Jeremias

44 Oniay mensahen sinmabi ed si Jeremias parad amin a Judio a manaayam ed dalin na Ehipto,+ saramay manaayam ed Migdol,+ Tapanes,+ Nof,*+ tan ed dalin na Patros:+ 2 “Oniay inkuan nen Jehova na saray armada, say Dios na Israel, ‘Anengneng yoy amin ya impaneral kod Jerusalem+ tan ed amin a syudad na Juda, tan natan et aderal la iratan, tan anggapo lay manaayam.+ 3 Makasengeg iya ed saray kaugsan a ginawa ra pian pasanoken da ak diad iyaakar dan manbagat+ tan manlingkor ed arum a dirios ya agda kabat, anggan sikayo tan saray inmuunan atateng yo.+ 4 Ibabakik a naynay ed sikayo so amin a lingkor kon propeta, tan aminpigapigak iran imbaki,* ya ibabaga ran: “Ipangasi yo, agyo gagawaen iyan makapadimlan bengatla a kabkabusol ko.”+ 5 Balet ag-ira dinmengel odino tinmalineng, pian ibeneg da komon so kaugsan da diad agda pambagat ed arum a dirios.+ 6 Diad saman et inyibung koy sanok tan pasnok ko tan dinmalang ed saray syudad na Juda tan ed saray karsada na Jerusalem, kanian aderal iratan a dalin tan agla napanayaman, a singa natan.’+

7 “Tan natan et oniay inkuan nen Jehova, say Dios na saray armada, say Dios na Israel, ‘Akin et manggagawa kayoy baleg a kadederal ed sarili* yo, pian naandi ed Juda so amin a lalaki tan bibii, ugugaw tan kapangiyanak, tan anggapoy natilak ed sikayo? 8 Akin et pasanoken yo ak ed panamegley na saray kimey na lima yo diad pambabagat yod arum a dirios diad dalin na Ehipto a nila yon panayaman? Naandi kayo tan isamba tan balawen kayo na amin a nasyon ed dalin.+ 9 Alingwanan yo ta la iray mauges a ginawa na inmuunan atateng yo tan saray mauges a ginawa na arari na Juda+ tan saray mauges a ginawa na kaasawaan da,+ pati saray mismon mauges a ginawa yo tan saray mauges a ginawa na kaasawaan yo,+ a ginawa ra diad dalin na Juda tan ed saray karsada na Jerusalem? 10 Anggad sayan agew et ag-ira nampaabeba,* ag-ira tinmakot,+ tan agda tinumbok so ganggan ko tan saray totontonen ya inter kod sikayo tan ed saray inmuunan atateng yo.’+

11 “Kanian oniay inkuan nen Jehova na saray armada, say Dios na Israel, ‘Desidido ak lan mangidapoy kadederal ed sikayo, pian naderal so interon Juda. 12 Tan alaen ko iramay atilak ed Juda a mapilit ya onlad dalin na Ehipto pian manayam ira diman, tan naupot iran amin ed dalin na Ehipto.+ Ompatey ira ed espada, tan naupot ira lapud eras; manlapud sankaabebaan ya anggad sankatageyan, ompatey irad espada tan eras. Tan magmaliw iran sakey ya ayew, pakataktakotan, kabandayan, tan kabalawan.+ 13 Dusaen ko iramay manaayam ed dalin na Ehipto, a singa impanusak ed Jerusalem, diad panamegley na espada, eras, tan salot.*+ 14 Tan anggapoy makatakas odino makaliktar ed saray atilak ed Juda a linmad dalin na Ehipto, tan ag-ira makapawil ed dalin na Juda. Labalabay day* makapawil tan manayam diman, balet ag-ira makapawil, likud labat ed saramay pigaran makaliktar.’”

15 Inmebat ed si Jeremias so amin a lalakin makaamta a manbabagat ed arum a dirios iray kaasawaan da tan amin a kaasawaan a bibii a wadman a manugyop na sakey a baleg a grupo, tan amin a totoon manaayam ed dalin na Ehipto,+ diad Patros:+ 16 “Agmi gawaen so imbagam ed sikami diad ngaran nen Jehova. 17 Imbes, gawaen mi so amin ya imbaga mi, salanti, manbagat kami ed Reyna na Tawen* tan mangiyibung kami na apay ya iinumen parad sikato,+ a singa ginawa mi, saray inmuunan atateng mi, saray arari mi, tan saray prinsipe mi diad saray syudad na Juda tan diad saray karsada na Jerusalem, sanen napepesel kami ed tinapay tan maaligwas kami ni, tan anggapon balot so anengneng min kadederal. 18 Manlapu la nen agkami la manbabagat ed Reyna na Tawen* tan agkami la mangiyiibung na apay ya iinumen parad sikato, naandi lad sikami so amin a bengatla, tan naupot kami ed panamegley na espada tan eras.”

19 Inkuan met na saray bibii: “Tan sano manbabagat kami ed Reyna na Tawen* tan mangiyiibung kami na apay ya iinumen parad sikato, agta inyabuloy na kaasawaan mi a manggawa kami na saray bagat a bibingka a pinorma unong ed imahen to, tan mangiyibung kami na apay ya iinumen parad sikato?”

20 Oniay inyebat nen Jeremias ed amin a totoo, ed saray lalaki tan kaasawaan da, tan ed amin a totoon katongtong to: 21 “Saray bagat a ginawa yo diad saray syudad na Juda tan diad saray karsada na Jerusalem, sikayo tan saray inmuunan atateng yo, saray arari yo, saray prinsipe yo, tan saray totoo ed sayan dalin+—anonotan iratan nen Jehova! 22 Diad kaunoran et agla naanosan nen Jehova so mauges a kagagawa yo tan saray makapadimlan bengatla a ginawa yo, kanian aderal so dalin yo, nagmaliw a bengatlan pakataktakotan tan isamba, tan anggapoy manaayam, a singa natan.+ 23 Saya et lapud saray ginawa yon panagbagat tan lapud nankasalanan kayo ed si Jehova diad agyo intulok ed boses nen Jehova tan agyo intumbok ed ganggan to, ed saray totontonen ya inter to, tan ed saray panonot to, kanian agawa ed sikayo iyan kadederal, a singa natan.”+

24 Oniay inkuan ni nen Jeremias ed amin a totoo tan ed amin a bibii: “Dengel yoy salita nen Jehova, amin yon taga Juda a walad dalin na Ehipto. 25 Oniay inkuan nen Jehova na saray armada, say Dios na Israel, ‘Sinumpal yo no antoy imbaga yo tan saray kaasawaan yo, ta inkuan yon: “Gawaen mi iray insipan mi a pambagat ed Reyna na Tawen* tan pangiyibung na apay ya iinumen parad sikato.”+ Seguradon sikayo ran bibii et gawaen tan sumpalen yo ray sipan yo.’

26 “Kanian dengel yoy salita nen Jehova, amin yon taga Juda a manaayam ed dalin na Ehipto: ‘“Isambak ed maglorian ngaran ko,” so inkuan nen Jehova, “a say ngaran ko et agla bitlaen ed pansamba na siopaman a too ed Juda+ a walad interon dalin na Ehipto a mangibabagay, ‘Unong a mabilay so Soberanon Katawan a Jehova!’+ 27 Akaparaan ak natan a mangiyakar ed sikara na kadederal tan aliwan kamaongan;+ ompatey ed espada tan eras so amin a totoo na Juda a walad dalin na Ehipto, anggad naupot ira.+ 28 Daiset labat so makaliktar ed espada tan makapawil ed dalin na Juda manlapud dalin na Ehipto.+ Insan amin ya atilak ed Juda a linman manayam ed dalin na Ehipto et naamtaan da no dinan a salita so tinmua, say salitak odino salita ra!”’”

29 “‘Tan saya so tanda parad sikayo a dusaen ta kayod sayan pasen,’ so imbaga nen Jehova, ‘pian naamtaan yon seguradon ontua iray salitak nipaakar ed insambak a paneral ed sikayo: 30 Oniay inkuan nen Jehova: “Iyawat koy Faraon Hofra, say ari na Ehipto, ed saray kalaban to tan ed saramay malabay a mamatey ed sikato,* a singa impangiyawat kod si Arin Zedekias na Juda ed kalaban ton si Arin Nabucodonosor* na Babilonia, a malabay a mamatey ed sikato.”’”*+