NXA̱DI 40
Gä mʼbu̱hmu̱ tengü neʼä Ojä
ʼNa ʼra hogä mama pembä na he na ʼtu̱hni, di xu̱di ʼne di ʼuini xi nho pa dä mba xa̱di. Ne ge nuʼä na ʼtu̱hni di ntemanho, nangeʼä emme di jamansü. Nuʼu̱ yu̱ ta o̱ʼte ngübu̱ üdi ge majuäni di huëʼku̱ yu̱ ʼtu̱hni. Nuʼä ma Tahu̱ Jeoba kextä emme di huëgähu̱, nangeʼä ne ge gä njamansühu̱ ne te gä o̱thu̱ ge dä ʼtsonʼä ma jäʼihu̱, ma nzakihu̱ ʼne ma nʼyomfënihu̱. Nuʼä Jeoba ne ge nzäntho xtä nhobu̱ gä mʼbu̱hmu̱ ʼne xtä nho ma nʼyomfënihu̱ ʼne ma nʼto̱ʼtehu̱. Nuʼbu̱ di o̱thu̱ ngübu̱, kextä pa nʼtëspiʼä Ojä.
1. ¿ʼBe̱ʼä ja gä o̱thu̱ pa ge xtä nho ma doʼyohu̱ o ma ngo̱ʼkyëihu̱?
Nuʼä Jeoba ënju̱: “Xtä nhothoʼähu̱ geʼtho xi nhoga̱” (1 Pedro 1:16). Nuʼä Jeoba ne ge nzäntho xtä nho ma nʼyomfënihu̱, ma ngo̱ʼkyëihu̱ o ma doʼyohu̱ ʼne nubu̱ hapu̱ di ʼbu̱hmu̱. Ja ge di nhi ʼna o di mpeʼtä ʼna, gä penhmu̱ ma hehu̱, gä jokju̱ ma ngünhmu̱ ʼne nuʼbu̱ di tuhu̱ ʼna karro ja gä peʼthu̱. Kextä ja gä fa̱xu̱ nuʼbu̱ pa njoki o pa mʼbeʼteʼä ma Ngü Mpe̱tihu̱. Nuʼbu̱ di o̱thu̱ ngübu̱, dä za̱tho nuʼu̱ miʼra yu̱ jäʼi kextä dä ne ge dä dänneʼä Jeoba (2 Corintios 6:3, 4).
2. ¿ʼBe̱ʼä hingi ja gä o̱thu̱ pa hingä ʼtsonhmu̱ ma jäʼihu̱ ʼne ma nʼyomfënihu̱?
Nuʼä Biblia ëna: “ʼNe gä ʼuehmu̱ [o gä ʼuekju̱] ʼbe̱ʼä i ne di ʼtsonhma jäʼihu̱, ʼne ma mu̱ihu̱” (2 Corintios 7:1). Nangeʼä, te ʼbe̱ʼä ja gä o̱thu̱ ge dä ʼtsonʼä ma jäʼihu̱ ʼne ma nʼyomfënihu̱. ʼNe kextä hindi japfu̱ dä yu̱ʼti yu̱ nʼyomfëni xi nʼtso nubu̱ ma ñahu̱ o ma mu̱ihu̱. ʼNe nuʼbu̱ di o̱thu̱ ngübu̱ di johyabäbu̱ na mu̱iʼä Jeoba. (Salmo 104:34). Kextä hindi manhmu̱ yu̱ ʼtsore ʼne yu̱ ñamanʼtso (dä mi nu Colosenses 3:8).
¿ʼBe̱ʼä manʼna dä za̱ di ʼtsoni ma jäʼihu̱ ʼne ma nʼyomfënihu̱? Jaʼu̱ ʼra yu̱ ʼyëthi ʼne yu̱ paxi ge sa̱ dä ʼtsonʼä ma jäʼihu̱ ʼne ma nʼyomfënihu̱. Tengü, hindi su̱ʼthu̱ ʼyu̱i geʼtho di ʼtsonma jäʼihu̱, ʼne kextä hindi ju̱nsu̱ paxi ʼne hindi sihu̱ yu̱ ʼyëthi ge di ʼtsongä ma ñahu̱. Nuʼbu̱ di jamansühu̱ ma ngo̱ʼkyëihu̱, ngübu̱ di ünhnu̱ jamädiʼä Jeoba nangeʼä ra te bi ʼrakju̱. ʼNe kextä hindi o̱thu̱ nuʼä ʼtëmbi masturbación, nuʼbu̱ ʼna xisu o ʼna nʼyohu̱ tho̱se̱ na jäʼi pa dä bëni ge ʼbu̱ʼä ohmi. ʼNe hindi o̱hmu̱ o di nuhu̱ pornografía, nubu̱ hapu̱ nʼtoʼti o po̱nyu̱ jäʼi ge te he yu̱ he o ge ohmiʼu̱ miʼra (Salmo 119:37; Efesios 5:5). Geʼbu̱ gä nzäi gi o̱ʼtä nuʼä hingi numanhoʼä Jeoba, dä za̱ gi hye̱ʼu̱ yu̱ nʼto̱ʼte xi nʼtso ko na mfa̱ʼtsiʼä Jeoba (dä mi nu Isaías 41:13).
GÄ PÄHMU̱ MANʼNA NANGEHNA
Gä pähmu̱ hanja nuʼbu̱ di jamansühu̱ ma jäʼihu̱, mʼbeʼte ma ngünhmu̱ pa nʼtëspiʼä Jeoba ʼne ʼbe̱pu̱ gä he̱hmu̱ʼu̱ yu̱ nʼto̱ʼte xi nʼtso.
3. Di ëspähu̱ʼä Jeoba nuʼbu̱ xi nho ma jäʼihu̱ ʼne nuʼbu̱ mʼbeʼteʼu̱ di pe̱su̱
Nuʼbu̱ di nuhu̱ʼu̱ yu̱ nʼtëdi bi mandabiʼä Jeoba nuʼu̱ yu̱ israelita, di pähmu̱ ge pa nangeʼä emme jaʼtse̱di ge xtä nho ma jäʼihu̱, ma ngünhmu̱ ʼne ga̱ʼtho ʼbe̱ʼä di pe̱su̱. Dä mi nuui Éxodo 19:10 ʼne 30:17-19, ʼne manhmi nangehna:
¿ʼBe̱pu̱ ürkähu̱ʼu̱ yu̱ bersikulo ge pa nangeʼä Jeoba emme jaʼtse̱di ge xtä nho ma jäʼihu̱, ma ngünhmu̱ ʼne ga̱ʼtho ʼbe̱ʼä di pe̱su̱?
¿ʼBe̱ʼä ja gä o̱thu̱ pa nzäntho xtä nho ma jäʼihu̱, ma ngünhmu̱ ʼne ga̱ʼtho ʼbe̱ʼä di pe̱su̱?
Mahyoni gä häkju̱ tiempo pa ge di mbaxʼti ʼne di mʼbeʼte ma ngünhmu̱ ʼne ga̱ʼtho ʼbe̱ʼä di pe̱su̱. Emme jaʼtse̱di gä o̱thu̱na xindä geʼbu̱ di hyoyahu̱ o ja ma mbe̱tihu̱. Dä mi nuui ä BIDEO ʼne manhmi nangehna:
Nuʼbu̱ mʼbeniʼu̱ ma hehu̱ ʼne ga̱ʼtho ʼbe̱ʼä di käxu̱ nuʼbu̱ di predikahu̱, nuʼbu̱ handi ngübu̱ʼu̱ yu̱ jäʼi ¿hanja ge nuna dä za̱ dä ʼyo̱ʼte ge yu̱ jäʼi dä ne dä bäʼä Ojä?
4. Dä mi hye̱ʼu̱ yu̱ nʼto̱ʼte ge dä za̱ dä ʼtsonnä ni jäʼi o ni doʼyo
Nuʼä Jeoba za̱ dä ze̱kju̱ gä he̱hmu̱ ho̱nʼtä go ʼbe̱ʼä ma nʼto̱ʼte xi nʼtso.
Geʼbu̱ ya gi su̱ʼtä ʼyu̱i, gi si yu̱ ʼyëthi ge di nʼtsonnä ni ña ʼne ni jäʼi o gi ju̱nʼtsu̱ yu̱ ʼtso paxi, ya gi pädi ge xi nhëi gi hye̱ʼu̱. Nuʼä dä ze̱ʼi pa gi hye̱gi nuya yu̱ nʼto̱ʼte, geʼä ge gi nʼyomfëni ʼbe̱pu̱ di ʼtsonnä ni mʼbu̱i nuʼä gi si o nuʼä gi ju̱nʼtsi. Dä mi nuui Mateo 22:37-39, ʼne manhmi ʼbe̱pu̱ nuʼä ra ʼyu̱i, yu̱ ʼyëthi ʼne yu̱ ʼtso paxi o̱ʼte...
... ge gä sohmu̱ʼä Jeoba.
... ga nsu̱hmu̱ o gä sohmu̱ʼu̱ ma familia ʼne ma amigohu̱.
Dä mi ʼyo̱rpä nʼyomfëni ʼbe̱ʼä dä za̱ gi ʼyo̱ʼte pa gi hye̱ʼu̱ yu̱ nʼtoʼte xi nʼtso.a Dä mi nuui ä BIDEO.
Dä mi nuui Filipenses 4:13 ʼne manhmi nangehna:
Geʼbu̱ ʼna ra jäʼi dä orabiʼä Jeoba, dä manʼä Biblia, dä mba yu̱ mpe̱ti, ¿ha gi mbëni ge dä za̱ dä ze̱di dä hye̱ʼu̱ yu̱ nʼto̱ʼte xi nʼtso?
5. Hingi hyandi ʼne hingi ʼyo̱ʼtu̱ yu̱ nʼto̱ʼte ge di ʼtsonnä ni nʼyomfëni
Dä mi nuui Colosenses 3:5 ʼne manhmi nangehna:
¿Hanja emme xi nʼtso pa nangeʼä Jeoba ge gä hanthu̱ yu̱ foto o yu̱ bideo nubu̱ hapu̱ po̱nhyu̱ jäʼi ge hingi he yu̱ he, ge ho̱nʼtä toʼo ohmi, ʼne gä pe̱nhnu̱ o gä hänhmu̱ yu̱ mensaje tengüʼu̱? ¿Hanja kextä emme xi nʼtso nuʼä ʼtëmbi masturbasion?
¿Ha po̱manho nuʼu̱ yu̱ nʼtëdi di ʼrakju̱ʼä Jeoba pa hingä ʼtsonhmu̱ ma jäʼihu̱ ʼne ma nʼyomfënihu̱? ¿Hanja?
Dä mi pädi ʼbe̱ʼä dä za̱ dä ʼyo̱ʼtä ʼna pa hingä mbënhmu̱ yu̱ nʼyomfëni xi nʼtso. Dä mi nuui ä BIDEO.
Nuʼä Jesús bi ʼyürkähu̱ ʼna nʼtüti pa dä xa̱ngähu̱ ʼbe̱ʼä ja gä o̱thu̱ geʼbu̱ di nehu̱ ge nzäntho xtä nho ma mʼbu̱ihu̱. Dä mi nuui Mateo 5:29, 30 ʼne manhmi nangehna:
Nuʼä Jesús himbi ne bi ma ge ja gä u̱mbähu̱ ma ngo̱ʼkyëihu̱, pe̱ jaʼä ja gä o̱thu̱ pa gä sänhmu̱ ma jäʼihu̱. ¿ʼBe̱ʼä ja gä o̱thu̱ pa hingä mbënhmu̱ yu̱ nʼyomfëni xi nʼtso?b
Nuʼbu̱ gi o̱ʼtä ʼtse̱di ge gi sopu̱ʼu̱ yu̱ nʼyomfëni xi nʼtso, dä za̱ gi ka̱mfëni ge nuʼä Jeoba emme di johya nangeʼä gi o̱ʼte ʼne di ze̱ʼi. Dä mi nuui Salmo 103:13, 14 ʼne manhmi nangehna:
¿Ha gi hëmbi gi hye̱gi ʼra yu̱ nʼyomfëni ʼne ʼra yu̱ nʼto̱ʼte xi nʼtso? Geʼbu̱ ngübu̱ gi thogi, ¿ha gi ëʼkyëi ge dä za̱ di ze̱ʼi nuya yu̱ texto ʼne dä hyüʼtä ni mu̱i pa gi thoki gi ʼyo̱ʼtä ne Ojä? ¿Hanja gi mbëni ngübu̱?
Ogi mbëni ge hindä za̱ gi hye̱ʼä gi o̱ʼte
Dä za̱tho gi mbëni, “Njämʼbu̱ dä za̱ gä pa̱ʼä ma nʼtoʼte”. Pe̱ dä mi bëni nangeʼä ʼna nʼyohu̱ ge tihi pa di ntähä, ʼne tängi o ta̱gi, pe̱ nuna hingi ne dä ma ge ya bi ʼbe̱di o ge ja dä du̱ʼmi maho̱nʼä ge di ntihi. Njarbu̱tho, geʼbu̱ ya xkä soʼä ʼna nʼto̱ʼte xi nʼtso mi o̱ʼte, pe̱ dä za̱tho maho̱nmatho gä ʼyo̱ʼte, pe̱ hingi ne dä ma ge ya njämʼbu̱ gi pa̱ʼä ni nʼto̱ʼte. ʼNe hingi mbëni ge te ni mbatho nuʼä ga̱ʼtho xkä ʼyo̱ʼte. Ja gä mbënhmu̱ ge nangeʼä ge di dädiʼtsokihu̱ jaʼbu̱ di ʼbe̱rpähu̱. Pe̱ nuna hingi ne dä ma ge njämʼbu̱ dä za̱ gä he̱hmu̱ ʼna ra nʼto̱ʼte xi nʼtso. ¡Gese̱ʼä Jeoba dä ze̱kju̱ gä he̱hmu̱ nuʼu̱ yu̱ nʼto̱ʼte ge hingi numanhoʼä!
NUʼÄ ʼBE̱ʼÄ MANʼU̱ ʼRA YU̱ JÄʼI: “Ya xtä nzänʼä di o̱ʼte, ʼne njämʼbu̱ dä za̱ gä he̱ʼä di o̱ʼte”.
¿ʼBe̱ʼä ma texto dä za̱ gä üʼthu̱ ʼna jäʼi ge mbëni ngübu̱ ʼne dä bädi ge nuʼä Jeoba dä za̱ dä ze̱di dä zoʼu̱ yu̱ nʼto̱ʼte?
NUʼÄ MANʼNA JAʼTSE̱DI
Di johyaʼä Jeoba nuʼbu̱ di jamansühu̱ ma ngo̱ʼkyëihu̱ ʼne te ʼbe̱ʼä xi nʼtso di ku̱ʼthu̱bu̱ ma jäʼihu̱, ma nʼyomfënihu̱ ʼne ma mu̱ihu̱.
Nuʼä dä pähmu̱
¿Hanja emme jaʼtse̱di ge gä mʼbu̱hmu̱ tengü numanhoʼä Jeoba?
¿ʼBe̱ʼä ja gä o̱thu̱ pa ge xtä nho nuʼä ma ngo̱ʼkyëihu̱, nubu̱ di ʼbu̱hmu̱ ʼne ʼbe̱ʼä ga̱ʼtho di pe̱su̱?
¿ʼBe̱ʼä ja gä o̱thu̱ pa ge nzäntho xtä nho ma nʼto̱ʼtehu̱ ʼne ma nʼyomfënihu̱?
DÄ MI PÄDI MANʼNA
Madägeʼä di hyoyahu̱, ¿ʼbe̱ʼä dä za̱ gä o̱thu̱ pa ge nzäntho xtä nho ma ngo̱ʼkyëkihu̱, nubu̱ hapu̱ di ʼbu̱hmu̱ ʼne ga̱ʼtho ʼbe̱ʼä di pe̱su̱?
Dä mi pädi ʼbe̱ʼä dä za̱ gi ʼyo̱ʼte pa hingi thoki gi su̱ʼtä ʼyu̱i.
“Nuʼä dä za̱ gi ʼyo̱ʼte pa gi hye̱ʼä ʼyu̱i” (¡Despertad!, mayo ge 2010)
Dä mi pädi nuʼu̱ yu̱ nʼu̱mbi thogi nangeʼä pornografía.
“¿Ha xi nʼtso o hingi ʼtsoʼä pornografía?” (La Atalaya, 1 agosto ge 2013)
Dä mi pädi nuʼä bi ʼyo̱ʼtä ʼna ra nʼyohu̱ pa dä hye̱gi dä hyanʼtä pornografía.
“Xi nhëi ʼbe̱pu̱ dä soʼä pornografía, pe genhma dä sogi” (La Atalaya, núm. 4 2016)
a Nubu̱ ja xe̱ki “Dä mi pädi manʼna” ge nuna nxa̱di jaua, nubu̱ ëna “Nuʼä dä za̱ gi ʼyo̱ʼte pa gi hye̱ʼä ʼyu̱i”, gi timbu̱ yu̱ nʼtsofo ge dä ze̱ʼi gi hye̱ʼä ʼna ra nʼto̱ʼte xi nʼtso.
b Pä gi pädi ʼbe̱pu̱ dä za̱ gi hye̱ʼä ra nʼto̱ʼte ge masturbasion, dä mi hyanʼtä kapitulo 25 ge nuʼä libro Nuʼu̱ yu̱ nʼta̱nni ge o̱ʼtu̱ yu̱ hmüte ʼne yu̱ ʼtsu̱nʼtu̱. Nuʼu̱ yu̱ nthädiʼu̱ yu̱ nʼta̱nni (bolumen 1), ge na thü “¿Ha dä za̱ gä he̱gi gä o̱ʼtä masturbasion?”.