼä Biblia nuʼbu̱ ma ge di nuhü maho̱nʼäʼu̱ xi ndü?” (Bä ʼyëpu̱ jw.org)