Jeremias

24 Insan impanengneng nen Jehova ed siak so duaran baskit a nankargay igos a walad arapan na templo nen Jehova, kayarin inerel nen Arin Nabucodonosor* na Babilonia si Jeconias*+ ya anak nen Jehoiakim,+ say ari na Juda, pati saray prinsipe na Juda, saray marunong a komikimey, tan saray latero;* inala to rad Jerusalem pian awiten to rad Babilonia.+ 2 Samay sakey a baskit et nankargay agaylay abig iran igos, singa saray unonan bunga na igos, balet samay sananey a baskit et nankargay aliwliwa iran igos ya agnayarin kanen.

3 Insan oniay intepet nen Jehova ed siak: “Antoy nanenengneng mo, Jeremias?” Inkuan ko: “Bungay igos; saramay maabig ya igos et talagan alay abig, balet saramay aliwliwan igos et talagan aliwliwa kanian agnayarin kanen.”+

4 Insan oniay mensahe nen Jehova a sinmabi ed siak: 5 “Oniay inkuan nen Jehova a Dios na Israel, ‘Singa sarayan maabig ya igos, maabig met so pakanengneng kod saramay nanlapud Juda a nibantak ed arum a bansa, a pinataynan ko ed sayan pasen tan niyakar ed dalin na saray Caldeo. 6 Bantayan ko ra parad pankaabigan da, tan papawilen ko rad sayan dalin.+ Iletneg ko ra, tan agko ra igeba; tan itanem ko ra, tan agko ra bagoten.+ 7 Tan ikdan ko ra na puso a makapikabat ed siak, a siak si Jehova.+ Magmaliw iran totook, tan siak so magmaliw a Dios da,+ ta ompawil ira ed siak diad interon puso ra.+

8 “‘Balet nipaakar ed saray aliwliwan igos ya agnayarin kanen,+ oniay inkuan nen Jehova: “Ontan so pakanengneng kod si Arin Zedekias+ na Juda, saray prinsipe to, tan saray akeraan ed Jerusalem ya atilak ed sayan dalin, tan ed saramay manaayam ed dalin na Ehipto.+ 9 Deralen ko ra pian ontakot so amin a panarian diad dalin,+ tan magmaliw iran sakey a kabalawan, pantotongtongan, ludlureyen, tan sakey ya ayew+ diad amin a pasen a pangitayakan kod sikara.+ 10 Tan iyakar kod sikara so espada,+ eras, tan salot,*+ anggad sigpot iran naandi diad dalin ya inter kod sikara tan ed saray inmuunan atateng da.”’”