19 Ta sikatoy kabkabat ko tan matalek ak ya iganggan to ray ananak to tan amin a kapolian to a tumboken day dalan nen Jehova diad panggawa ray matunong tan maptek,+ pian sumpalen nen Jehova imay insipan tod si Abraham.”

9 “Basta manalwar kayo tan bantayan yon maong so sarili yo,* pian agyo nalingwanan irayan bengatla ya anengneng yo tan ag-iratan onarawi ed puso yo diad amin ya agew na bilay yo. Ipaamta yo met iratan ed saray ananak tan apo yo.+

21 Insan inkuan to ed saray Israelita: “Sano diad arapen et tepetan kayo na saray ananak yo, ‘Antoy kabaliksan na sarayan bato?’+ 22 oniay nepeg yon isalaysay ed saray ananak yo: ‘Binmaliw so Israel ed Jordan diad amagan dalin+ 23 sanen pinaekat nen Jehova a Dios yo iray danum na Jordan ed arapan mi anggad akabaliw kami, a singa ginawa nen Jehova a Dios yo diad Ambalangan Dayat sanen pinaekat to itan ed arapan na totoo anggad akabaliw ira.+ 24 Ginawa to iya pian naamtaan na amin a totoo ed dalin so inkabiskeg na lima nen Jehova,+ pian naynay yon takotan si Jehova a Dios yo.’”