Jeremias

52 Si Zedekias+ et mantaon na 21 sanen nagmaliw ya ari, tan 11 taon a nanuley ed Jerusalem. Say ngaran na ina to et Hamutal+ ya anak nen Jeremias a taga Libna. 2 Sikatoy nantultuloy a nanggaway mauges ed pakanengneng nen Jehova, unong ed amin a ginawa nen Jehoiakim.+ 3 Lapud sanok nen Jehova kanian agawa iraya ed Jerusalem tan Juda, anggad pinataynan to rad arapan to.+ Tan nanrebelde si Zedekias ed ari na Babilonia.+ 4 Diad komasiam a taon na uley nen Zedekias, diad komasamplon agew na komasamplon bulan, nilusob nen Arin Nabucodonosor* na Babilonia tan say interon armada to so Jerusalem. Nankampo ra tan nanggawa ray padir ed kaliberliber to.+ 5 Tan kinubkob da so syudad anggad koma-11 a taon na uley nen Arin Zedekias.

6 Diad komasiam ya agew na komapat a bulan,+ pinasyay eras ed syudad, tan anggapoy naakan na saray totoo ed dalin da.+ 7 Diad kaunoran et abungaw day padir na syudad, tan diad labi et batik so amin a sundalo, a dinmalan irad puerta ed nanleetan na duaran padir diad abay na hardin na ari, legan ya akapaliber ed syudad iray Caldeo; tan nantultuloy iran amaarap ed Araba.+ 8 Balet inusilan na armada na saray Caldeo so ari, tan nabotan day Zedekias+ ed saray patar a desierto na Jerico, tan amin a sundalo to et nitaytayak tan nisian ed sikato. 9 Insan inerel da so ari tan inawit dad ari na Babilonia diad Ribla a walad dalin na Hamat, tan sikatoy senentensiaan to. 10 Tan impapatey na ari na Babilonia iray lalakin ananak nen Zedekias diad arapan to, tan impapatey to met diad Ribla so amin a prinsipe na Juda. 11 Insan binulag na ari na Babilonia si Zedekias,+ binalor to na gansan gulonggulong, inawit tod Babilonia, tan impaipriso to ya anggad agew na impatey to.

12 Diad komasamplon agew na komaliman bulan, salanti, diad koma-19 a taon na uley nen Arin Nabucodonosor* ya ari na Babilonia, sinmabi ed Jerusalem si Nebuzaradan a pangulo na saray guardia, a lingkor na ari na Babilonia.+ 13 Pinoolan toy abung nen Jehova,+ abung* na ari, tan amin a kaabungan ed Jerusalem; pinoolan to met so amin ya angkakabaleg ya abung. 14 Tan saray padir ya akapaliber ed Jerusalem et inggeba na interon armada na saray Caldeo a kaiba na pangulo na saray guardia.+

15 Tan si Nebuzaradan a pangulo na saray guardia et inawit tod dalin da so arum ed saray pobrin totoo tan saray totoon atilak ed syudad. Inawit to met iramay dinmapag la ed ari na Babilonia pati arum ed saray marunong a komikimey.+ 16 Balet intilak nen Nebuzaradan a pangulo na saray guardia so arum a sankapobrian a totoo ed dalin da pian mangasikaso na kaubasan tan obligaen a mantrabaho.+

17 Tan dinederal na saray Caldeo iray gansan lusek+ na abung nen Jehova tan saray kariton+ tan say gansan Dayat+ a walad abung nen Jehova, tan inawit dad Babilonia so amin a gansa.+ 18 Inaala da met iray latan kargaan na dapol, saray pala, saray panag-erep, saray yaong,+ saray kopa,+ tan amin a gansan kagawaan ya uusaren ed panaglingkor ed templo. 19 Inaala na pangulo na saray guardia iray palanggana,+ saray kargaan na ngalab, saray yaong, saray latan kargaan na dapol, saray kandelero,+ saray kopa, tan saray yaong a puron balitok tan pilak.+ 20 Tan agnasimbang ed karakel so gansan inusar ed duaran lusek, say Dayat, say 12 gansa a baka+ a walad silong na samay Dayat, tan saray kariton a ginawa nen Arin Solomon parad abung nen Jehova.

21 Kada sakey ed saray lusek et 18 kasiko* so katagey to, tan makaliber ed satan so sakey a lubir a panagsukat a 12 kasiko ed karukey;+ say kakapal na satan et apatiran gamet,* tan lungogan itan. 22 Tan gawad gansa so ulo na lusek; tan limaran kasiko so katagey na sakey ya ulo;+ tan gawad gansa so amin ya iket tan prutas a granada ya akapaliber ed ulo na lusek. Ontan met so inkagawa na komaduan lusek, pati saray granada. 23 Walay 96 ya akapaliber a prutas a granada; ami-amin et walay 100 a granada ya akapaliber ed iket.+

24 Inawit met na pangulo na saray guardia si Seraias+ a manunan saserdote, si Sofonias+ ya onkokomaduan saserdote, tan say taloran bantay na puerta.+ 25 Tan inala tod syudad so sakey ya opisyal ed palasyo a manangiganggan ed saray sundalo, pitoran maapit a kaulop na ari a wadman ed syudad, pati say sekretaryo na pangulo na armada, samay manitipon ed saray totoo ed dalin da, tan 60 lalaki manlapud karaklan a totoo ed dalin a wadman nid syudad. 26 Inala ira nen Nebuzaradan a pangulo na saray guardia tan inyakar to rad ari na Babilonia diad Ribla. 27 Pinapatey ira na ari na Babilonia diad Ribla+ ed dalin na Hamat. Kanian pinataynan so Juda ed dalin to.+

28 Saraya so totoon inawit nen Nabucodonosor* ed dalin to: diad komapiton taon, 3,023 Judio.+

29 Diad koma-18 taon nen Nabucodonosor,*+ 832 totoo* so inala ed Jerusalem.

30 Diad koma-23 taon nen Nabucodonosor,* inawit nen Nebuzaradan a pangulo na saray guardia iray Judio, 745 totoo.*+

Ami-amin et 4,600 a totoo* so inawit.

31 Insan diad koma-37 taon na inkibantak nen Arin Jehoiakin+ na Juda, diad koma-25 agew na koma-12 bulan, si Arin Evil-merodac na Babilonia, diad taon a sikatoy nagmaliw ya ari, et imbulos toy* Arin Jehoiakin na Juda tan impaway tod prisoan.+ 32 Maabig so impitongtong tod sikato tan impasen toy trono to a mas atagey nen saray trono na arum ya ararin kaiba to diad Babilonia. 33 Kanian nilakseb nen Jehoiakin iray sulong ton kawes na priso, tan sikatoy midudungo ed ari diad amin ya agew na bilay to. 34 Sikatoy inagew-agew a susuplayan na naakan manlapud ari na Babilonia, diad amin ya agew na bilay to, anggad impatey to.