Jeremias
3 Itetepet na saray totoo: “No isian na laki so asawa to tan ontaynan imay asawan bii insan magmaliw lan asawa na sananey, kasin mipawilan nid sikato imay angisian?”
Agta arutakan la iyan dalin?+
“Akilawanan ka ed dakel a kaibam,
Insan ka natan mipawilan ed siak?”+ so imbaga nen Jehova.
2 “Bantag mo iray pukdol ya anggapoy tanem tan nengneng mo.
Wala tay lugar ya agda ka inakdolan tan inabuso?
Yinmurong kan nanalagar ed sikara diad saray gilig na karsada,
Singa sakey a toon manaalis-alis* diad kalawakan.
Dudutakan moy dalin
Lapud pilalawanan tan kaugsan mo.+
3 Kanian agsinmabi so maksil ya uran,+
Tan anggapoy uran ed panaon na panagrosas.
Nanengneng ed sika so anggapoy-baing a kakikiwas* na sakey ya asawan biin milalawanan;
Anggapoy aliknam a kababaingan.+
4 Balet natan et ontatawag kad siak na,
‘Ama, kaiba ta ka sanen wala ak nid kalangweran!+
5 Mansiansia kasi sanok mo ed andi-anggaan,
Odino manem-em kay sakit na linawa?’
Ontan so ibabagam,
Balet gagawaen mo nin siansia so amin a mauges a sarag mon gawaen.”+
6 Diad saray panaon nen Arin Josias+ et oniay inkuan nen Jehova ed siak: “‘Anengneng mo lay ginawa na agmatoor ya Israel? Sikatoy linmad kada atagey a palandey tan ed silong na kada masalompapak a kiew pian milawanan.+ 7 Anggan kayari ton ginawa irayan amin et siansia nin ibabagak ed sikato ya ompawil komon ed siak,+ balet agpinmawil; tan banbantayan na Juda so gagawaen na agmatoor ya agi to.+ 8 Sanen anengneng ko itan, pinataynan ko so agmatoor ya Israel tan inikdan koy kasulatan na diborsyo+ lapud impikalugoran to.+ Balet agtinmakot so agmatoor ya agi ton Juda; sikatoy linma met ya akilawanan.+ 9 Inisip ton melag labat a bengatla so pilalawanan to, tan intultuloy ton dinutakan so dalin tan akikalugoran ed saray bato tan kiew.+ 10 Balet diad sarayan amin, siansia nin agpinmawil ed siak so agmatoor ya agi ton Juda diad interon puso to, noagta kunkunwari labat,’ so imbaga nen Jehova.”
11 Insan inkuan nen Jehova ed siak: “Impanengneng na agmatoor ya Israel a sikatoy* mas matunong nen say agmatoor a Juda.+ 12 La ka tan ipaamtam irayan salita diad amianen:+
“‘“Pawil ka, O rebelden Israel,” so imbaga nen Jehova.’+ ‘“Agak onusdong a walaay pasnok* ed sika,+ ta matoor ak,” so imbaga nen Jehova.’ ‘“Agmansiansia so sanok ko ed andi-anggaan. 13 Basta bidbir moy impankasalanan mo, ta nanrebelde kad si Jehova a Dios mo. Mirerelasyon kad saray dayo* diad silong na kada masalompapak a kiew, balet agmo inunor so boses ko,” so imbaga nen Jehova.’”
14 “Pawil kayo, O rebelden ananak,” so imbaga nen Jehova. “Ta siak so tuan katawan* yo; tan alaen ta kayo, sakey manlapud kada syudad tan duara manlapud kada pamilya, tan awiten ta kayo ed Sion.+ 15 Tan ikdan ta kayo na saray managpastol ya onkiwas unong ed linawak,*+ tan pakanen da kayo ed panamegley na kakabatan tan aralem a pakatalos. 16 Diad satan a panaon et ondakel kayo tan magmaliw kayon mabunga ed sayan dalin,” so imbaga nen Jehova.+ “Agyo la ibagan, ‘Say kaban na sipanan nen Jehova!’ Agyo la itan isipen, odino nanonotan odino nailiwan, tan agkayo la manggaway sananey a kaban. 17 Diad satan a panaon et tawagen day Jerusalem bilang say trono nen Jehova;+ tan natipon ed Jerusalem so amin a nasyon pian idayew day ngaran nen Jehova,+ tan agda la ipilit a tumboken so mauges a puso ra.”
18 “Diad satan a panaon et saniba iran manakar, say sankaabungan na Juda tan say sankaabungan na Israel,+ tan saniba iran manlapu ed dalin diad amianen pian onlad dalin ya inter kod saray inmuunan atateng yo bilang tawir.+ 19 Tan inisip ko, ‘Malikeliket ak sanen inyan ta kad limog na saray ananak ko tan inter kod sika so marakep a dalin, say sankarakepan a tawir ed amin a nasyon!’*+ Inisip ko met a tawagen yo ak na, “Ama!” tan agkayo ontundan ontumbok ed siak. 20 ‘Balet, singa sakey ya agmatoor ya asawan bii a tinaynan toy asawa* to, ontan met so agyo impanmatoor ed siak, O sankaabungan na Israel,’+ so imbaga nen Jehova.”
21 Narerengel so ungol diad saray pukdol ya anggapoy tanem,
Say pannangis tan pikakasi na totoo na Israel,
Ta pinikewet day dalan da;
Nilingwanan day Jehova a Dios da.+
22 “Pawil kayo, sikayon rebelden ananak.
Tambalen koy kipapasen yo bilang rebelde.”+
“Wadia kami! Dinmago kamid sika,
Ta sika so Dios mi, O Jehova.+
23 Talagan ilusyon labat iray pukdol tan saray gulo ed kapalandeyan.+
Talagan manlapud si Jehova a Dios mi so kililiktar na Israel.+