Jeremias

7 Oniay inkuan nen Jehova ed si Jeremias: 2 “Manalagey kad puerta na abung nen Jehova, tan ipasabim iyan mensahe, ‘Dengel yoy salita nen Jehova, amin yon totoo na Juda ya onloloob ed sarayan puerta pian ondakmomo ed si Jehova. 3 Oniay inkuan nen Jehova na saray armada, say Dios na Israel: “Uman yo ray kabibilay yo tan kagagawa yo, pian abuloyan ta kayon mansiansia ed sayan pasen.+ 4 Agkayo manmamatalek ed saray makapalikdon salita diad pangibaga yoy, ‘Saya* so templo nen Jehova, say templo nen Jehova, say templo nen Jehova!’+ 5 No talagan umanen yo ray kabibilay yo tan kagagawa yo; no talagan ipanengneng yoy hustisya ed baetan na sakey a too tan say kapara ton too;+ 6 no agyo pairapen iray dayon miaayam, saray ulila,* tan saray balo;+ no agkayo mangipaagus na dala na andiay kasalanan ed sayan pasen; tan no agkayo ontumbok ed arum a dirios a sengegay pakasakitan yo;+ 7 abuloyan ta kayon mansiansia ed sayan pasen, say dalin ya inter ko ed saray inmuunan atateng yo, diad amin a panaon.”’”*

8 “Balet manmamatalek kayo ed saray makapalikdon salita+—ag-itan balot makagunggona. 9 Nayarian yo kasi mantakew,+ mamatey, mikalugoran, mansamba na tila,+ manbagat* ed Baal,+ tan ontumbok ed dirios ya agyo kabat, 10 insan kayo onlad sayan abung a tinawag ed ngaran ko tan onalagey kayod arapan ko tan ibaga yon, ‘Niliktar kami,’ anggano makapadimla irayan amin a gagawaen yo? 11 Ipapasen yo ta lan ungib na matatakew iyan abung a tinawag ed ngaran ko?+ Anengneng kon mismo iya,” so imbaga nen Jehova.

12 “‘Balet la kayo natan ed pasen a panaayaman ko diad Silo,+ say inmunan pasen a pinilik parad ngaran ko,+ tan nengneng yo no antoy ginawak ditan lapud inkauges na Israel a totook.+ 13 Balet intultuloy yon ginawa irayan amin a bengatla,’ so imbaga nen Jehova, ‘tan anggano akitongtong ak ed sikayo ya aminpigapiga,* agkayo dinmengel.+ Agak tinmundan tinmawag ed sikayo, balet agkayo inmebat.+ 14 Kanian no antoy ginawak ed Silo et ontan met so gawaen ko ed panmamatalekan yon abung a tinawag ed ngaran ko,+ tan ed sayan pasen ya inter kod sikayo tan ed inmuunan atateng yo.+ 15 Ekalen ta kayo diad pakanengneng ko, a singa impangekal kod amin ya agagi yo, say amin a kailalakan nen Efraim.’+

16 “Balet sika, agmo ipipikasi irayan totoo. Agka onaakis odino manpipikasi odino onkekerew ed siak parad sikara,+ ta agta ka dengelen.+ 17 Agmo ta nanenengneng so gagawaen dad saray syudad na Juda tan ed saray karsada na Jerusalem? 18 Saray ananak so mankikiew, tan saray kaamaan so mamaparlang na apoy, tan saray kaasawaan a bibii so manmamasa na arina pian manggawa iray bagat a bibingka parad Reyna na Tawen,*+ tan mangiyiibung ira na apay ya iinumen parad arum a dirios pian pasanoken da ak.+ 19 ‘Balet kasin siak so sasakitan* da?’ so imbaga nen Jehova. ‘Agta say sarili da lanlamang, diad dilin kababaingan da?’+ 20 Kanian oniay inkuan na Soberanon Katawan a Jehova, ‘Iyibung ko so pasnok tan sanok ko ed sayan pasen,+ ed too, ed ayep, ed saray kiew ed uma tan ed saray bunga na dalin; ondalang itan tan agnaerep.’+

21 “Oniay inkuan nen Jehova na saray armada, say Dios na Israel, ‘Sige, iyarum yo iray interon apay yon popoolan ed saray arum nin bagat yo, tan akan yo so karne.+ 22 Ta diad samay agew ya impaway ko iray inmuunan atateng yo ed dalin na Ehipto, agak nansalita ed sikara odino ingganggan ko ra nipaakar ed saray interon apay a popoolan tan bagat.+ 23 Balet saya so ingganggan kod sikara: “Tulok yoy boses ko, tan siak so magmaliw a Dios yo, tan sikayo so magmaliw a totook.+ Tumbok yo so amin a dalan ya iganggan ko, pian maabig so pansumpalan yo.”’+ 24 Balet ag-ira dinmengel odino tinmalineng;+ noagta nanakar ira unong ed dilin panlabayan* da, ya impilit dan tumboken so mauges a puso ra,+ kanian pasener ira, aliwan paabante, 25 manlapu lad samay agew na impaway na saray inmuunan atateng yo ed dalin na Ehipto ya anggad sayan agew.+ Kanian ibabakik ed sikayo iray amin a lingkor kon propeta, ya inagew-agew tan aminpigapiga.*+ 26 Balet agda ak dinengel, tan agda ak tinalineng.+ Benger ira,* tan mas mauges ni ginawa ra nen saray inmuunan atateng da!

27 “Ibagam ed sikara irayan amin a salita,+ balet agda ka dengelen; tawagen mo ra, balet agda ka ebatan. 28 Tan ibagam ed sikara, ‘Saya so nasyon ya agtinmulok ed boses nen Jehova a Dios da tan ag-angawat na disiplina. Anggapo lay manmamatoor, tan agda la anggan nabibitla itan.’*+

29 “Kiskis yo so ag-akatli* a buek yo tan ibantak yo, tan mangansion kayo na tagleey* ed saray pukdol ya anggapoy tanem, ta impulisay la nen Jehova tan taynanan to la iyan henerasyon ya amasanok ed sikato. 30 ‘Ta ginawa na saray totoo na Juda so mauges ed pakanengneng ko,’ so imbaga nen Jehova. ‘Inyan da iray makapadimlan idolo ra diad abung a tinawag ed ngaran ko, pian dutakan da itan.+ 31 Impaalagey da iray atagey a pasen na Tofet, a walad Lawak na Anak nen Hinom,*+ pian poolan da iray ananak dan lalaki tan bibii,+ a satan et agko ingganggan tan agbalot anggan linmad pusok.’*+

32 “‘Kanian onsabi panaon,’ so imbaga nen Jehova, ‘sano agla itan tawagen a Tofet odino Lawak na Anak nen Hinom,* noagta say Lawak na Panagpateyan. Iponpon da ray inaatey diad Tofet anggad anggapo lay pasen a pangiponponan.+ 33 Tan saray bangkay na sarayan totoo et kanen na saray manok tan saray ayayep, ya anggapoy mangablog ed sikara.+ 34 Paandien ko so tanol na panliliket tan gayaga, say boses na nobyo tan nobya,+ diad saray syudad na Juda tan ed saray karsada na Jerusalem, ta nageraygeray iyan dalin.’”+