Genesis

46 Kanian inawit nen Israel so amin a walad sikato insan la binmuat. Sanen akasabi ed Beer-sheba,+ sikatoy angiyapay na saray bagat ed Dios na ama ton si Isaac.+ 2 Insan akitongtong so Dios ed si Israel diad sakey a pasingawey ed labi tan inkuan to: “Jacob, Jacob!” a diad saman et inkuan to: “Wadia ak!” 3 Inkuan to: “Siak so tuan Dios, say Dios nen amam.+ Agka natatakot ya onlad Ehipto, ta diman et gawaen ta kan baleg a nasyon.+ 4 Siak a mismo so kaibam ya onla ed Ehipto, tan siak a mismo so mangipawil ed sika manlapud man,+ tan itapew nen Jose so lima to ed saray matam.”*+

5 Kayari na satan et tinmaynan lay Jacob ed Beer-sheba, tan inlugan na saray ananak nen Israel si Jacob ya ama ra tan saray ananak tan kaasawaan da diad saray kariton ya impawit na Faraon a panluganan to. 6 Inawit da iray pulok da tan saray kaykayarian ya atipon da ed dalin na Canaan. Insan sinmabi ra ed Ehipto, si Jacob tan amin ya ilalak ton kaiba to. 7 Inawit to ed Ehipto iray ananak ton lalaki tan bibii, tan saray apo ton lalaki tan bibii—amin ya ilalak to.

8 Saraya so kangaranan na ananak nen Israel a linma ed Ehipto,+ si Jacob tan saray ananak to: Si Ruben so panguloan+ nen Jacob.

9 Saray lalakin ananak nen Ruben et si Hanoc, Palu, Hezron, tan Carmi.+

10 Saray ananak nen Simeon+ et si Jemuel, Jamin, Ohad, Jakin, Zohar, tan si Shaul+ ya anak na sakey a biin Canaanita.

11 Saray lalakin ananak nen Levi+ et si Gerson, Kohat, tan Merari.+

12 Saray ananak nen Juda+ et si Er, Onan, Selah,+ Perez,+ tan Zera.+ Balet inatey si Er tan Onan diad dalin na Canaan.+

Saray ananak nen Perez et si Hezron tan Hamul.+

13 Saray ananak nen Isacar et si Tola, Puva, Yob, tan Simron.+

14 Saray ananak nen Zebulon+ et si Sered, Elon, tan Jaleel.+

15 Saraya so ananak nen Lea, ya inyanak tod si Jacob diad Padan-aram, pati say anak ton bii a si Dina.+ Amin ya ananak ton lalaki tan bibii* et manbilang na 33.

16 Saray ananak nen Gad+ et si Zifion, Hagi, Suni, Ezbon, Eri, Arodi, tan Areli.+

17 Saray lalakin ananak nen Aser+ et si Imnah, Isva, Isvi, tan Berias, tan say agi ran bii et si Sera.

Saray lalakin ananak nen Berias et si Heber tan Malkiel.+

18 Saraya so ananak nen Zilpa+ ya inter nen Laban ed anak ton si Lea. Saraya so anak to ed si Jacob: ami-amin et 16 a totoo.*

19 Saray ananak nen Raquel ya asawa nen Jacob et si Jose+ tan Benjamin.+

20 Niyanak ed si Jose diad dalin na Ehipto si Manases+ tan Efraim,+ ya anak to ed si Asenat+ ya anak nen Potifera a saserdote ed On.*

21 Saray ananak nen Benjamin+ et si Bela, Beker, Asbel, Gera,+ Naaman, Ehi, Ros, Mupim, Hupim,+ tan Ard.+

22 Saraya so ananak nen Raquel ed si Jacob: ami-amin et 14 a totoo.*

23 Say anak* nen Dan+ et si Husim.+

24 Saray lalakin ananak nen Neftali+ et si Jazeel, Guni, Jezer, tan Silem.+

25 Saraya so lalakin ananak nen Bilha ya inter nen Laban ed anak ton si Raquel. Saraya so anak to ed si Jacob: ami-amin et pitoran totoo.*

26 Amin iramay* ilalak nen Jacob ya akila ed sikato diad Ehipto et 66, likud nid saray kaasawaan na ananak nen Jacob.+ 27 Duaran lalaki* so niyanak ed si Jose diad Ehipto. Amin a totoo* ed sankaabungan nen Jacob ya akila ed Ehipto et 70.+

28 Pinauna la nen Jacob si Juda+ pian ibaga tod si Jose a sikatoy paonla lad Gosen. Sanen akasabi la ra ed dalin na Gosen,+ 29 impaiparaan nen Jose so karwahe to pian abeten toy Israel ya ama to diad Gosen. Sanen impakabat toy inkasikato, tampol a sikatoy nilakap to* tan abayag a nanakis.* 30 Insan inkuan nen Israel ed si Jose: “Akaparaan ak la natan ya ompatey, ta anengneng ta ka la tan amtak a mabilay ka ni.”

31 Insan inkuan nen Jose ed saray agagi to tan ed sankaabungan nen ama to: “Abuloyan yo ak ya onla ed Faraon+ tan ibalitak ed sikaton, ‘Sinmabi la iray agagik tan say sankaabungan nen amak a nanlapud dalin na Canaan.+ 32 Managpastol+ tan managkomponi na ayayep+ iray lalaki, tan inawit da iray karnero tan baka ra tan amin a walad sikara.’+ 33 Sano tawagen kayo na Faraon tan itepet ton, ‘Antoy anapan yo?’ 34 oniay ibaga yo, ‘Mankokomponi na ayayep iray lingkor mo manlapu lad inkaugaw mi ya anggad natan, sikami tan saray inmuunan atateng mi,’+ pian makapanayam kayo ed dalin na Gosen,+ ta makapadimla ed saray Ehipsio so amin a managkomponi na karnero.”+