Nehemias

4 Sanen nadngelan nen Sanbalat+ ya ipapaalagey mi lamet so padir, sikatoy sinmanok tan asyodotan a maong, tan kinantiawan to ray Judio. 2 Tan oniay inkuan to diad arapan na saray agagi to tan armada na Samaria: “Antoy gagawaen na sarayan makapuy a Judio? Gawaen da itan a bukor? Mangibagat ira sirin? Nasumpal day kimey da ed sanagew? Nausar da ni kasi iray apoolan a bato manlapud saray bunton na geray?”+

3 Tan si Tobias+ ya Ammonita+ ya akaalagey ed abay to et inkuan to: “Anggan sakey labat a kuyangen so onkalab ed satay ipapaalagey da, seguradon nageba la ’tay padir da.”

4 Et inkuan nen Nehemias: “O Dios mi, dengel mo kami pa, ta leleglemewen da kami,+ tan say pamabalaw da et ipawil mo komon ed ulo ra,+ tan magmaliw ira komon a samsam tan nibantak ed arum a dalin. 5 Tan agmo komon sasakbongan so lingo ra odino abuloyan a napunas ed arapan mo so kasalanan da,+ ta ininsulto da ray managpaalagey.”

6 Kanian intuloy min inapiger so padir, tan nipaalagey mi lamet so anggad kapalduay kaatagey na interon padir na syudad, tan saray totoo et nantultuloy a nankimey ya impapuso.

7 Sanen nadngelan di Sanbalat, Tobias,+ saray Arabiano,+ Ammonita, tan saray Asdodita+ ya onaaligwas so pangaapiger ed saray padir na Jerusalem tan nasasaraan la ray bungaw, sinmanok iran maong. 8 Nankokomplot ira ya onla tan milaban ed Jerusalem tan manggulo ditan. 9 Balet nampikasi kami ed Dios mi tan angipuesto kami na guardia pian naprotektaan kami ed sikara diad agew tan labi.

10 Balet inkuan na saray totoo na Juda: “Anggapo lay biskeg na saray komikimey,* tan abunbunton ni geray; agtayon balot nasarag ya ipaalagey so padir.”

11 Tan naynay ya ibabaga na saray kalaban mi: “Agda naamtaan odino naliklikas so isabi tayo, tan pateyen tayo ra tan patundaen tayoy kimey da.”

12 Kapagno onsabi iray Judion manaayam diad asingger ed sikara, lanang* dan ibabagad sikami: “Onataki rad sikatayo manlapud amin a direksion.”

13 Kanian angipuesto ak na saray lalaki diad saray sankaleksaban a parte diad bandad benegan na padir ed mapalaway iran pasen, tan impuestok ira a kada pamilya, a de-awit iray espada, gayang, tan saray pana. 14 Sanen anengneng kon natatakot ira, inmalagey ak a tampol tan inkuan kod saray gagalangen a totoo+ tan saray kasandin manuley tan arum nin totoo: “Agkayo natatakot ed sikara.+ Nonot yoy Jehova, samay makapanyari tan makapadinayew;+ tan milaban kayo parad saray agagi yo, anak yon lalaki tan bibii, kaasawaan tan kaabungan yo.”

15 Sanen nadngelan na saray kakabusol mi a naamtaan mi lay gagawaen da tan inamper na tuan Dios so plano ra, pinmawil kamin amin a nankimey ed padir. 16 Manlapud saman ya agew, kapaldua ed saray totook so mankikimey+ tan kapaldua so akabemben na saray gayang, panagsamper, tan pana, tan akasulong na samben ed pagew. Tan saray prinsipe+ et sinmuporta ed* interon sankaabungan na Juda 17 a mangipapaalagey ed padir. Saramay managsakbat et pankikimey day sakey a lima ra tan say sakey a lima ra et akabemben na armas. 18 Tan balang sakey ed saray managpaalagey et akasukbit na espada ed awak to legan a manpapaalagey, tan samay manpaknol na tambuyog+ et akaalagey ed abay ko.

19 Insan imbagak ed saray gagalangen a totoo tan saray kasandin manuley tan ed arum nin totoo: “Balbaleg tan dakdakel so kimey, tan nikaykayat tan nanaarawian tayo. 20 Sano narengel yoy tanol na tambuyog, mitipon kayo ed kawalaan mi. Say Dios tayo so milaban parad sikatayo.”+

21 Kanian intultuloy mi so nankimey legan a say kapaldua et akabemben na saray gayang, manlapud palbangon anggad ipaway na saray bitewen. 22 Diad saman et inkuan kod saray totoo: “Saray lalaki et nepeg a mamalabas na labi diad Jerusalem a kaiba ray lingkor da, tan bantayan da tayo no labi tan mankimey ira no agew.” 23 Kanian siak, saray agagik, saray lingkor ko,+ tan saray guardia a manumtumbok ed siak et agmin balot nilakseb iray kawes mi, tan kada sakey et akabemben na armas so kawanan a lima to.