24 Et dinago nen Zedekias ya anak nen Kenaana si Micaias tan tinampal to tan inkuan to: “Kasin nilampasan ak na espiritu nen Jehova pian mitongtong ed sika?”+ 25 Inmebat si Micaias: “Naamtaan mo lanlamang itan diad agew ya onamot kad sankadaleman a kuarto.” 26 Insan inkuan na ari na Israel: “Alam si Micaias tan awit mod si Amon a pangulo na syudad tan ed si Joas ya anak na ari. 27 Tan ibagam ed sikara, ‘Oniay inkuan na ari: “Iyakar yod prisoan iyan too+ tan daiset labat a tinapay tan danum so irasyon yod sikato anggad makapawil ak a maligen.”’” 28 Balet imbaga nen Micaias: “No makapawil kan maligen, si Jehova et ag-akitongtong ed siak.”+ Inkuan to ni: “Tandaan yo, amin yon totoo.”