Jeremias

35 Saya so mensahe nen Jehova a sinmabi ed si Jeremias diad panaon nen Jehoiakim+ ya anak nen Josias, say ari na Juda: 2 “La kad abung na saray Recabita+ tan mitongtong kad sikara tan awit mo rad abung nen Jehova, diad sakey ed saray kuarton pananganan;* insan ikdan mo ray alak ya inumen.”

3 Kanian intagar koy Jaazanias ya anak nen Jeremias ya anak nen Habazinias, saray agagi to, amin ya ananak ton lalaki, tan say interon sankaabungan na saray Recabita, 4 tan inawit ko rad abung nen Jehova. Inyakar ko ra diad kuarton pananganan na saray ananak nen Hanan ya anak nen Igdalias, sakey a too na tuan Dios, a satan et walad abay na kuarton pananganan na saray prinsipe a walad tagey na kuarton pananganan nen Maasias ya anak nen Salum a bantay na puerta. 5 Insan inyan kod arapan na saray lalaki ed sankaabungan na saray Recabita iray kopa a napno na alak tan inkuan kod sikara: “Inum kayo.”

6 Balet inkuan da: “Agkami oninum na alak, ta ingganggan ed sikami na inmunan ateng mi a si Jehonadab*+ ya anak nen Recab, ‘Agkayo oniinum na alak anggan kapigan, sikayo odino saray ananak yo. 7 Agkayo met nepeg a mangipaalagey na abung, mangitanem na bini, odino mantanem tan nawalaan na kaubasan. Balet mansiansia kayon manayam ed saray tolda, pian andukey so pambilay yo diad tapew na dalin a panaayaman yo bilang dayo.’ 8 Kanian uunoren mi so amin a salitan ingganggan ed sikami na inmunan ateng mi a si Jehonadab ya anak nen Recab, diad agmin balot iyinum na alak—sikami, saray kaasawaan mi, tan saray ananak min lalaki tan bibii. 9 Agkami met manpapaalagey na kaabungan a panayaman mi, tan anggapoy kayarian min kaubasan, uma, odino bini. 10 Diad saray tolda so panaayaman mi tan uunoren min amin so ingganggan ed sikami nen Jehonadab* ya inmunan ateng mi. 11 Balet sanen tinmatdang si Arin Nabucodonosor* na Babilonia sumpad sayan dalin,+ inkuan mi, ‘Gali, ta onloob itayo ed Jerusalem pian naliktaran tayo so armada na saray Caldeo tan saray Siryano,’ kanian manaayam kami natan ed Jerusalem.”

12 Tan saya so mensahe nen Jehova a sinmabi ed si Jeremias: 13 “Oniay inkuan nen Jehova na saray armada, say Dios na Israel, ‘La ka, tan ibagam ed saray totoo na Juda tan saray manaayam ed Jerusalem: “Agta aminpigapiga kayon abilin a mangunor ed saray salitak?”+ so imbaga nen Jehova. 14 “Ingganggan nen Jehonadab ya anak nen Recab iray kailalakan to ya ag-ira oninum na alak, tan sinumpal day salita to diad agda inyinum na alak anggad sayan agew, kanian inunor day ganggan na inmunan ateng da.+ Balet siak, nansalita ak ed sikayo ya aminpigapiga,* balet agyo ak inunor.+ 15 Tan ibabakik ed sikayo so amin a lingkor kon propeta, ya aminpigapigak iran imbaki,*+ tan ibabaga ran, ‘Ipangasi yo, ibeneg komon na balang sakey ed sikayo iray mauges a kagagawa to,+ tan gawa yo no antoy duga! Agkayo ontutumbok ed saray arum a dirios pian panlingkoran iratan. No gawaen yo itan, mansiansia kayon manayam ed dalin ya inter kod sikayo tan ed saray inmuunan atateng yo.’+ Balet agkayo dinmengel odino tinmalineng ed siak. 16 Sinumpal na saray ilalak nen Jehonadab ya anak nen Recab so ganggan ed sikara na inmunan ateng da,+ balet agdinmengel ed siak irayan totoo.”’”

17 “Kanian oniay imbaga nen Jehova a Dios na saray armada, say Dios na Israel: ‘Idapok ed Juda tan ed amin a manaayam ed Jerusalem so amin a kadederal ya impasakbay kod sikara,+ lapud nansalita ak ed sikara balet ag-ira dinmengel, tan agak tinmundan tinmawag ed sikara balet ag-ira inmebat.’”+

18 Tan oniay inkuan nen Jeremias ed sankaabungan na saray Recabita: “Inkuan nen Jehova na saray armada, say Dios na Israel, ‘Lapud inunor yoy ganggan nen Jehonadab ya inmunan ateng yo tan tutuloken yo so amin a ganggan to tan gagawaen yo so unong ed ingganggan tod sikayo, 19 oniay inkuan nen Jehova na saray armada, say Dios na Israel: “Walan walay ilalak nen Jehonadab* ya anak nen Recab a manlingkor ed arapan ko.”’”