Genesis

30 Sanen anengneng nen Raquel ya agto naikday anak si Jacob, sikatoy akaibeg ed agi to tan inkuan tod si Jacob: “Ikdan mo ak na anak, ta no andi ompatey ak.” 2 Diad saya et akapasnok si Jacob ed si Raquel tan inkuan to: “Wala ak ta ed pasen na Dios ya angamper ed pakawalaan moy ananak?”* 3 Kanian inkuan nen Raquel: “Niay Bilha+ ya aripen kon bii. Miakdol kad sikato, pian sikatoy mananak parad siak* tan diad panamegley to et nawalaan ak met na ananak.” 4 Diad saman et inter to bilang asawa si Bilha a lingkor to, tan akiakdol si Jacob ed sikato.+ 5 Nanlukon si Bilha tan asabi panaon et inyanak tod si Jacob so sakey a laki. 6 Insan inkuan nen Raquel: “Say Dios so kinmiwas bilang ukom ko tan dinengel to met so boses ko, kanian inikdan to ak na sakey ya anak a laki.” Kanian sikatoy inngaran ton Dan.*+ 7 Nanlukon lamet si Bilha a lingkor nen Raquel, tan asabi panaon et inyanak tod si Jacob so komaduan laki. 8 Insan inkuan nen Raquel: “Pinasyay impipuligesgesan kod agik. Tan siak so analo!” Kanian sikatoy inngaran ton Neftali.*+

9 Sanen naimano nen Lea a sikatoy tinmunda lan mananak, inala toy Zilpa a lingkor to tan inter tod si Jacob bilang asawa.+ 10 Tan angiyanak si Zilpa a lingkor nen Lea na sakey a laki ed si Jacob. 11 Insan inkuan nen Lea: “Agaylay abig a bendisyon!” Kanian sikatoy inngaran ton Gad.*+ 12 Kayari na satan et inyanak nen Zilpa a lingkor nen Lea so komaduan laki ed si Jacob. 13 Insan inkuan nen Lea: “Agaylay liket ko! Ta saray ananak a bibii et seguradon iyabawag da ak a maliket.”+ Kanian sikatoy inngaran ton Aser.*+

14 Natan et manaakar si Ruben+ ed panaon na panag-ani na trigo, tan sikatoy akalmo na tanaman a mandragoras* diad uma. Kanian inyakar to iratan ed ina ton si Lea. Insan inkuan nen Raquel ed si Lea: “Ipangasim, ikdan mo ak pay pigara ed saray mandragoras nen anak mo.” 15 Diad saman et inkuan tod sikato: “Agni magenap ed sika so impangalam ed asawak?+ Natan et alaen mo met iray mandragoras na ana’ko?” Kanian inkuan nen Raquel: “Sige sirin. Sika so piakdolan tod sayan labi bilang kasalat na mandragoras nen anak mo.”

16 Sanen sinmabi Jacob manlapud uma ed saman a labi, pinmaway si Lea pian onabet ed sikato insan inkuan to: “Siak so piakdolan mo, ta inter ko iray mandragoras nen ana’ko bilang bayar na kanepegan kod sika.” Kanian sikatoy inakdolan tod saman a labi. 17 Tan dinengel tan inebatan na Dios si Lea, tan sikatoy nanlukon tan asabi panaon et inyanak tod si Jacob so komaliman laki. 18 Insan inkuan nen Lea: “Inter ed siak na Dios so bayar ko,* ta inter koy lingkor ko ed asawak.” Kanian sikatoy inngaran ton Isacar.*+ 19 Tan nanlukon lamet si Lea tan asabi panaon et inyanak tod si Jacob so komanem a laki.+ 20 Insan inkuan nen Lea: “Inikdan ak na Dios, on, na sakey a maabig a regalo. Anosan ak a siansia nen asawak,+ lapud angiyanak ak ed sikato na anemiran lalaki.”+ Kanian sikatoy inngaran ton Zebulon.*+ 21 Kayari na satan et sikatoy angiyanak na sakey a bii tan inngaran ton Dina.+

22 Insan ninonot na Dios si Raquel, tan sikatoy dinengel tan inebatan na Dios diad impangiyabuloy ton sikatoy manlukon.*+ 23 Tan sikatoy nanlukon tan angiyanak na sakey a laki. Insan inkuan to: “Inekal na Dios so kabalawan ko!”+ 24 Kanian sikatoy inngaran ton Jose,*+ ya inkuan to: “Inyarum nen Jehova ed siak so sakey nin anak a laki.”

25 Kayarin niyanak nen Raquel si Jose, tampol ya inkuan nen Jacob ed si Laban: “Abuloyan mo ak lan onalis pian makaonla ak lad pasen ko tan ed dalin ko.+ 26 Iter mod siak iray asawak tan ananak ko, ta sikara so sengegay impanlingkor kod sika, pian makaalis ak la, ta amtam met no panon so impanlingkor kod sika.”+ 27 Insan inkuan nen Laban ed sikato: “No agamoran koy panangabobon mo,—naamtaan kod saray tanda* a bebendisyonan ak nen Jehova lapud sika.” 28 Tan inkuan to ni: “Ibagam no pigaray labay mon upa ta iter ko.”+ 29 Kanian inkuan nen Jacob ed sikato: “Amtam met no panon so impanlingkor kod sika tan no antoy kipapasen na pulok mo a walad panangasikasok;+ 30 daiset ni kayarian mo antis ak ya onsabi, balet naaruman tan dinmakel so pulok mo, tan benendisyonan ka nen Jehova manlapu lad insabik. Kanian kapigan ak met makapanggaway antokaman parad dilin sankaabungan ko?”+

31 Insan inkuan to: “Anto sirin so iter kod sika?” Tan inkuan nen Jacob: “Agka la mangiiter ed siak na antokaman! No gawaen mo iyan sakey a bengatla parad siak, pastolan ko ni so pulok mo tan bantayan ko iratan.+ 32 Ondalan ak natan ed kawalaan na interon pulok mo. Ibiig mo so amin a karneron batekan tan baklayan tan amin a deketan ed saray kilaw a kalakian a karnero pati amin a baklayan tan batekan ed saray kabatyan a kanding. Manlapud natan et saratan so magmaliw ya upak.+ 33 Tan say inkatunong ko* so mansalita parad siak diad arapen sano nengnengen mo iray upak; nibagan tinakew no walad siak so antokaman ya aliwan batekan tan baklayan ed saray kabatyan a kanding tan deketan ed saray malangwer a kalakian a karnero.”

34 Diad saya et inkuan nen Laban: “Maabig! Nagawa komon so unong ed imbagam.”+ 35 Insan diad saman ya agew et imbiig to iray kalakian a kanding a gulisan tan baklayan tan amin a kabatyan a kanding a batekan tan baklayan, amin a walaan na amputin batek tan amin a deketan ed saray kilaw a kalakian a karnero, tan impaasikaso to iratan ed saray ananak to. 36 Kayari na satan, inyarawi tod si Jacob iray pulok to a say kaarawi et taloy agew ya akaren, tan pinastolan nen Jacob iray akeran pulok nen Laban.

37 Insan angalay Jacob na saray kapamputer a sanga na saray kiew ya estorake,* almendro, tan platano, tan inukisan to iray arum a parte na saray sanga pian ompaway a singa walay amputin batek ed saratan. 38 Insan to inyan iray inukisan ton sanga diad arap na saray aagusan a paniinuman na saray pulok, pian nanengneng da iratan sano oninum ira tan mankasta ra.

39 Kanian nankasta iray pulok diad arapan na saray sanga, tan nananak ira na gulisan, batekan, tan baklayan. 40 Insan imbiig nen Jacob iray kilaw a kalakian a karnero tan impaarap to iray pulok pian nanengneng da iray gulisan tan amin a deketan a walad pulok nen Laban. Insan to la imbiig iray dilin pulok to, tan agto iratan inlaok ed saray pulok nen Laban. 41 Tan kapagno mankasta iray mabiskeg ya ayayep, iiyan to iramay sanga diad aagusan a sankanengneng na saray pulok, pian mankasta ra ed abay na saray sanga. 42 Balet agto iiyan ditan iray sanga sano makapuy ya ayayep so wadtan. Kanian saramay makapuy so betang nen Laban, balet saramay mabiskeg so betang nen Jacob.+

43 Tan inmaligwas a maong iyan too, tan sikatoy awalaan na dakerakel a pulok tan lingkor a lalaki tan bibii tan kamelyo tan asno.+