Oseas
3 Balet siak so angibangat ed Efraim a manakar,+ ya aawiten ko ra ed saray taklay ko;+
Tan agda binidbir a siak so amaabig ed sikara.
4 Guguyoren ko rad panamegley na saray lubir na totoo,* diad panamegley na saray bedber na aro;+
Tan nagmaliw ak ed sikara a singa sakey a mangeekal na pako ed saray tenger da,*
Tan mauyamo ak ya angiter na naakan ed balang sakey.
5 Ag-ira ompawil ed dalin na Ehipto, balet say Asirya so magmaliw ya ari ra,+
Lapud agda labay so ompawil ed siak.+
6 Tan sakey ya espada so onwasiwas ed saray syudad to+
Tan deralen tan akmonen na satan iray balewet to lapud saray pakana ra.+
7 Determinadon agmanmatoor ed siak iray totook.+
Tinawag da ra pian mamaatagey,* balet anggapoy inmalagey.
8 Panoy pamaulyan kod sika, O Efraim?+
Panoy pangiyawat kod sika, O Israel?
Nagawaan ko kasid sika so singa impantratok ed Adma?
Nagawaan ko kasid sika so singa ginawak ed Zeboim?+
9 Agko la ipatnag so mandarlang a sanok ko.
Agko la deralen so Efraim,+
Ta Dios ak tan aliwan too,
Say Masanton Dios ed pegley yo;
Tan agak onsabid sikayo ya onsasanok.
10 Ontumbok irad si Jehova, tan sikatoy onaglem a singa leon;+
No sikatoy onaglem, onsabin manggiwgiw iray ananak to manlapud sagur.+
11 Onggiwgiw iran singa manok sano ompaway irad Ehipto,
Singa sakey a malapati a nanlapud dalin na Asirya;+
Tan panayamen ko rad kaabungan da,” so imbaga nen Jehova.+
12 “Katilaan labat so ibabagad siak na Efraim.
Inerman so lingawen ko et nanenengneng koy panagsaol na Israel.+