Jeremias

40 Say mensahe nen Jehova a sinmabi ed si Jeremias kayarin sikatoy imbulos nen Nebuzaradan+ a pangulo na saray guardia. Sikatoy akaposas ya inala tod Rama,+ tan kaiba ed saramay amin ya inerel ed Jerusalem tan ed Juda a paonlad Babilonia. 2 Insan inala na pangulo na saray guardia si Jeremias tan inkuan tod sikato: “Impasakbay nen Jehova a Dios mo iyan kadederal ed sayan pasen, 3 tan ginawa nen Jehova so unong ed imbaga to, lapud nankasalanan kayod si Jehova tan agyo inunor so boses to. Kanian agawa iya ed sikayo.+ 4 Ibulos ta ka la natan ed saray posas a walad limam. No labay moy milad siak diad Babilonia, gala, tan akauley ak ed sika. Balet no agmo labay so mila ed siak diad Babilonia, mansiansia ka dia. Nengneng mo! Walad arapan mo so interon dalin. La ka ed inerman a labay mon laen.”+

5 Sakbay a makapandesisyon si Jeremias no kasin ompawil odino andi, oniay inkuan nen Nebuzaradan: “Pawil ka sirin ed si Gedalias+ ya anak nen Ahikam+ ya anak nen Safan,+ a tinuro na ari na Babilonia a manuley ed saray syudad na Juda, tan miayam kad sikato a kaiba iray totoo; odino la kad inerman a labay mon laen.”

Insan inter ed sikato na pangulo na saray guardia so abasto ton kakanen tan sakey a regalo, insan pinasipot to. 6 Kanian linmay Jeremias ed si Gedalias ya anak nen Ahikam diad Mizpa+ tan akiayam ed sikato a kaiba iray totoo ya atilak ed sayan dalin.

7 Agnambayag, naamtaan na amin a pangulo na armada a walad uma a kaiba iray sundalo ra, a tinuro na ari na Babilonia si Gedalias ya anak nen Ahikam bilang manuley ed sayan dalin tan manuley ed saray lalaki, bibii, tan ugugaw a kabiangan ed saray pobrin totoo diad sayan dalin ya agniyakar diad Babilonia.+ 8 Kanian linma rad si Gedalias diad Mizpa.+ Saraya et si Ismael+ ya anak nen Netanias, si Johanan+ tan si Jonatan ya ananak nen Karea, si Seraias ya anak nen Tanhumet, saray ananak nen Efai a Netofatita, tan si Jezanias+ ya anak na sakey a Maacatita, a kaiba iray sundalo ra. 9 Oniay insamba nen Gedalias ya anak nen Ahikam ya anak nen Safan ed sikara tan ed saray sundalo ra: “Agkayo natatakot a manlingkor ed saray Caldeo. Manayam kayo ed sayan dalin tan lingkoran yo so ari na Babilonia, tan maabig so pansumpalan yo.+ 10 Tan siak, manayam ak ed Mizpa pian irepresenta ta kayo ed* saray Caldeo ya onla dia. Balet mantipon kayoy alak, saray prutas ed panaoy tiagew, tan larak, tan iyan yo iratan ed saray pananginan yo tan manayam kayo ed saray syudad ya inala yo.”+

11 Tan naamtaan met na amin a Judio a walad Moab, Ammon, tan Edom, pati saramay walad arum a dalin, ya inabuloyan na ari na Babilonia a walay natilak ed Juda tan tinuro ton manuley ed sikara si Gedalias ya anak nen Ahikam ya anak nen Safan. 12 Kanian pinmawil so amin a Judio manlapud amin a pasen a nitaytayakan da, tan linma ra ed dalin na Juda, ed si Gedalias diad Mizpa. Tan nantipon ira na dakdakel ya alak tan saray prutas ed panaoy tiagew.

13 Linmad si Gedalias diad Mizpa si Johanan ya anak nen Karea tan amin a pangulo na armada a walad uma. 14 Imbaga rad sikato: “Agmo ta amta ya imbaki nen Baalis ya ari na saray Ammonita+ si Ismael ya anak nen Netanias pian pateyen to ka?”*+ Balet ag-ira anisiaan nen Gedalias ya anak nen Ahikam.

15 Insan masekreton imbaga nen Johanan ya anak nen Karea ed si Gedalias diad Mizpa: “Labay kon pateyen si Ismael ya anak nen Netanias, tan anggapoy makaamta ed nagawa. Akin et paulyan mo labat a napatey to ka,* tan akin et paulyan mon nitaytayak so amin a walad Juda ya atiptipon ed sika tan naandi iray atilak ed Juda?” 16 Balet inkuan nen Gedalias+ ya anak nen Ahikam ed si Johanan ya anak nen Karea: “Agmo itan gagawaen, ta aliwan tua so ibabagam nipaakar ed si Ismael.”