Jeremias

36 Diad komapat a taon nen Jehoiakim+ ya anak nen Josias, say ari na Juda, oniay mensahe nen Jehova a sinmabi ed si Jeremias: 2 “Mangala kay sakey a lukot,* tan isulat mo ditan so amin ya imbagak ed sika sumpad Israel tan Juda+ tan amin a nasyon,+ manlapud samay unonan agew ya akitongtong ak ed sika diad panaon nen Josias ya anggad sayan agew.+ 3 Agla pigan no narengel na saramay walad sankaabungan na Juda so amin a kadederal a ninonot kon gawaen ed sikara et magbabawi ra manlapud mauges iran kabibilay da, pian perdonaen ko rad lingo tan kasalanan da.”+

4 Insan tinawag nen Jeremias si Baruc+ ya anak nen Nerias, tan indikta nen Jeremias so amin ya imbaga nen Jehova ed sikato, tan insulat iratan nen Baruc ed samay lukot.*+ 5 Tan ingganggan nen Jeremias si Baruc: “Asebelan ak ya onloob ed abung nen Jehova. 6 Kanian sika la so onloob tan mangibasan maksil ed saray salita nen Jehova a walad lukot ya angisulatan mod saray indiktak. Basam iratan pian narengel na saray totoo ed abung nen Jehova diad agew na panag-ayunal; diad ontan et nibasam iratan ed amin a totoo na Juda ya onloloob manlapud saray syudad da. 7 Agla pigan onsabid si Jehova so ikekerew day panangasi, tan ibeneg na balang sakey so mauges a kabibilay to, ta baleg so pasnok tan sanok ya imbaga nen Jehova ed sarayan totoo.”

8 Kanian ginawa nen Baruc ya anak nen Nerias so amin ya ingganggan ed sikato nen propeta Jeremias; binasa ton maksil ed lukot* iray salita nen Jehova diad abung nen Jehova.+

9 Diad komaliman taon nen Jehoiakim+ ya anak nen Josias, say ari na Juda, diad komasiam a bulan, inyabawag na amin a totoo ed Jerusalem tan amin a totoo ya onloloob ed Jerusalem manlapud saray syudad na Juda so sakey a panag-ayunal ed arapan nen Jehova.+ 10 Diad saman et maksil a binasa nen Baruc ed lukot* iray salita nen Jeremias diad abung nen Jehova, diad kuarto* nen Gemarias+ ya anak nen Safan,+ say managkopya,* diad bandad tagey a sular, diad lolooban na balon puerta na abung nen Jehova,+ pian narengel na amin a totoo.

11 Sanen nadngel nen Micaias ya anak nen Gemarias ya anak nen Safan so amin a salita nen Jehova ya akasulat ed lukot,* 12 sikatoy linmad abung* na ari, diad kuarto na sekretaryo. Manyudyurong diman so amin a prinsipe:* si Elisama+ a sekretaryo, si Delaias ya anak nen Semaias, si Elnatan+ ya anak nen Acbor,+ si Gemarias ya anak nen Safan, si Zedekias ya anak nen Hananias, tan saray arum nin prinsipe. 13 Imbaga nen Micaias ed sikara so amin a nadngel to sanen imbasa nen Baruc so lukot* ed saray totoo.

14 Diad saman et imbaki na amin a prinsipe si Jehudi ya anak nen Netanias ya anak nen Selemias ya anak nen Cusi pian ibaga tod si Baruc: “Gala tan awit mo imay lukot ya imbasam ed saray totoo.” Inala nen Baruc ya anak nen Nerias so lukot tan sikatoy akila ed sikara. 15 Inkuan dad sikato: “Yurong ka, ipangasim, tan basam itan a maksil ed sikami.” Kanian binasa nen Baruc ed sikara.

16 Sanen nadngel day amin a salita, nannenengnengan irad takot, tan inkuan dad si Baruc: “Nepeg min ibaga ed ari irayan amin a salita.” 17 Tan intepet dad si Baruc: “Ipangasim, ibagam ed sikami no panon mon nisulat irayan amin. Indikta to iya ed sika?” 18 Oniay inyebat nen Baruc ed sikara: “Indikta tod siak irayan amin, tan insulat kod sayan lukot* diad panamegley na tinta.” 19 Inkuan na saray prinsipe ed si Baruc: “La ka la tan amot kayon dua nen Jeremias, tan agyo aabuloyan a naamtaan na anggan siopa no iner so kawalaan yo.”+

20 Insan linma rad ari, diad sular, tan insinop da so lukot diad kuarto nen Elisama a sekretaryo, tan imbaga rad ari so amin a nadngel da.

21 Kanian impaala na ari ed si Jehudi+ so lukot, tan inala to itan ed kuarto nen Elisama a sekretaryo. Binasa itan a maksil nen Jehudi pian narengel na ari tan amin a prinsipe ya akaalagey ed abay na ari. 22 Akayurong so ari diad loob na abung a panaayaman to no ambetel a panaon, diad komasiam a bulan,* tan walay apoy diad dangdangan a walad arapan to. 23 Kayarin nabasa nen Jehudi so talora odino apatiran dasig, pilaten na ari itan a parte diad panamegley na kutsilyo na sekretaryo, insan ibuntok tod apoy ed dangdangan, anggad say interon lukot et apoolan ed dangdangan. 24 Tan ag-ira tinmakot; anggan say ari tan amin a lingkor to ya akadngel ed saratan ya amin et agda pinilat iray kawes da. 25 Anggano akikasi ed ari si Elnatan,+ Delaias,+ tan Gemarias+ pian agto ipool so lukot, agto ra dinengel. 26 Ingganggan ni ingen na ari si Jerameel ya anak na ari, tan si Seraias ya anak nen Azriel, tan si Selemias ya anak nen Abdeel, pian erelen day Baruc a sekretaryo tan si propeta Jeremias, balet inyamot ira nen Jehova.+

27 Tan oniay mensahe nen Jehova a sinmabi lamet ed si Jeremias kayarin pinoolan na ari so lukot ya angisulatan nen Baruc ed saray indikta nen Jeremias:+ 28 “Mangala kay sananey a lukot, tan isulat mo ditan so amin a salita a mipadpara ed samay akaunan lukot a pinoolan nen Arin Jehoiakim na Juda.+ 29 Tan oniay ibagam ed si Arin Jehoiakim na Juda, ‘Oniay inkuan nen Jehova: “Pinoolan mo iyan lukot, tan imbagam ya, ‘Akin et insulat mon: “Onsabi so ari na Babilonia tan deralen to iyan dalin tan paandien to dia so too tan ayep”?’+ 30 Kanian inkuan nen Jehova sumpad si Arin Jehoiakim na Juda, ‘Anggapoy ilalak to ya onyurong ed trono nen David,+ tan say bangkay to et napaulyan ya akapataktak ed petang na agew tan ed betel na labi.+ 31 Mikuentaan ak ed sikato tan ed saray ilalak* to tan saray lingkor to lapud kasalanan da, tan idapok ed sikara tan ed saray manaayam ed Jerusalem tan ed saray totoo na Juda so amin a kadederal a sinalitak sumpad sikara,+ balet agda dinengel.’”’”+

32 Diad saman et angalay Jeremias na sananey a lukot tan inter tod si Baruc ya anak nen Nerias, say sekretaryo,+ tan insulat tod satan so amin a salitan indikta nen Jeremias a walad samay lukot* a pinoolan nen Arin Jehoiakim na Juda.+ Tan dakel ni ran mipadparan salita so niarum.