Amos
8 Saya so impanengneng na Soberanon Katawan a Jehova ed siak: Walay sakey a baskit a nankarga na saray prutas ed panaoy tiagew. 2 Insan inkuan to: “Antoy nanenengneng mo, Amos?” Inkuan ko, “Sakey a baskit a nankarga na saray prutas ed panaoy tiagew.” Insan inkuan nen Jehova ed siak: “Sinmabi lay anggaan na Israel a totook. Agko la ra perdonaen.+ 3 ‘Diad satan ya agew, saray kansion ed templo et magmaliw a panugaog,’+ so imbaga na Soberanon Katawan a Jehova. ‘Amayamay a bangkay so nibantak ed anggan iner+—anggapo komoy mansasalita!’
4 Dengel yo iya, sikayo ran mangigagatin ed saray mairap-bilay
Tan mamapaandi ed saray mauyamo diad dalin,+
5 Sikayo ran mangibabagan, ‘Kapigan nasumpal so piesta na balon bulan,+ pian makapanlako kami na saray bukel?
Ontan met ed Sabaton,+ pian nilako mi so ilik?
Pian gawaen min mas melag so sukat ya efa*
Tan mas ambelat so siklo,*
Pian napagmaliw min masaol so sukat na simbangan;+
6 Pian nasaliw mi na pilak iray pobrin totoo
Tan nisalat mid sakey paris a sandalyas iray mairap-bilay,+
Tan nilako mi so andi-kakanaan ya ilik.’
7 Si Jehova et nansamba ed panamegley na ipapasirayew na Jacob,+
‘Agkon balot lingwanan so amin a kagagawa ra.+
8 Onggiwgiw so dalin lapud saya,
Tan manermen so amin a manaayam ditan.+
Agkasi ontagey itan ya intero a singa say Nilo,
Tan ondaluyon tan onlereg a singa say Nilo ed Ehipto?’+
9 ‘Diad satan ya agew,’ so imbaga na Soberanon Katawan a Jehova,
‘Paseleken koy agew legan a kagkaagwan,
Tan pabilungeten koy dalin legan a maliwliwawa ni agew.+
Mangiyan ak na sakon abel ed amin a balangbang tan pagmaliwen kon yangyangan so kada ulo;
Pagmaliwen ko itan a singa panag-ermen ed impatey na alenleneg ya anak,
Tan ampaipait so pansumpalan na satan ya agew.’
11 ‘Onsabi agew,’ so imbaga na Soberanon Katawan a Jehova,
‘A mangiyakar ak na eras diad dalin,
Aliwan eras ed tinapay odino inkapgaan ed danum,
Noagta diad pandengel ed saray salita nen Jehova.+
12 Mantugingging ira manlapud sakey a dayat ya anggad sananey a dayat,
Tan manlapud amianen ya anggad bukig.*
Manteyengteyeng ira diad panaanap dad salita nen Jehova, balet agda naromog.
13 Diad satan ya agew et nalemay iray magangganan birhen,
Ontan met ed saray kalangweran a lalaki, lapud inkapgaan;
14 Saramay mansasamba ed palson dirios na Samaria+ tan mangibabagay,
“Unong a manbibilay so dios mo, O Dan!”+
Tan, “Unong a wala ni so dalan na Beer-sheba!”+
Natumba ra, tan agla ran balot makabangon.’”+