Salmo

12 Iliktar mo ak pa, O Jehova, ta anggapo lay akeran matoor;

Naupot la ray napanmatalkan a totoo.

 2 Mantitilaan ira;

Uusaren day bibil da ed panaglarog* tan mapalikdoy puso ra* a mansasalita.+

 3 Gapgapen nen Jehova so amin a bibil a malarog

Tan putoten toy dilan malaslastog,+

 4 Saramay mangibabaga: “Manalo kami diad panamegley na dila mi.

Uusaren mi bibil mi anggad labay mi;

Anggapoy nayarin mandiktad sikami.”+

 5 “Lapud nalalames iray pobri,

Lapud paneermen na saray mairap-bilay,+

Manparaan ak ya onkiwas,” kuan nen Jehova.

 6 Saray salita nen Jehova et puro;+

Singa ra pilak a dinalisay ed hurnoan,* a pinapuron aminpito.

 7 Sikay manbantay ed sikara, O Jehova;+

Protektaan moy kada sakey ed sikara manlapud sayan henerasyon ya anggad angga.

 8 Saray mauges et bulos a manliliberliber

Lapud ikakayat na saray anak na totoo so kaugsan.+