Numeros

22 Insan binmuat iray Israelita tan nankampo rad saray patar a desierto na Moab diad biek na Jordan manlapud Jerico.+ 2 Natan et anengneng nen Balak+ ya anak nen Zipor so amin a ginawa na Israel ed saray Amoreo, 3 tan tinmakot a maong so Moab ed sikara, lapud dakdakel ira; on, natatakot a maong so Moab ed saray Israelita.+ 4 Kanian oniay inkuan na Moab ed saray mamatatken na Midian:+ “Natan et akmonen na sayan kongregasyon so amin a walad kaliberliber tayo, a singa pangaakmon na sakey a baka ed dika diad uma.”

Diad saman et si Balak ya anak nen Zipor so ari na Moab. 5 Sikatoy angibaki na saray mensahero ed si Balaam ya anak nen Beor diad Petor+ a walad abay na Ilog* ed niyanakan ton dalin. Sikatoy impatawag to ya inkuan to: “Wala ray totoo a pinmaway ed Ehipto. Sinakbongan da so tapew* na dalin,+ tan manaayam irad mismon arapan ko. 6 Natan et ipangasim, la ka dia, tan isambam irayan totoo parad siak,+ ta mas mabiskeg ira nen say siak. Agla pigan natalok ira tan napataynan ko rad sayan dalin, ta amtak a siopaman a bendisyonan mo et nabendisyonan tan siopaman ya isambam et nisamba.”

7 Kanian nambiahe iray mamatatken na Moab tan mamatatken na Midian a sankaawit da so bayar parad panagparles tan linma rad si Balaam+ tan imbaga rad sikato so mensahe nen Balak. 8 Diad saman et inkuan tod sikara: “Mansanlabi kayo dia, insan ibagak ed sikayo so amin ya ibaga nen Jehova ed siak.” Kanian nansiansia ni ray prinsipe na Moab ed si Balaam.

9 Insan linmay Dios ed si Balaam tan inkuan to:+ “Siopa irayay kaibam a lalaki?” 10 Inkuan nen Balaam ed tuan Dios: “Angipasabi na mensahe ed siak si Balak ya anak nen Zipor, say ari na Moab, ya inkuan to, 11 ‘Saray totoo a pinmaway ed Ehipto et sasakbongan da so tapew* na dalin. Natan, la ka dia, tan isambam ira parad siak.+ Agla pigan nalabanan tan napataynan ko ra.’” 12 Balet inkuan na Dios ed si Balaam: “Agka mimila ed sikara. Agmo isasamba so totoo, ta abendisyonan ira.”+

13 Binmangon ed kabuasan si Balaam tan oniay inkuan tod saray prinsipe nen Balak: “Pawil ki lad dalin yo, ta agak inabuloyan nen Jehova a mila ed sikayo.” 14 Kanian tinmaynan iray prinsipe na Moab tan pinmawil irad si Balak tan inkuan da: “Aglabay nen Balaam so mila ed sikami.”

15 Balet angibaki lamet si Balak na saray prinsipe, a mas dakdakel tan mas gagalangen nen samay inmunan ulop. 16 Linma rad si Balaam tan inkuan dad sikato: “Oniay inkuan nen Balak ya anak nen Zipor, ‘Ipangasim, agmo aabuloyan a walay makasbel ed sika diad iyakar mod siak, 17 ta pagalangan ta kan maong tan gawaen kon amin so ipagawam ed siak. Kanian ipangasim, la ka dia tan isambam irayan totoo parad siak.’” 18 Balet oniay inyebat nen Balaam ed saray lingkor nen Balak: “Anggano iter ed siak nen Balak so mismon abung to a napnoy pilak tan balitok, agko nayariay manggaway antokaman ya onlampas ed ganggan nen Jehova a Dios ko, balanglan melag odino baleg.+ 19 Balet ipangasi yo, mansanlabi ki met dia, pian naamtaan ko no anto ni ibaga nen Jehova ed siak.”+

20 Insan linmay Dios ed si Balaam diad labi tan inkuan tod sikato: “No sarayan lalaki et linma dia pian itagar da ka, mila ka. Balet ibagam labat iray paibagak ed sika.”+ 21 Kanian binmangon si Balaam diad kabuasan tan imparaan toy asno* to tan akilad saray prinsipe na Moab.+

22 Balet dinmalang so sanok na Dios lapud sikatoy linma, tan inmalagey ed dalan so anghel nen Jehova pian sikatoy amperen to. Natan et akalugan si Balaam ed asno to, tan kaiba to so duaran lingkor to. 23 Tan sanen anengneng na asno so anghel nen Jehova ya akaalagey ed dalan, a sankaegnaan toy sakey ya espada, sinali na satan so ompaliis ed dalan pian onla ed uma. Balet pinekpek nen Balaam so asno pian ompawil ed dalan. 24 Insan inmalagey so anghel nen Jehova diad mainget a dalan a walad baetan na duaran kaubasan, a diad kada diking et walay padir. 25 Sanen anengneng na asno so anghel nen Jehova, inletlet toy inkasikato ed padir tan apildit so sali nen Balaam ed padir, kanian pinekpek to lamet so asno.

26 Natan et inmuna lamet so anghel nen Jehova tan inmalagey ed sakey a mainget a pasen ya anggapo lay nadalan ed kawanan o kawigi. 27 Sanen anengneng na asno so anghel nen Jehova, dinmukol itan legan ya akalugan si Balaam, kanian apasnokan a maong si Balaam tan pinepekpek to na baston to imay asno. 28 Diad saman et pinansalita* nen Jehova imay asno+ tan inkuan na satan ed si Balaam: “Antoy ginawak ed sika? Akin et amitlo mo ak a pinekpek?”+ 29 Inmebat si Balaam ed samay asno: “Ta gagawaen mo ak a makulangkulang. No wala labat so sankabembenan kon espada, pinatey ta ka la komon!” 30 Insan inkuan na samay asno ed si Balaam: “Agta siak so asnom a luluganan mod interon bilay mo ya angga nid natan? Wala ta lay onian ginawak ed sika nensaman?” Sikatoy inmebat: “Anggapo!” 31 Insan nilukasan nen Jehova iray mata nen Balaam,+ tan anengneng to so anghel nen Jehova ya akaalagey ed dalan, a sankaegnaan to so sakey ya espada. Tampol a sikatoy tinmalimukor tan dinmakmomo.

32 Insan inkuan na anghel nen Jehova ed sikato: “Akin et amitlom a pinekpek so asnom? Pinmaway ak a mismo pian mangamper ed sika, lapud kontrad panlabayan koy gagawaen mo.+ 33 Anengneng ak na asno kanian amitlo ton sinali so ompaliis ed siak.+ No ag-itan pinmaliis, apatey ta ka la komon natan balet pansiansiaen kon mabilay so asno.” 34 Inkuan nen Balaam ed anghel nen Jehova: “Nankasalanan ak, ta agko amtan akaalagey kad dalan a mangabet ed siak. Tan natan, no mauges iya ed pakanengneng mo, ompawil ak la.” 35 Balet inkuan na anghel nen Jehova ed si Balaam: “Mila kad saraman a lalaki, balet ibagam labat so paibagak ed sika.” Kanian intuloy nen Balaam so akilad saray prinsipe nen Balak.

36 Sanen nadngelan nen Balak a sinmabi lay Balaam, sikatoy tampol a pinmaway pian abeten tod syudad na Moab, a walad gilig na Arnon diad ketegan na nasasakopan a dalin. 37 Inkuan nen Balak ed si Balaam: “Agta wala ray imbakik a manawag ed sika? Akin et agka linmad siak? Kasin nononoten mo ya agta ka napagalangan a maong?”+ 38 Inmebat si Balaam ed si Balak: “Wadia ak la natan ed sika. Balet kasin naabuloyan ak a mangibagay antokaman? Say ibagak labat et saray salitan iyan na Dios ed sangik.”+

39 Kanian akilay Balaam ed si Balak, tan linma rad Kiriat-huzot. 40 Nambagat si Balak na saray baka tan karnero tan inter to so arum ed si Balaam tan ed saray prinsipen kaiba to. 41 Kaimbuasan to, intagar nen Balak si Balaam tan inyakar tod Bamot-baal; manlapud man et nabantag toy amin a totoo.+