NXA̱DI 44
¿Ha numanho Ojä ga̱ʼthoʼu̱ yu̱ ngopa pa nʼto̱ʼte?
Nuʼä Jeoba ne ge gä njohyahu̱, ʼne numanho ge jaʼbu̱ ʼnandi gä o̱thu̱ yu̱ ngopa. Pe̱ ¿ha numanho Ojä ga̱ʼthoʼu̱ yu̱ ngopa ge pa nʼto̱ʼte? ¿ʼBe̱pu̱ dä za̱ gä ühmu̱ ge majuäni di ne gä espähu̱ nuʼä mbënʼä Ojä?
1. ¿Hanja nuʼä Ojä hingi numanho ga̱ʼthoʼu̱ yu̱ ngopa ge pa nʼto̱ʼte?
Xi ngü yu̱ ngopa ge o̱tyu̱ jäʼi nuʼu̱ yu̱ pa jabu̱ ge hingi numanhoʼä Ojä, ʼne hingi te̱nnä bä ʼyëpu̱ ja Biblia, geʼtho ge̱se̱ʼu̱ yu̱ jäʼi bä sa̱nni. Nuʼu̱ ʼra yu̱ ngopa ge o̱tyu̱ jäʼi, bä sa̱nnu̱ yu̱ nʼtëʼkyëi hinmajuäni, pe̱ kextä ja miʼra yu̱ ngopa ge di thänspi ko nuʼä o̱tyu̱ bädi. ʼNe ja miʼra yu̱ ngopa ge üdi ge nuʼbu̱ bi dü ʼna jäʼi po̱xna alma. Kextä ʼbu̱hyu̱ jäʼi ge o̱tyu̱ ngopa geʼtho mbëni ge nuʼbu̱ hindä ʼyo̱ʼtä ngopa, ëʼkyëi ge dä thohyu̱ ʼyänthi. O ʼbu̱ʼu̱ miʼra yu̱ jäʼi ge o̱tyu̱ ngopa pa ge emme di nja yu̱ mënthi (Isaías 65:11). Janangeʼä, hindi hyonyathohu̱ hanja nuʼä Jeoba ëmʼpu̱ yu̱ me̱fi: “Dä mi ʼuehmu̱bu̱, […] ʼne ʼyo gi sa̱hu̱ ʼbe̱ʼä xi nʼtso” (2 Corintios 6:17).a
2. ¿ʼBe̱ʼä mbënʼä Jeoba nangeʼu̱ yu̱ ngopa ge pa nʼto̱ʼte pa dä ʼtëspäʼu̱ yu̱ jäʼi?
Nuʼä Jeoba xikju̱ ge hingä o̱thu̱ tengü o̱ʼtu̱ miʼra yu̱ jäʼi ge “manʼna ka̱mfëni yu̱ mikjäʼihu̱”, geʼtho geʼä dä japi gä he̱hmu̱ʼä Jeoba (dä mi nu Jeremías 17:5). Pa nʼto̱ʼte yu̱ ngopa pa dä ʼtëspä yu̱ ʼtsu̱ʼtabi o ʼra yu̱ jäʼi ge bi dü ge bi ñanʼä na hnini. Kextä pa nʼto̱ʼte yu̱ ngopa ge pa dä fëni ʼra yu̱ däsu̱i ge xi däʼu̱ yu̱ hnini o yu̱ ngopa ge nubu̱ pa nʼtëspi yu̱ banderaʼu̱ yu̱ hnini (1 Juan 5:21). Kextä jaʼbu̱ ʼnandi di mpe̱ti yu̱ jäʼi pa dä ma̱xu̱ yu̱ partido politiko, o pa dä ʼya̱ʼpu̱ yu̱ ʼtsu̱ʼtabi ge dä ʼtëspä yu̱ nʼtëdiʼu̱ yu̱ jäʼi. ʼNe kextä jaʼbu̱ di mpe̱ti pa dä ʼya̱pä mfa̱ʼtsiʼu̱ yu̱ ʼtsu̱ʼtabi. ¿ʼBe̱ʼä gi mbëni ge dä bënʼä Ojä geʼbu̱ manʼna thogi gä ëspähu̱ ʼna jäʼi o gä fa̱xu̱ ʼna grupo yu̱ jäʼi, ge o̱ʼtä hingi numanhoʼä Jeoba?
3. ¿ʼBe̱ʼä ma nʼto̱ʼte ʼto̱rbu̱ ja ʼra yu̱ ngopa ge hingi numanho Ojä?
Nuʼä Biblia ma ge nuʼä Ojä hingi numanho ge nuʼu̱ yu̱ jäʼi emme xi ngü sëi dä zi ʼne kextä emme dä thokpi ʼbe̱ʼä dä ʼyo̱tyu̱ jäʼi nubu̱ ja yu̱ ngopa, o ge ho̱ntho dä ʼyo̱tyu̱ ngopa pa di nʼiti (1 Pedro 4:3). Nubu̱ ja ʼra yu̱ ngopa, xi ngü yu̱ jäʼi di mpumbëni ʼne o̱ʼte nuʼä njuäntho hingi po̱manho. Geʼbu̱ di nehu̱ ge gä thokju̱ gä o̱thu̱ ma amigohu̱ʼä Jeoba, emme jaʼtse̱di gä njamansühu̱ pa hingä häkpähu̱ na nʼto̱ʼteʼu̱ yu̱ jäʼi ʼne gä he̱hmu̱ʼä Jeoba.
GÄ PÄHMU̱ MANʼNA NANGEHNA
Gä nuhu̱ ʼbe̱ʼä dä za̱ gä o̱thu̱ pa gä pähmu̱ xi nho ndaʼu̱ yu̱ ngopa numanho Ojä ʼne ndaʼu̱ hingi numanho ʼne geʼä dä ʼyo̱ʼte ge di njohyaʼä Jeoba.
4. Hingi mbabu̱ ja yu̱ ngopa nubu̱ hingi pa nʼtëspiʼä Jeoba
Dä mi nuui Efesios 5:10 ʼne manhmi nangehna:
¿ʼBe̱ʼä mʼbe̱ʼto ja gä mbënhmu̱ geʼbu̱ di ne gä o̱thu̱ na ngopa?
¿ʼBe̱ʼä ma ngopa ʼto̱rbu̱ gi ʼbu̱i?
¿Ha gi mbëni ge nuʼä Jeoba numanhoʼu̱ yu̱ ngopa ʼto̱rbu̱ gi ʼbu̱i?
¿Ha jaʼbu̱ xkä nʼya̱nni ge ʼbe̱ʼä mbënʼä Ojä nangeʼu̱ yu̱ kumpleaño? Himbä ʼyëpu̱ ja Biblia ge nuʼu̱ yu̱ me̱fi Ojä mi sa̱ yu̱ je̱yaʼu̱. Pe̱ mambu̱ nange yoho yu̱ jäʼi ge bi za̱ yu̱ je̱ya, pe̱ nuʼu̱, hinmi thänne Ojä. Dä mi nuui Génesis 40:20-22 ʼne Mateo 14:6-10. ʼNe mʼbe̱fa manhmi nangehna:
¿ʼBe̱ʼä bi nja nubu̱ yoho yu̱ kumpleaño?
Nuya ge gi pädi ʼbe̱ʼä bi thopu̱ ja yu̱ ngopa, ¿ʼbe̱ʼä gi mbëni ge mbënʼä Jeoba nangeʼu̱ yu̱ kumpleaño?
Pe̱ madägeʼä, dä za̱tho ge nuʼi gi ëna “¿Ha majuäni xtä nʼu̱ dä bënʼä Jeoba geʼbu̱ gä sa̱ ma kumpleaño o gä mba nuʼbu̱ miʼra yu̱ ngopa ge hingi numanhoʼä?”. Dä mi nuui Éxodo 32:1-8. ʼNe mʼbe̱fa dä mi nuui ä BIDEO ʼne manhmi nangehna:
¿Hanja emme jaʼtse̱di gä u̱rpähu̱ gue̱nda nuʼä ʼbe̱ʼä numanhoʼä Ojä?
¿ʼBe̱pu̱ dä za̱ gä pähmu̱ ndaʼu̱ yu̱ ngopa numanhoʼä Ojä ʼne ndaʼu̱ hingi numanho?
ʼBe̱pu̱ dä za̱ gä pähmu̱ geʼbu̱ Ojä numanho o hingi numanho ʼna ngopa
Xiʼä ngopa ¿ha üdi nuʼä hindi nthe̱uiʼä Biblia? Pa gi pädi dä mi nxa̱di xi nho hapu̱ bä nekiʼu̱ yu̱ ngopa.
Xiʼä ngopa, ¿ha manʼna ëspäʼu̱ yu̱ jäʼi, ʼna bandera o ʼna grupo ge bä sa̱nʼu̱ yu̱ jäʼi? Nuju̱ ho̱nse̱ʼä Jeoba di ëspähu̱ ʼne di ka̱mfënihu̱ ge ho̱nse̱ʼä dä hoki ga̱ʼtho yu̱ hëi ge thohyu̱ jäʼi.
¿Xiʼä ngopa ha fe̱ʼtsu̱ yu̱ nʼtëdi mambu̱ ja Biblia? Emme jaʼtse̱di ge hingä o̱thu̱ʼä xi nʼtso pa nangeʼä Ojä.
5. Dä mi ʼyëspäʼu̱ miʼra pa kextä dä ʼyëspäʼä ni nʼtëʼkyëi
Dä za̱tho xtä nhëi gä ënhmu̱ ge hingä mba̱ha̱ na ngopa geʼbu̱ ʼbu̱ʼä dä ʼyo̱rkähu̱ ʼtse̱di. Xi nhobu̱ gi xiʼu̱ miʼra ge hindä za̱ gä mba̱ha̱ ʼna ngopa. Pa gi pädi ʼbe̱ʼä bi ʼyo̱ʼtä ʼna xisu ge bi thogi ngübu̱, dä mi nuui ä BIDEO.
Dä mi nuui Mateo 7:12 ʼne manhmi nangehna:
Nangeʼä gä nubu̱ ja bersikulo, ¿ha ja gä xihmu̱ʼu̱ ma familiahu̱ ge hindä ʼyo̱tyu̱ ngopa?
¿ʼBe̱pu̱ dä za̱ gi ʼyüʼtu̱ ni familia ge gi huëki ʼne gi u̱rpä gue̱nda madägeʼä hingi pa yu̱ ngopa ge o̱ʼtu̱?
6. Nuʼä Jeoba nekju̱ gä njohyahu̱
Nuʼä Jeoba emme numanho ge gä thokä pahu̱ ko ma familiahu̱ ʼne ma amigohu̱. Dä mi nuui Eclesiastés 8:15 ʼne manhmi nangehna:
¿ʼBe̱pu̱ ürkähu̱ nuna bersikulo ge nuʼä Jeoba ne ge gä njohyahu̱?
Nuʼä Jeoba ne ge nuʼu̱ yu̱ me̱fi di nsixmanho, di njohya ʼne ʼrarbu̱ di nthokä pa. Dä mi nuui ä BIDEO pa gi nuse̱ ge ngübu̱ thogi nubu̱ ja yu̱ asamblea internasional.
Dä mi nuui Gálatas 6:10 ʼne manhmi nangehna:
¿Ha mahyoni gä o̱thu̱ yu̱ ngopa pa gä ühmu̱ ge di huëkju̱ʼu̱ miʼra?
Xiʼbu̱ gi ünʼä ʼna regalo, ¿ha gi ho gi üni ko mpa̱ha̱tho o gi ne ge ʼbu̱ʼä dä ʼyo̱ʼtä ʼtse̱di ge jaʼä gi üni?
Xi ngü yu̱ testigo o̱tyu̱ kombibio o yu̱ nʼtsihme pa nuʼu̱ yu̱ ʼtu̱hni ʼne jaʼbu̱ ʼnandi di ünni yu̱ regalo. Geʼbu̱ gi si ni ʼtu̱hni, ¿ʼbe̱ʼä dä za̱ gi ʼyo̱ʼte pa nangeʼu̱?
NUʼÄ ʼBE̱ʼÄ MANʼU̱ ʼRA YU̱ JÄʼI: “Hingä emme di u̱rpä gue̱nda hapu̱ bä nekiʼu̱ yu̱ ngopa. Nuʼä thogi jaʼtse̱di geʼä ge gä njohyahu̱ konʼu̱ ma familiahu̱ ʼneʼu̱ ma amigohu̱”.
¿ʼBe̱ʼä gi mamʼbu̱ ngübu̱ dä siʼi?
NUʼÄ MANʼNA JAʼTSE̱DI
Nuʼä Jeoba ne ge gä njohyahu̱ ʼne gä nsixmanhoʼu̱ ma familiahu̱ ʼneʼu̱ ma amigohu̱, pe̱ nuʼä Jeoba hingi ne ge gä mba̱ha̱ yu̱ ngopa nubu̱ pa nʼto̱ʼte nuʼä hingi numanhoʼä.
Nuʼä dä pähmu̱
¿ʼBe̱ʼä ma nʼta̱nni ja gä o̱thu̱ pa gä pähmu̱ geʼbu̱ nuʼä Jeoba numanho ʼna ngopa o hinna?
¿ʼBe̱ʼä dä za̱ gä o̱thu̱ pa nuʼu̱ ma familiahu̱ o nuʼu̱ ma amigohu̱ dä ʼyëspi nuʼä di ëʼkyëihu̱ nangeʼu̱ yu̱ ngopa?
¿ʼBe̱pu̱ di pähmu̱ ge nuʼä Jeoba ne ge gä njohyahu̱ ʼne ga thokä pahu̱ ko nuʼu̱ ma familiahu̱ ʼne ma amigohu̱?
DÄ MI PÄDI MANʼNA
Dä mi pädi nangeʼu̱ ʼra yu̱ ngopa ge hingi o̱ʼtu̱ yu̱ ʼyëʼkyëi majuäni.
“¿Hanja ge nuʼu̱ yu̱ testigoʼä Jeoba hingi o̱ʼte ʼra yu̱ ngopa?” (Bä ʼyëpu̱ jw.org)
Dä mi nxa̱di ʼne gi pädi hanja nuʼä Ojä hingi numanho ge gä o̱thu̱ yu̱ kumpleaño.
“¿Hanja nuʼu̱ yu̱ testigoʼä Jeoba hingi o̱tyu̱ kumpleaño?” (Bä ʼyëpu̱ jw.org)
Dä mi nu ʼbe̱ʼä dä za̱ dä ʼyo̱tyu̱ ʼtu̱hni pa di johyabi na mu̱iʼä Jeoba nuʼbu̱ bi ʼyo̱tyu̱ ngopaʼu̱ yu̱ jäʼi.
Yu̱ miyonetho yu̱ ʼyëʼkyëi hingi sa̱ʼä ra nhokxüi. ¿Ha di johya nangeʼä o̱ʼtu̱?
“Manʼna di johyaʼu̱ nangeʼä bi bädi” (La Atalaya, 1 disiembre ge 2012)