Levitico

15 Onia ni inkuan nen Jehova ed si Moises tan Aaron: 2 “Mitongtong kad saray Israelita tan ibagam ed sikara, ‘No say sakey a laki et walay ompapaway ed kayarian to,* sikatoy magmaliw ya agmalinis lapud sayan ompapaway ed sikato.+ 3 Sikatoy agmalinis lapud sayan ompapaway ed sikato, balanglan tuloytuloy ya ompapaway itan odino binmara itan ed kayarian to, sikatoy siansia nin agmalinis.

4 “‘Antokaman a dukolan na samay walay ompapaway ed sikato et magmaliw ya agmalinis, tan antokaman a yurongan to et magmaliw ya agmalinis. 5 Say toon maniwit ed dukolan to et nepeg ton ipesak iray kawes to, tan nepeg a sikatoy manames, balet sikatoy agmalinis ya anggad labi.+ 6 Siopaman ya onyurong ed kagawaan a niyurongan na samay walay ompapaway ed sikato et nepeg ton ipesak iray kawes to, tan manames, balet sikatoy agmalinis ya anggad labi. 7 Siopaman a maniwit ed laman na samay walay ompapaway ed sikato et nepeg ton ipesak iray kawes to, tan manames, balet sikatoy agmalinis ya anggad labi. 8 No nalutdaan na samay walay ompapaway ed sikato so sakey a toon malinis, sayan too et nepeg ton ipesak iray kawes to, tan manames, balet sikatoy agmalinis ya anggad labi. 9 Antokaman a panyurongan ed beneg na ayep a naluganan na samay walay ompapaway ed sikato et magmaliw ya agmalinis. 10 Siopaman a maniwit ed antokaman ya ayurongan to et magmaliw ya agmalinis ya anggad labi, tan siopaman a mangawit ed saratan a kagawaan et ipesak to iray kawes to, tan manames, balet sikatoy agmalinis ya anggad labi. 11 No samay walay ompapaway ed sikato+ et agnanuras na saray lima to tan adiwit toy sakey a too, sayan too et nepeg ton ipesak iray kawes to, tan manames, balet sikatoy agmalinis ya anggad labi. 12 Nepeg a betagen so banga a diwiten na samay walay ompapaway ed sikato, tan nepeg ya urasan so antokaman a pananginan a gawad kiew.+

13 “‘Sano inmabig la imay toon walay ompapaway ed sikato tan magmaliw lan malinis, sikatoy manbilang na pitoran agew parad panaglinis to, tan nepeg ton ipesak iray kawes to, manames ed danum a nanlapud subol, tan sikatoy magmaliw a malinis.+ 14 Diad komawalon agew et sikatoy mangala na duaran palekpek odino duaran sibong a malapati+ tan onla ed arapan nen Jehova diad lolooban na tolda a pantitiponan tan iter to iratan ed saserdote. 15 Tan iyapay iratan na saserdote, say sakey et apay parad kasalanan tan samay sakey et apay a popoolan, tan manggaway pananakbong so saserdote parad sikato diad arapan nen Jehova nipaakar ed samay sakit to.

16 “‘Natan no walay pinmaway a semilya ed sakey a laki, nepeg ton amesen so interon laman to, balet sikatoy agmalinis ya anggad labi.+ 17 Nepeg ton ipesak so antokaman a kawes tan urasan so katat a walaay semilya, tan magmaliw itan ya agmalinis ya anggad labi.

18 “‘Sano manakdol so laki tan bii tan walay ompaway a semilya, nepeg iran manames, balet ag-ira malinis ya anggad labi.+

19 “‘No walay dala ya ompaway ed laman na sakey a bii, sikatoy mantultuloy ya agmalinis ed loob na pitoran agew lapud panreregla to.+ Siopaman a maniwit ed sikato et magmaliw ya agmalinis ya anggad labi.+ 20 Antokaman a dukolan to legan na panreregla to et magmaliw ya agmalinis, tan amin a yurongan to et magmaliw ya agmalinis.+ 21 Siopaman a maniwit ed dukolan to et nepeg ton ipesak iray kawes to, tan manames, balet sikatoy agmalinis ya anggad labi. 22 Siopaman a maniwit ed antokaman a kagawaan a niyurongan to et nepeg ton ipesak iray kawes to, tan manames, balet sikatoy agmalinis ya anggad labi. 23 No sikatoy yinmurong ed dukolan odino diad arum a kagawaan, samay maniwit ed satan et magmaliw ya agmalinis ya anggad labi.+ 24 Tan no miakdol ed sikato so sakey a laki tan magmaliw ya agmalinis lapud dala na panreregla to,+ samay laki et agmalinis ed loob na pitoran agew, tan antokaman a dukolan na samay laki et magmaliw ya agmalinis.

25 “‘No pigay agew lan manpaparala so sakey a bii+ anta aliwa nin panaon na panagregla to,+ odino mas abayag lay pampaparala to nen say datin panagregla to, sikatoy agmalinis diad amin ya agew a pampaparala to, a singa diad saray agew na agto inkamalinis lapud panreregla. 26 Antokaman a dukolan to legan na saray agew na pampaparala to et magmaliw a singa say dukolan legan na panreregla to,+ tan antokaman a kagawaan a yurongan to et magmaliw ya agmalinis a singa say karutakan ed panreregla to. 27 Siopaman a maniwit ed saratan et magmaliw ya agmalinis, tan nepeg ton ipesak iray kawes to tan manames, balet sikatoy agmalinis ya anggad labi.+

28 “‘Balet no sikatoy malinis lad pampaparala to, sikatoy manbilang na pitoran agew manlapud intunday pampaparala to, tan kayari na satan et magmaliw lan malinis.+ 29 Diad komawalon agew et sikatoy mangala na duaran palekpek odino duaran sibong a malapati,+ tan iyakar to iratan ed saserdote diad lolooban na tolda a pantitiponan.+ 30 Usaren na saserdote so sakey bilang apay parad kasalanan tan samay sakey et apay a popoolan, tan manggaway pananakbong so saserdote parad sikato diad arapan nen Jehova nipaakar ed agmalinis a pampaparala to.+

31 “‘Kanian pansiansia yon biig ed karutakan iray Israelita, pian ag-ira ompatey ed karutakan diad pamabanday da ed tabernakulok a walad pegley da.+

32 “‘Saya so ganggan nipaakar ed laki a walay ompapaway ed sikato, laki ya agmalinis lapud pinmaway a semilya,+ 33 say bii legan na panreregla to,+ siopaman a laki odino bii a walay ompapaway ed laman to,+ tan sakey a laki a miakdol ed agmalinis a bii.’”