Numeros

9 Akitongtong si Jehova ed si Moises diad kalawakan na Sinai ed unonan bulan+ na komaduan taon kayari na impaway dad dalin na Ehipto, ya inkuan to: 2 “Nepeg ya itarya na saray Israelita so bagat parad Paskua+ diad aturon panaon na satan.+ 3 Diad koma-14 ya agew na sayan bulan, diad pansirunget,* nepeg mon itarya itan ed aturon panaon na satan. Nepeg mon itarya itan unong ed amin a ganggan tan amin a niletneg a totontonen parad satan.”+

4 Kanian imbaga nen Moises ed saray Israelita ya itarya ra so bagat parad Paskua. 5 Insan intarya ra so bagat parad Paskua diad koma-14 agew na unonan bulan, diad pansirunget,* diad kalawakan na Sinai. Unong ed amin ya ingganggan nen Jehova ed si Moises, ontan so ginawa na saray Israelita.

6 Natan et wala ray lalakin nagmaliw ya agmalinis lapud impaniwit ed sakey a bangkay,*+ kanian ag-ira akapangitarya na bagat parad Paskua ed saman ya agew. Kanian inmarap irad si Moises tan Aaron diad saman ya agew+ 7 tan inkuan dad sikato: “Aliwa kamin malinis lapud impaniwit ed sakey a bangkay.* Akin et nasebelan kami a mangiyapay na apay parad si Jehova diad aturon panaon na satan ed limog na saray Israelita?”+ 8 Diad saya et inkuan nen Moises ed sikara: “Manalagar kayo ditan, ta dengelen ko no antoy iganggan nen Jehova nipaakar ed sikayo.”+

9 Insan oniay inkuan nen Jehova ed si Moises: 10 “Ibagam ed saray Israelita, ‘Anggaman nagmaliw ya agmalinis so siopaman a too ed limog yo odino diad ontumbok iran henerasyon yo lapud impaniwit ed sakey a bangkay,*+ odino anggaman sikatoy manbiabiahe ed arawi, itarya to nin siansia so bagat parad Paskua ed si Jehova. 11 Nepeg dan itarya itan diad koma-14 ya agew na komaduan bulan,+ diad pansirunget.* Kanen da itan a kaiba na andi-lebaduran tinapay tan ampait a bulobulong.+ 12 Anggapoy nepeg dan ikera ya anggad kabuasan,+ tan agda nepeg a puteren so anggan sakey a pukel na satan.+ Iparaan da itan unong ed amin a ganggan nipaakar ed Paskua. 13 Ingen no say sakey a too et malinis odino agmanbiabiahe ed arawi balet ta agto intarya so bagat parad Paskua, satan a too* et nepeg ya ekalen* ed kabaleyan to,+ lapud agto inyapay so apay parad si Jehova diad aturon panaon na satan. Ebatan na satan a too so kasalanan to.

14 “‘Tan no miaayam ed sikayo so sakey a dayo, nepeg to met ya itarya so bagat parad Paskua ed si Jehova.+ Nepeg ton gawaen so unong ed ganggan parad Paskua tan say niletneg a totontonen parad satan.+ Nepeg a walay saksakey a ganggan parad sikayo, balanglan dayo odino niyanak ed sayan dalin.’”+

15 Natan, diad samay agew a nipaalagey so tabernakulo+ et sinakbongan na lurem so tabernakulo, say tolda na Testimonya, balet diad labi et walay singa apoy a nansiansia ed tagey na tabernakulo ya anggad kabuasan.+ 16 Ontan so nantultuloy ya agawa: Onsakbong so lurem no agew, tan samay singa apoy no labi.+ 17 Sano ontagey so lurem ed tolda, tampol ya ombuat iray Israelita,+ tan diad pasen a tundaan na lurem, diman so pankampoan da.+ 18 Diad ganggan nen Jehova et ombuat iray Israelita, tan diad ganggan nen Jehova et mankampo ra.+ Legan a mansiasiansia so lurem ed tagey na tabernakulo, mansiansia ra ed pankakampoan da. 19 Sano mansiansia so lurem ed tagey na tabernakulo diad dakel iran agew, unoren na saray Israelita si Jehova tan ag-ira ombuat.+ 20 No maminsan et pigay agew a mansiansia so lurem ed tagey na tabernakulo. Diad ganggan nen Jehova et mansiansia ra ed pankakampoan da, tan diad ganggan nen Jehova et ombuat ira. 21 No maminsan et manlapud labi ya anggad kabuasan labat so pansiansia na lurem, tan ombuat ira sano ontagey so lurem diad kabuasan. Balanglan agew odino labi so itagey na lurem, ombuat ira.+ 22 Balanglan duaran agew, sakey bulan, odino mas mabayag ni, anggad wadman so lurem ed tagey na tabernakulo, mansiansia met iray Israelita ed pankakampoan da tan ag-ira ombuat. Balet sano ontagey itan, ombuat ira. 23 Diad ganggan nen Jehova et mankampo ra, tan diad ganggan nen Jehova et ombuat ira. Sinumpal day obligasyon dad si Jehova, diad ganggan nen Jehova ed panamegley nen Moises.