Jeremias

42 Insan inmasingger so amin a pangulo na saray armada, pati si Johanan+ ya anak nen Karea, si Jezanias* ya anak nen Osaias, tan say amin a totoo, manlapud sankaabebaan ya anggad sankatageyan 2 tan oniay imbaga rad si propeta Jeremias: “Dengel mo komon so kerew mi, tan ipikasi mo kami ed si Jehova a Dios mo, parad sayan amin ya atilak, ta dagdaiset so akera ed samay datin dakdakel,+ a singa nanenengneng mo. 3 Ibaga komon ed sikami nen Jehova a Dios mo so dalan a nepeg min panakaran tan no antoy nepeg min gawaen.”

4 Oniay inyebat nen propeta Jeremias ed sikara: “Manpikasi ak sirin ed si Jehova a Dios yo unong ed kerew yo; tan ibagak ed sikayo so amin ya ibaga nen Jehova bilang ebat tod sikayo. Anggapoy iyamot kod sikayo.”

5 Oniay inkuan dad si Jeremias: “Komon ta si Jehova et magmaliw a matua tan matoor a tasi sumpad sikami no agmi gawaen so amin ya iganggan ed sikami nen Jehova a Dios mo ya ipasabi tod sika. 6 Balanglan maong odino mauges so ibaga to, tuloken mi so boses nen Jehova a Dios mi ya angibakian mid sika, pian maabig so pansumpalan mi lapud tinulok mi so boses nen Jehova a Dios mi.”

7 Kayari na samploran agew et sinmabi so mensahe nen Jehova ed si Jeremias. 8 Kanian impatawag toy Johanan ya anak nen Karea tan say amin a pangulo na armada a kaiba to tan say amin a totoo, manlapud sankaabebaan ya anggad sankatageyan.+ 9 Imbaga tod sikara: “Oniay inkuan nen Jehova a Dios na Israel, ya angibakian yod siak pian mangipasabi na kerew yod sikato: 10 ‘No mansiansia kayod sayan dalin, ipaalagey ta kayo tan agta kayo igeba, tan itanem ta kayo tan agta kayo bagoten, ta pagbabawian* ko so kadederal ya indapok ed sikayo.+ 11 Agkayo ontatakot lapud ari na Babilonia, a tatakotan yo natan.’+

“‘Agkayo ontatakot lapud sikato,’ so imbaga nen Jehova, ‘ta wadia ak a mangiliktar tan mangilaban ed sikayo manlapud lima to. 12 Tan ipatnag koy panangasi ed sikayo,+ tan kasian to kayo tan ipawil to kayo ed dilin dalin yo.

13 “‘Balet no ibaga yon, “Andi, agmi labay so mansiansia ed sayan dalin!” tan agyo tuloken so boses nen Jehova a Dios yo 14 ya ibaga yon, “Andi, onla kami ed dalin na Ehipto,+ ta diman et anggapoy nanengneng min guerra tan anggapoy narengel min tanol na tambuyog tan agkami naerasan ed tinapay; diman so panayaman mi,” 15 dengel yo sirin so salita nen Jehova, O sikayo ran atilak ed Juda. Oniay inkuan nen Jehova na saray armada, say Dios na Israel: “No talagan ipilit yoy onlad Ehipto tan onla kayon manayam* diman, 16 say mismon espada a tatakotan yo et naabotan to kayo diad dalin na Ehipto, tan say mismon eras a tatakotan yo et tumboken to kayo ed Ehipto, tan diman kayo ompatey.+ 17 Tan say amin a mangipilit ya onlad Ehipto pian manayam diman et ompatey ed espada, eras, tan salot.* Anggapoy makaliktar odino makatakas ed kadederal ya idapok ed sikara.”’

18 “Ta oniay inkuan nen Jehova na saray armada, say Dios na Israel: ‘No panon a say pasnok ko tan sanok ko et inyibung kod saray manaayam ed Jerusalem,+ iyibung ko met ed sikayo so sanok ko no onla kayod Ehipto, tan magmaliw kayon sakey ya ayew, sakey a bengatlan pakataktakotan, kabandayan, tan kabalawan,+ tan agyo lan balot nanengneng iyan pasen.’

19 “Nansalita la si Jehova sumpad sikayo, O sikayo ran atilak ed Juda. Agkayo oonlad Ehipto. Tandaan yo a pinasakbayan ta kayo la natan 20 a nabalang yoy bilay* yo no agkayo ontulok. Ta imbaki yo ak ed si Jehova a Dios yo, ya inkuan yon, ‘Ipikasi mo kami ed si Jehova a Dios mi, tan ibagam ed sikami so amin a bengatlan ibaga nen Jehova a Dios mi, tan gawaen mi itan.’+ 21 Tan imbagak ed sikayo natan, balet agyo tuloken so boses nen Jehova a Dios yo tan agyo gawaen so antokaman a papaibaga tod siak ed sikayo.+ 22 Kanian tandaan yo ya ompatey kayo ed espada, eras, tan salot diad pasen a pipirawaten yon laen tan panayaman.”+