Jeremias
11 Oniay mensahe nen Jehova ed si Jeremias: 2 “Sikayo ran totoo, dengel yo iray salita na sayan sipanan!
“Salitam* iraya ed saray totoo na Juda tan saray manaayam ed Jerusalem 3 tan ibagam ed sikara, ‘Oniay inkuan nen Jehova, say Dios na Israel: “Naayew so too ya ag-ontulok ed saray salita na sayan sipanan,+ 4 ya ingganggan kod saray inmuunan atateng yo diad samay agew ya impaway ko rad dalin na Ehipto,+ manlapud hurno a panagtunawan na balatyang,+ ya inkuan ko, ‘Tulok yoy boses ko, tan gawa yon amin so ingganggan kod sikayo; tan magmaliw kayon totook tan siak so magmaliw a Dios yo,+ 5 pian sumpalen koy insipan kod saray inmuunan atateng yo, ya iter kod sikara so dalin a manag-agus so gatas tan dilo,+ a singa natan.’”’”
Tan inyebat ko: “Amen,* O Jehova.”
6 Insan inkuan nen Jehova ed siak: “Ipaamtam ya amin irayan salita ed saray syudad na Juda tan ed saray karsada na Jerusalem: ‘Dengel yo iray salita na sayan sipanan, tan sumpal yo. 7 Ta binilin kon maong iray inmuunan atateng yo diad samay agew ya impaway ko rad dalin na Ehipto tan anggad sayan agew, aminpigapigak ya imbilin:* “Tulok yoy boses ko.”+ 8 Balet ag-ira dinmengel odino tinmalineng, noagta impilit dan tumboken so mauges a puso ra.+ Kanian ginawak ed sikara so amin a salita na sayan sipanan lapud agda inunor so ingganggan ko ed sikara.’”
9 Insan inkuan nen Jehova ed siak: “Nankokomplot iray totoo na Juda tan saray manaayam ed Jerusalem. 10 Pinmawil ira ed saray kasalanan na inmuunan atateng da, ya agtinmulok ed saray salitak.+ Tinmumbok met ira ed arum a dirios tan nanlingkoran da iratan.+ Dineral na sankaabungan na Israel tan sankaabungan na Juda so impisipanan kod saray inmuunan atateng da.+ 11 Kanian inkuan nen Jehova, ‘Idapok ed sikara so kadederal+ ya agda nibatikan. Sano onkerew ira na tulong ed siak, agko ra dengelen.+ 12 Insan saray syudad na Juda tan saray manaayam ed Jerusalem et onlan onkerew na tulong ed saray dirios a pambabagatan da,*+ balet ag-ira niliktar na saratan sano onsabi ed sikara so kadederal. 13 Ta saray dirios mo, O Juda, et singa karakel na saray syudad mo, tan singa karakel na saray karsada na Jerusalem so inyan mon altar parad makapabaing a bengatla,* saray pambabagatan ya altar parad si Baal.’+
14 “Balet sika,* agmo ipipikasi irayan totoo. Agka onaakis odino manpipikasi parad sikara,+ ta agak ondengel sano ontawag ira ed siak lapud pakaderal da.
15 Antoy kanepegan na saray pinablik a totoo ya onlad abung ko,
Anta dakdakel ed sikara so manggagaway kaugsan?
Anggan diad panamegley na sagradon karne,* naamper da kasi so kadederal sano onsabi itan ed sikayo?
Manliket kayo kasi ed satan a panaon?
16 Tinawag ka nensaman nen Jehova bilang sakey a mabunan kiew ya olibo,
A marakep lapud maabig a bunga to.
Diad maksil ya ungol et pinoolan to itan,
Tan pinuter na saray kalaban iray sanga na satan.
17 “Inyabawag nen Jehova na saray armada, ya angitanem ed sika,+ a walay onsabin kadederal ed sika lapud kaugsan a ginawa na sankaabungan na Israel tan say sankaabungan na Juda, ta pinasanok da ak lapud nambagat irad si Baal.”+
18 Pinakabatan ak nen Jehova pian naamtaan ko;
Diad saman a panaon et impanengneng mod siak iray gagawaen da.
19 Singa ak maamon kordero ya inyakar ed panagpateyan.
Agko amta a manplaplano ran onsumpad siak:+
“Deralen tayo so kiew pati say bunga to,
Tan sikatoy ekalen tayo ed dalin na saray mabilay,
Pian agla nanonotan so ngaran to.”
20 Balet si Jehova na saray armada et matunong so panangukom to;
Ipanengneng mo komon ed siak so ibales mod sikara,
Ta sika so angimatalekan koy kasok.
21 Kanian oniay inkuan nen Jehova sumpad saray totoo na Anatot+ a malabay a mamatey ed sika,* tan ibabaga ran: “Agka manpropropesiya ed ngaran nen Jehova,+ ta no andi et pateyen mi ka”; 22 kanian oniay inkuan nen Jehova na saray armada: “Dusaen ko ra. Ompatey ed espada iray kalangweran a lalaki,+ tan ompatey ed eras iray anak dan lalaki tan bibii.+ 23 Anggapoy anggan sakey a nakera ed sikara, lapud deralen ko ray totoo na Anatot,+ diad taon na pikuentaan ed sikara.”