Jeremias
18 Oniay inkuan nen Jehova ed si Jeremias: 2 “Alagey ka tan la kad abung na managdamili,+ tan diman ko ibagad sika iray salitak.”
3 Kanian linma ak ed abung na managdamili, tan anengneng kon walay gagawaen ton pananginan. 4 Balet say pitek a popormaen ton pananginan et aderal ed lima to. Kanian sananey lan klase na pananginan so ginawa to, unong ed anengneng ton manepeg a gawaen.*
5 Insan oniay mensahe nen Jehova a sinmabi ed siak: 6 “‘O sankaabungan na Israel, agko kasi nayarian a gawaen ed sikayo so singa ginawa na sayan managdamili?’ so imbaga nen Jehova. ‘Singa say pitek a walad lima na managdamili, ontan kayo met ed limak, O sankaabungan na Israel.+ 7 Kapiganman a salitaen ko so pamagot tan pangigeba tan paneral ed sakey a nasyon odino panarian,+ 8 tan ibeneg na satan a nasyon so inkauges to a kokondenaen ko, umanen koy kanonotan ko nipaakar ed* kadederal a ninonot kon idapo ed sikato.+ 9 Balet kapiganman a salitaen ko so pangipaalagey tan pangiletneg ed sakey a nasyon odino panarian, 10 tan manggawa itan na mauges ed pakanengneng ko tan agto tuloken so boses ko, umanen koy kanonotan ko nipaakar ed* maabig a ninonot kon gawaen parad sikato.’
11 “Ipangasim, ibagam natan ed saray totoo na Juda tan ed saray manaayam ed Jerusalem, ‘Oniay inkuan nen Jehova: “Iparaan* koy sakey a kadederal tan mannononot ak na sakey a pakana sumpad sikayo. Ipangasi yo, pagbabawian yo so mauges iran dalan yo, tan uman yo iray dalan tan kagagawa yo.”’”+
12 Balet inkuan da: “Anggapo lay nagawaan!+ Ta tumboken mi iray walad dilin kanonotan mi, tan gawaen mi so unong ed inkaawet na mauges a puso mi.”+
13 Kanian oniay inkuan nen Jehova:
“Ipangasi yo, mantepet kayo ed saray nasyon.
Siopa lay akadngel na onia ran bengatla?
Agaylan makapakebbiew so ginawa na birhen na Israel.+
14 Natunaw kasi so niebe ed saray bato ed gilig na kapalandeyan na Lebanon?
Odino naandi kasi so ambetel a danum ya onaagus manlapud arawi?
15 Balet nilingwanan ak na totook.+
Ta nambagat ira* ed andiay kakanaan,+
Tan nanggawa ra na pakatumbaan na totoo diad saray dalan da, saray basbas nensaman,+
Pian manakar ira ed saray angkelag a dalan ya atibagkol tan aliwan plastado,*
16 Pian say dalin da et pagmaliwen dan sakey a pakataktakotan,+
Amin ya ondalan ditan et nataktakot ed nanengneng da tan manpeyeng ra.+
17 Itayak ko rad arapan na kalaban a singa dabok ya itayak na dagem a manlalapud bukig.
Ibeneg ko ra tan agak onarap ed sikara diad agew na pakaderal da.”+
18 Tan inkuan da: “Gali, ta mannonot tayoy gawaen tayon mauges ed si Jeremias,+ ta agnepeg a naandi so ganggan* na saray saserdote tayo, odino say simbawa na saray makabat, odino say salita na saray propeta. Gali, ta sikatoy akusaan tayo,* tan agtayo dengelen iray ibaga to.”
19 Imanom ak, O Jehova,
Tan dengel mo pay ibabaga na saray kalaban ko.
20 Kasin say maong et balesen na mauges?
Ta nankotkot ira na abot parad siak.*+
Nonot mo so inyalagey kod arapan mo pian mansalita na maabig nipaakar ed sikara,
Pian naandi so sanok mod sikara.
21 Kanian iyawat mod eras iray anak dan lalaki,
Tan iter mo ra ed pakayari na espada.+
Naandian komon na ananak tan nabalo iray kaasawaan dan bibii.+
Ompatey komon ed salot iray lalaki,
Tan ompatey ed espada diad guerra iray kalangweran a lalaki.+
22 Narengel komon ed kaabungan da so panakis
Sano biglan ibakim ed sikara iray managsamsam.
Ta nankotkot ira na abot pian naerel da ak,
Tan papatitan da iray salik.+
23 Balet sika, O Jehova,
Amtam ya amin iray plano ran pamatey ed siak.+
Agmo sasakbongan so inkauges da,
Tan agmo pupunasen iray kasalanan da ed arapan mo.