2 “Nia, pinilik* si Bezalel+ ya anak nen Uri ya anak nen Hur ed tribu nen Juda.+ 3 Sikatoy panoen koy espiritu na Dios pian nawalaay karunongan, pakatalos, tan kakabatan ed amin a klase na kimey a mankaukolay dunong, 4 diad panggawa na saray mararakep a desinyo, diad pankimey ed balitok, pilak, tan gansa, 5 diad pantabas tan pangipeket na saray bato,+ tan diad panggawa na amin a klase na bengatlan gawad kiew.+