Komaduan Awaran
15 Natan, say espiritu nen Jehova et niwalad si Azarias ya anak nen Oded. 2 Kanian sikatoy pinmaway pian abeten si Asa tan inkuan to: “Dengel yo ak, O Asa tan amin yon taga Juda tan Benjamin! Si Jehova et walad sikayo daput no mansiansia kayod sikato;+ tan no anapen yo, abuloyan ton sikatoy naromog yo,+ balet no taynanan yo, taynanan to kayo.+ 3 Abayag a panaon* a say Israel et andian na tuan Dios, andian na saserdoten manbabangat, tan andian na ganggan.+ 4 Balet sanen pinmawil irad si Jehova a Dios na Israel legan a nagogonigon ira tan sikatoy inanap da, inabuloyan ton naromog da.+ 5 Diad saraman a panaon et anggapoy makapanbiahe a maligen,* ta dakdakel so nagagawan gulo ed limog na amin a manaayam ed saray teritorya ra. 6 Say sakey a nasyon et tataloen na sananey a nasyon tan say sakey a syudad et tataloen na sananey a syudad, lapud pinansiansia na Dios a maguloy kipapasen da diad panamegley na nanduruman klase na irap.+ 7 Balet manpabiskeg kayo tan agkayo nadidismaya,*+ ta natumangan kayo ed gagawaen yo.”
8 Sanen nadngel nen Asa irayan salita tan say propesiya nen Oded a propeta, sikatoy nampakpel tan ineekal to ray makapadimlan idolo diad amin a dalin na Juda+ tan Benjamin tan diad saray syudad ya asakop to ed mapalandey a rehyon na Efraim, tan inapiger toy altar nen Jehova a walad arap na balkonahe na abung nen Jehova.+ 9 Tan tinipon to so amin a taga Juda tan Benjamin tan saray dayon miaayam ed sikara a nanlapud Efraim, Manases, tan Simeon,+ ta dakdakel ira a dinmapag ed sikato manlapud Israel sanen anengneng dan walad sikato si Jehova a Dios to. 10 Kanian nantitipon ira ed Jerusalem diad komatlon bulan na koma-15 taon na uley nen Asa. 11 Diad saman ya agew et angibagat irad si Jehova na 700 a baka tan 7,000 karnero manlapud saray asamsam da. 12 Ontan met, akisipanan ira ya anapen day Jehova a Dios na inmuunan atateng da diad interon puso ra tan diad interon kamarerwa* ra.+ 13 Siopaman ya agmananap ed si Jehova a Dios na Israel et nepeg a pateyen, abeba man odino atagey so kipapasen to, laki man odino bii.+ 14 Kanian nansamba rad si Jehova diad maksil a boses, a maneyag irad liket, tan amaknol ira na saray trumpeta tan tambuyog. 15 Et nanliketan na interon Juda imay sinambaan da, ta sikaray nansamba diad interon puso ra tan sikatoy mabulos dan inanap kanian inabuloyan ton sikatoy naromog da,+ tan impanpainawa ira nen Jehova manlapud amin ya akapaliber a kalaban da.+
16 Inekal ni ingen nen Arin Asa bilang reyna si Maaca+ a bai to lapud sikatoy nanggawa na mabanbanday ya idolo parad panagdayew ed sagradon poste.*+ Intumba nen Asa so mabanbanday ya idolo nen bai to tan tinemek to tan pinoolan to diad Lawak na Kidron.+ 17 Ingen ta saray atagey a pasen et agnaandi+ ed Israel.+ Balet diad interon bilay* nen Asa et matoor* so puso to.+ 18 Tan inyan tod abung na tuan Dios iray bengatlan pinasanto to tan nen ama to—saray pilak, balitok, tan nanduruman kagawaan.+ 19 Anggapo so agawan guerra anggad koma-35 taon na uley nen Asa.+