13 Agyo sasaolen so kapara yon too,+ tan agkayo mantatakew.+ Nepeg yon iter ed sakey ya uupaan a trabahador so bayar to ya agla itan nasanlabian ya anggad kabuasan.+

14 “Agmo sasaolen so sakey ya uupaan a trabahador a mankakkaukolan tan pobri, balanglan sakey ed saray agagim odino dayo ed dalin mo, diad loob na saray syudad* yo.+ 15 Nepeg mon iter so upa to ed saman a mismon agew,+ antis ya onselek so agew, ta sikatoy mankakkaukolan tan akadepende so bilay* to ed samay upa to. Ta no andi, sikatoy ontawag ed si Jehova lapud sika, tan mankasalanan ka.+