Daniel

10 Diad komatlon taon nen Arin Ciro+ na Persia, walay mensahen niparungtal ed si Daniel ya inngaran a Beltesazar;+ tan sayan mensahe et tua, tan nipaakar iya ed baleg a panlalaban. Tan atalosan to so mensahe tan naikdan na pakatalos ed anengneng to.

2 Diad saraman ya agew, siak, si Daniel, et taloy simba lan maneermen.+ 3 Agak angan na mananam a kakanen, tan anggapoy karne odino alak a linmoob ed sangik, tan agak nampuyok na larak ed taloran simba. 4 Diad koma-24 ya agew na unonan bulan, legan a wala ak ed gilig na baleg ya ilog, say Tigris,*+ 5 tinmangwa ak tan anengneng koy sakey a lakin akakawes na linen,+ tan walad awak to so balkes a gawad balitok na Upaz. 6 Say laman to et singa baton crisolito,+ say lupa to et singa kirmat, saray mata to et singa mandarlang a silesilew, saray taklay tan sali to et singa pinasileng a gansa,+ tan say kakasil na boses to et singa boses na dakerakel a totoo. 7 Siak, si Daniel, so akanengneng labat ed samay pasingawey; ag-itan anengneng na saray lalakin kaibak.+ Balet ginmiwgiw iran maong, kanian batik tan inmamot ira.

8 Insan bukbukor koy atilak, tan sanen anengneng ko iyan baleg a pasingawey, anggapo lay akeran biskeg ko tan aderal so mapagalang ya itsurak tan kinmapuy ak a maong.+ 9 Tan nadngel koy pansasalita to; balet sanen nadngel koy pansasalita to, akaugip ak a maong tan akasubsob ak ed dalin.+ 10 Insan walay aniwit ed siak,+ tan tinenyeg to ak pian nabangon ak tan makatalimukor ak. 11 Tan inkuan tod siak:

“O Daniel, sikan pinabpabli* a too,+ imanom iray salita ya ibagak ed sika. Alagey ka natan ed kawalaan mo, ta nibaki ak ya onlad sika.”

Sanen imbaga to iya ed siak, manggiwgiw ak ya inmalagey.

12 Insan inkuan tod siak: “Agka natatakot,+ O Daniel. Nadngel to iray salitam manlapud inmunan agew ya impapusom so panaanap ed kabaliksan na saraya tan nampaabeba kad arapan na Dios mo, tan linma ak dia lapud saray salitam.+ 13 Balet sinmumpad siak so prinsipe+ ed panarian na Persia diad 21 ya agew. Insan sinmabi si Miguel,*+ sakey ed saray manunan prinsipe,* pian tulongan to ak; tan nansiansia ak diman ed kawalaan na saray arari na Persia. 14 Linma ak dia pian ipaliwawak ed sika so nagawa ed saray kanasyonan mo diad kaunoran iran agew,+ ta sakey iyan pasingawey nipaakar ed saray agew ya onsabi.”+

15 Sanen imbaga tod siak irayan salita, tinmuek ak tan agak akasalita. 16 Insan walay singa too ya aniwit ed saray bibil ko,+ kanian biniswat koy sangik tan inkuan kod samay akaalagey ed arapan ko: “Katawan ko, manggiwgiw ak lapud samay pasingawey, tan kinmapuy ak a maong.+ 17 Kanian panon a makapitongtong ed sika so lingkor mo, katawan ko?+ Ta anggapo lay biskeg ko, tan anggapo lay linawan akera ed siak.”+

18 Diniwit ak lamet na samay kaparpara na sakey a too tan pinabiskeg to ak.+ 19 Insan inkuan to: “Agka natatakot,+ O sikan pinabpabli* a too.+ Niwala komon ed sika so kareenan.+ Manpabiskeg ka, on, manpabiskeg ka.” Sanen sikatoy nansalita ed siak, apabiskeg ak tan inkuan ko: “Mansalita ka, katawan ko, lapud pinabiskeg mo ak.”

20 Kanian inkuan tod siak: “Amtam no akin a linma ak ed sika? Ompawil ak natan a milaban ed prinsipe na Persia.+ Sano ontaynan ak, onsabi so prinsipe na Gresya. 21 Balet ibagak ed sika iray bengatlan nisulat ed libro na katuaan. Anggapoy arum a maksil ya ontutulong ed siak noagta si Miguel,+ say prinsipe yo.+