NXA̱DI 47
¿Ha ya dä za̱ gi nxixña?
Nangeʼä xkä nxa̱pu̱ ja Biblia, ya xkä pädi xi ngü nangeʼä Jeoba. ʼNe dä za̱tho ya xkä sogi ʼra yu̱ nʼto̱ʼte ge hingi numanhoʼä Jeoba. Pe̱ dä za̱tho jaʼä ʼbe̱ʼä ge sänʼmiʼi ge gi da̱pni teʼä Jeoba ʼne gi nxixña. Nuua nxa̱di gä pähmu̱ ʼbe̱ʼä xi ze̱ʼu̱ ʼra yu̱ jäʼi pa ge di nxixña ʼne ʼbe̱ʼä dä za̱ gi ʼyo̱ʼte kextä pa gi nxixña.
1. ¿Ha ja gi pädi ga̱ʼtho ʼbe̱ʼä bä ʼyëpu̱ ja Biblia pa dä za̱ gi nxixña?
Pa dä za̱ gi nxixña ja gi pädi xi nho nuʼä majuäni bä ʼyëpu̱ ja Biblia (1 Timoteo 2:4). Pe̱ nuna hingi ne dä ma ge ja gi pädi ga̱ʼthoʼä bä ʼyëpu̱ ja Biblia. Asta nuʼu̱ yu̱ ʼyëʼkyëi ge ya mayaʼbu̱tho xi nxixña jaʼbu̱ ʼnandi ja di nxa̱di manʼna nuʼä mambu̱ ja Biblia (Colosenses 1:9, 10). Pe̱ mahyoni ge gi pädi nangeʼu̱ ʼra yu̱ nhma jaʼtse̱di ge bä ʼyëpu̱ ja Biblia. Nuʼu̱ yu̱ ansiano ge ʼyobu̱ ja mpe̱ti dä xiʼi geʼbu̱ ya xkä pädi ga̱ʼtho nuʼä mahyoni pa dä za̱ gi nxixña.
2. ¿ʼBe̱ʼä ja gi ʼyo̱ʼte ante ge gi nxixña?
Nuʼä Biblia ëna: “Dä mi pa̱hni nʼyomfënihu̱ ge gi da̱pni mu̱ihu̱ Ojä” (dä mi nu Hechos 3:19). Emme jaʼtse̱di ge gi ʼyo̱ʼtä mambu̱ ja Biblia pa dä za̱ gi nxixña. Pe̱ ¿ʼbe̱ʼä ne dä ma ge ja gi pa̱hni nʼyomfëni? ʼNe dä ma ge xi nʼu̱ gi mbëni nangeʼu̱ yu̱ ʼtsoki xkä ʼyo̱ʼte ʼne gi ʼya̱pä mpumbäteʼä Jeoba. ʼNe kextä ne dä ma ge njuäntho hingi ne gi ʼyo̱ʼte nuʼä hingi numanhoʼä Jeoba ʼne manʼna gi ne gi ʼyo̱ʼte nuʼä numanhoʼä. Pe̱ kextä ne dä ma ge nzäntho gi mba yu̱ mpe̱ti ʼne gi po̱ni gi predikauiʼu̱ yu̱ kü madägeʼä di ʼbe̱di gi nxixña.
3. ¿Hanja hingi ja gi sü ge gi nxixña?
ʼBu̱ʼu̱ ʼra hingi ne di nxixña geʼtho sü ge dä ʼyo̱ʼtä ʼna ʼtsoki o ge njuäntho hindä za̱ dä de̱nnu̱ yu̱ nʼtëdiʼä Jeoba. Pe̱ dä za̱tho jaʼbu̱ ʼnandi gä ʼbe̱rpähu̱, tengütho nuʼä bi thou̱ ʼra yu̱ nʼyohu̱ ʼne ʼra yu̱ xisu ge mambu̱ ja Biblia pe̱ ge njämʼbu̱ bi zoʼä Jeoba. Pe̱ ja gä mbënhmu̱ ge nuʼä Jeoba ya pädi ge di dädiʼtsokihu̱ ʼne ge za̱tho jaʼbu̱ ʼnandi gä ʼbe̱rpähu̱ (dä mi nu Salmo 103:13, 14). Pe̱ nuʼä Jeoba emme di johya geʼbu̱ handi ge di o̱thu̱ ʼtse̱di ge di o̱thu̱ʼä di manda. Nuʼä Jeoba dä ze̱ʼi pa gi ʼyo̱ʼtä na pa̱ha̱. Nuʼä Biblia ëna: “ʼNe hinyu̱ ʼbe̱ʼä ga̱ʼtho i ja ge dä za̱ di ʼuegähu̱ ge hingä nuhu̱ na nhuëkäte Ojä” (dä mi nu Romanos 8:38, 39).
GÄ PÄHMU̱ MANʼNA NANGEHNA
Gä nuhu̱ ge nuʼbu̱ manʼna gä pähmu̱ʼä Jeoba ʼne nuʼbu̱ gä hänhmu̱ʼä na mfa̱ʼtsi di ʼrakju̱, te ʼbe̱ʼä dä zängbähu̱ gä nxixñahu̱.
4. Dä mi pädi manʼna nangeʼä Jeoba
¿Hangü ja gi pädi nangeʼä Jeoba pa dä za̱ gi nxixña? Pa dä za̱ gi nxixña mahyoni gi päʼä Jeoba gi mädi o gi ne ʼne gi te̱nnu̱ yu̱ nʼtëdi. Dä mi nuui ä BIDEO pa gi pähmi ʼbe̱ʼä xi ʼyo̱ʼtu̱ ʼra yu̱ kü ge ga̱ʼtho na noho ra nximha̱i pa bi za̱ bi nxixña. ʼNe mʼbe̱fa manhmi nangehna:
¿ʼBe̱ʼä bi ze̱ʼu̱ ʼra yu̱ jäʼi pa bi za̱ bi nxixña?
Dä mi nuui Romanos 12:2 ʼne manhmi nangehna:
¿Ha jaʼä hingi ëʼkyëi ge bä ʼyëpu̱ ja Biblia? ¿Ha gi ëʼkyëi ge nuʼä üʼu̱ yu̱ testigo ä Jeoba majuäniʼä?
Geʼbu̱ jaʼä hingi ëʼkyëi ¿ʼbe̱ʼä dä za̱ gi ʼyo̱ʼte?
5. Hingi hye̱gi ge nuʼu̱ yu̱ hëi di neki dä zänʼmiʼi gi ʼyo̱rpä na ʼbe̱fiʼä Jeoba
Ga̱ʼthoʼu̱ toʼo ne dä da̱pna teʼä Jeoba ʼne di nxixña thoyu̱ hëi. Gä nuhu̱ nangeʼä bi thoʼä ʼna xisu, dä mi nuui ä BIDEO. ʼNe mʼbe̱fa manhmi nangehna:
¿ʼBe̱ʼä ma hëi bi thoʼä Narangerel nangeʼä ge mi ne dä ʼyo̱rpä na ʼbe̱fiʼä Jeoba?
Nangeʼä ge mi huëʼki o mi neʼä Jeoba ¿ʼbe̱pu̱ bi ze̱di ge te bi zänhmi dä ʼyo̱rpä na ʼbe̱fiʼä Jeoba?
Dä mi nuui Proverbios 29:25 ʼne 2 Timoteo 1:7, ʼne manhmi nangehna:
¿ʼBe̱ʼä di ze̱kju̱ pa di njaju̱ nzamu̱i ʼne te di hënju̱ ge gä o̱rpähu̱ na ʼbe̱fiʼä Jeoba?
6. Dä mi ka̱mfëni ge nuʼä Jeoba dä ze̱ʼi
Nuʼä Jeoba dä ze̱ʼi pa dä za̱ gi ʼyo̱rpä na pa̱ha̱ʼä. Dä mi nuui ä BIDEO ʼne manhmi nangehna:
¿Hanja mi sü di nxixñaʼä jäʼi po̱mbu̱ ja bideo?
¿ʼBe̱ʼä bi ze̱di pa ge manʼna dä ga̱mfëniʼä Jeoba?
Dä mi nuui Isaías 41:10, 13 ʼne manhmi nangehna:
¿Hanja sa̱ gi ka̱mfëni ge dä za̱ gi ʼyo̱ʼtä gä xiʼä Jeoba nuʼbu̱ mi da̱pni te?
7. Nzäntho gi ünna jamädiʼä Jeoba nangeʼä ra nhuëkäte xi ʼyüʼtiʼi
Nuʼbu̱ manʼna gä nʼyomfëni nangeʼä na nhuëkäteʼä Jeoba manʼna gi ne gi ünna jamädi ʼne gi ʼyo̱rpä na pa̱ha̱ pa mazäi. Dä mi nuui Salmo 40:5 ʼne manhmi nangehna:
Nangeʼu̱ ga̱ʼthoʼu̱ yu̱ regalo xi ʼraʼä ä Jeoba, ¿ndaʼä manʼna di muui pa nangeʼi?
Nuʼä profeta Jeremías emme mi neʼä Jeoba ʼne emme mi ëspä na Nhma, nangeʼä emme mi johya dä xiʼu̱ miʼra na Nhman Ojä. Nuʼä Jeremías bi ʼyëna ge nuʼä na Nhman Ojä mi japi di njohya, janangeʼä mi xiʼu̱ miʼra nange na Nhman Ojä (Jeremías 15:16). Nuya, dä mi thähya yu̱ nʼtanni:
¿Hanja emme mahotho ʼne emme di muui ge di testigo ä Jeoba ʼna?
¿Ha gi ne gi nxixña pa dä za̱ gi testigo ä Jeoba?
¿Ha jaʼä zäʼmiʼi ge gi testigo ä Jeoba?
¿ʼBe̱ʼä mahyoni gi ʼyo̱ʼte pa dä za̱ gi nxixña?
NUʼÄ ʼBE̱ʼÄ MANʼU̱ ʼRA YU̱ JÄʼI: “Di sü ge hindä za̱ gä su̱di gä o̱ʼte ga̱ʼthoʼä a̱ʼpä Jeobaʼu̱ ya bi nxixña”.
¿Ha ngübu̱ gi mbëni?
NUʼÄ MANʼNA JAʼTSE̱DI
Nuʼä Jeoba dä ze̱ʼi pa ge te ʼbe̱ʼä dä zäʼmiʼi o dä hënʼi ge gi nxixña.
Nuʼä dä pähmu̱
¿Ha emme mahyoni ge xi ngü gi päʼä Biblia pa dä za̱ gi nxixña?
¿ʼBe̱ʼä jaʼtse̱di gi ʼyo̱ʼte ante ge gi nxixña?
¿Hanja hingi ja gi sü ge gi nxixña?
DÄ MI PÄDI MANʼNA
Dä mi nʼyomfëni hanja gi ne gi nxixña.
Dä mi pädi ʼbe̱ʼä dä za̱ gi ʼyo̱ʼte geʼbu̱ jaʼä di hënʼi o zänʼmiʼi ge gi nxixñaʼ.
“¿Ha hingä za̱ gä nku̱mdehega̱ʼbu̱?” (La Atalaya, marso ge 2019)
Dä mi pädi ʼbe̱ʼä bi ze̱ʼä ʼna nʼyohu̱ pa dä za̱ di nxixña.
ʼNa nʼyohu̱ na thü Ataa hinmi pädi geʼbu̱ ya mi ja di nxixña. Dä mi pädi ʼbe̱ʼä bi ze̱di pa ge di nxixña.