Deuteronomio

29 Saraya so salita na sipanan ya ingganggan nen Jehova ed si Moises a paletan tod saray totoo na Israel diad dalin na Moab, nilikud ed samay impisipanan tod sikara diad Horeb.+

2 Insan tinawag nen Moises so interon Israel tan inkuan tod sikara: “Anengneng yon mismo ed arapan yo so amin a ginawa nen Jehova diad dalin na Ehipto ed say Faraon tan amin ya ariripen to tan say interon dalin to,+ 3 saray angkakabaleg a panangukom* ya anengneng yo, saraman ya angkakabaleg a tanda tan milagro.+ 4 Balet agkayo inikdan nen Jehova na sakey a puso a makatalos tan saray mata a makanengneng tan saray layag a makadngel anggad sayan agew.+ 5 ‘Legan ya iwawanwan ta kayo diad kalawakan ed loob na 40 taon,+ agdinmaan iray kawes yo, tan agdinmaan iray sandalyas yo.+ 6 Agkayo angan na tinapay, tan agkayo inminum na alak odino antokaman a de-alkohol ya iinumen, pian naamtaan yo a siak si Jehova a Dios yo.’ 7 Insan akasabi kayod sayan pasen, tan pinmaway si Sihon ya ari na Hesbon+ tan si Og ya ari na Basan+ pian miguerra ed sikatayo, balet tinalo tayo ra.+ 8 Kayari na satan et inala tayo so dalin da tan inter tayod saray Rubenita, Gadita, tan kapalduan tribu na saray Manasita+ bilang tawir da. 9 Kanian sumpal yo iray salita na sayan sipanan tan tulok yo iratan, pian maabig so pansumpalan na amin a gawaen yo.+

10 “Akaalagey kayon amin natan ed arapan nen Jehova a Dios yo, saray papangulo na saray tribu yo, saray mamatatken yo, saray opisyal yo, balang laki ed Israel, 11 saray ananak yo, kaasawaan yo,+ tan saray dayon+ walad pegley na kampo yo, manlapud samay managkiew yo ya anggad samay manag-asol na danum yo. 12 Wadia kayo pian magmaliw kayon kabiangan ed sipanan nen Jehova a Dios yo tan ed samba to, a paletan nen Jehova a Dios yo ed sikayo natan+ 13 pian magmaliw kayo natan a totoo to+ tan sikato so magmaliw a Dios yo,+ unong ya insipan tod sikayo tan unong ya insamba tod saray inmuunan atateng yon si Abraham,+ Isaac,+ tan Jacob.+

14 “Natan et aliwan sikayo labat so pisisipanan ko tan pangiiteran kod sayan samba, 15 noagta pati saramay kaiba tayon akaalagey dia natan ed arapan nen Jehova a Dios tayo tan ed saramay agtayo kaiba dia natan. 16 (Ta amta yo no panon so impanbilay tayod dalin na Ehipto tan no panon so indalan tayod pegley na saray nanduruman nasyon diad impanbiahe tayo.+ 17 Tan anengneng yo nensaman iray makapadimlan imahen da tan saray makapadimlan idolo* ra+ a gawad kiew tan bato, pilak tan balitok, a walad limog da.) 18 Manalwar kayo ya anggapo komoy laki odino bii, pamilya odino tribu ed limog yo natan, a say puso to et onarawi ed si Jehova a Dios tayo pian manlingkor ed saray dirios na saraman a nasyon,+ tan anggapo komon ed limog yo so magmaliw a lamot a mamawala na makasamal a bunga tan ahenho.+

19 “Balet no nadngel na sakey a too iray salita na sayan samba tan ipasirayew tod puso to, ya ikuan ton, ‘Nawalaan ak na kareenan, anggano ipilit kon gawaen so panlabayan na pusok,’ a pakaderalan na amin* a dalanen to, 20 sikatoy agperdonaen nen Jehova.+ Imbes, ondalang so baleg a sanok nen Jehova ed satan a too, tan ondapo ed sikato so amin ya ayew a nisulat ed sayan libro,+ tan seguradon paandien nen Jehova so ngaran to diad silong na tawen. 21 Sikatoy ibiig nen Jehova manlapud amin a tribu na Israel pian idapo tod sikato so desyang, unong ed amin ya ayew a walad sipanan a nisulat ed sayan libro na Ganggan.

22 “Sano nanengneng na ontumbok a henerasyon na saray ananak yo tan say dayo manlapud arawin dalin iray salot ed satan a dalin, saray sakisakit ya indapo nen Jehova ditan— 23 say asupre tan asin tan pool, kanian agnataneman odino natuboan na bini so interon dalin, tan ag-ontubo ditan so antokaman a tanaman, a singa say impakaderal na Sodoma tan Gomorra,+ Adma tan Zeboim,+ a dineral nen Jehova lapud sanok tan pasnok to— 24 ibaga ra tan ibaga na amin a nasyon, ‘Akin et oniay ginawa nen Jehova ed sayan dalin?+ Antoy sengegan na sayan baleg tan mandarlang a sanok?’ 25 Insan ibaga ran, ‘Lapud tinaynan da so sipanan nen Jehova+ a Dios na saray inmuunan atateng da, a pinaletan tod sikara sanen impaway to rad dalin na Ehipto.+ 26 Tan linma ran nanlingkor ed arum a dirios tan dinmakmomo rad saratan, saray dirios ya agda kabat tan agto inabuloyan a dayewen da.*+ 27 Insan dinmapo so mandarlang a sanok nen Jehova ed satan a dalin diad impangiyakar to ditan na amin ya ayew a nisulat ed sayan libro.+ 28 Kanian binagot ira nen Jehova ed dalin da lapud pasnok+ tan baleg a sanok to tan imbantak to rad arum a dalin, a kawalaan da natan.’+

29 “Saray bengatlan niyamot et kien nen Jehova a Dios tayo,+ balet saray bengatlan niparungtal et kien tayo tan saray kapolian tayo ed andi-anggaan, pian nasumpal tayo so amin a salita na sayan Ganggan.+